مەملەكەت باسشىسىنىڭ تاپسىرماسىمەن «حالىق قاھارمانى عازيز بايتاسوۆ» اتتى ۆەدومستۆولىق مەدال تاعايىندالدى، دەپ حابارلايدى “ادىرنا”.
ماراپاتتىڭ العاشقى داناسى باتىردىڭ جارى گۇلجامال تاجيەۆاعا قۇرمەت پەن العىس بەلگىسى رەتىندە تابىستالدى.
جاڭا مەدالمەن قىزمەتتىك مىندەتىن اتقارۋ كەزىندە ەرلىك پەن باتىلدىق تانىتقان ىشكى ىستەر ورگاندارىنىڭ قىزمەتكەرلەرى ماراپاتتالادى.
ايتا كەتەيىك، عازيز بايتاسوۆ – قازاقستان تاريحىندا «حالىق قاھارمانى» اتاعىنا يە بولعان العاشقى پوليتسيا قىزمەتكەرى. ول بۇل اتاققا 2011 جىلى تاراز قالاسىندا بولعان تەراكت كەزىندە كورسەتكەن ەرلىگى ءۇشىن يە بولدى.
2011 جىلعى 12 قاراشادا تاراز قالاسىندا ماقسات قاريەۆ ەسىمدى قارۋلى قىلمىسكەر بىرقاتار اۋىر قىلمىس جاساپ، تۇرعىنداردىڭ ومىرىنە قاۋىپ ءتوندىردى. وقيعا ورنىنا العاشقىلاردىڭ ءبىرى بولىپ جەتكەن پوليتسيا كاپيتانى عازيز بايتاسوۆ قىلمىسكەردى توقتاتۋعا ارەكەت جاسادى.
اۋىر جارالانعانىنا قاراماستان، ول قىلمىسكەردى زالالسىزداندىرۋعا ۇمتىلدى. قولىنداعى گراناتانىڭ جارىلۋ قاۋپىن بايقاعان بايتاسوۆ اينالاسىنداعى ادامداردى قورعاۋ ءۇشىن قىلمىسكەرگە قاراي ۇمتىلدى. جارىلىس سالدارىنان پوليتسيا كاپيتانى قازا تاپتى. ول كەزدە عازيز بايتاسوۆ 40 جاستا ەدى.
