الماتىدا اۆتوبۋستىڭ توبەسىندە وتشاشۋ ۇيىمداستىرعان بۇزاقىلار ۇستالدى. Polisia.kz مالىمدەۋىنشە ولاردىڭ اراسىندا كامەلەتكە تولماعاندار دا بار دەپ حابارلايدى "ادىرنا" سايتى.
بوستاندىق اۋداندىق پوليتسيا باسقارماسىنىڭ حابارلاۋىنشا، بۇزاقىلىق جاساعاندار انىقتالدى. الەۋمەتتىك جەلىدە ولاردىڭ جاساعان بۇزاقىلىقتارى بەينەلەگەن ۆيدەو تارادى.
«ولار تورتەۋ. باستاپقىدا ارقايسىسىنىڭ رولدەرى تاعايىندالدى. بىرەۋى اۆتوبۋس جۇرگىزۋشىسىنىڭ نازارىن اۋدارسا، ەكىنشىسى نە بولىپ جاتقانىن ۇيالى تەلەفون كامەراسىنا ءتۇسىرىپ الدى، تاعى ەكەۋى – تىكەلەي ورىنداۋشىلار قوعامدىق كولىكتىڭ توبەسىنە شىعىپ، وتشاشۋ ۇيىمداستىردى. ولاردىڭ اراسىندا كامەلەتكە تولماعاندار دا بار»، - دەيدى اۋداندىق ىشكى ىستەر ءبولىمىنىڭ باسشىسى دۋمان اۋحاديەۆ.
پوليتسيا دەپارتامەنتىنىڭ باسشىسى ءىس قر قىلمىستىق كودەكسىنىڭ 293-بابى «بۇزاقىلىق» بويىنشا تەرگەلىپ جاتقانىن قوستى. سونىمەن قاتار، بۇزاقىلاردىڭ ارەكەتتەرىنەن قازاقستان رەسپۋبليكاسى اكىمشىلىك كودەكسىنىڭ 436-بابىندا كوزدەلگەن «اتىس قارۋىنان، گازبەن، پنەۆماتيكالىق، لاقتىرعىش جانە ەلەكتر قارۋىنان اتۋ، ەلدى مەكەندەردە پيروتەحنيكالىق بۇيىمداردى قولدانۋ» دەگەن قۇقىق بۇزۋشىلىق بەلگىلەرىن كورگەن.
دۋمان اۋحاديەۆ پوليتسيا قىزمەتكەرلەرى اۆتوبۋستاعى جولاۋشىلارعا ناقتى قاۋىپ توندىرگەن جاستاردىڭ ءىس-ارەكەتىنىڭ شىنايى سەبەبىن تەرگەۋ بارىسىندا انىقتايتىنىنا سەندىردى.
كادرلاردا اۆتوبۋستىڭ توبەسىنەن سەكىرىپ بارا جاتقان قاتىسۋشىلاردىڭ ءبىرى باسىنان جاراقات العانى كورىنەدى.
سونداي-اق ينتەرنەتتە بۇزاقىلار شاعىن اۆتوبۋستىڭ توبەسىنەن وتشاشۋلار اتقان ۆيدەو تارادى.
"ادىرنا" ۇلتتىق پورتالى
