Memleket basşysynyŋ tapsyrmasymen «Halyq qaharmany Ǧaziz Baitasov» atty vedomstvolyq medal taǧaiyndaldy, dep habarlaidy “Adyrna”.
Marapattyŋ alǧaşqy danasy batyrdyŋ jary Güljamal Täjievaǧa qūrmet pen alǧys belgısı retınde tabystaldy.
Jaŋa medalmen qyzmettık mındetın atqaru kezınde erlık pen batyldyq tanytqan ışkı ıster organdarynyŋ qyzmetkerlerı marapattalady.
Aita keteiık, Ǧaziz Baitasov – Qazaqstan tarihynda «Halyq qaharmany» ataǧyna ie bolǧan alǧaşqy polisiia qyzmetkerı. Ol būl ataqqa 2011 jyly Taraz qalasynda bolǧan terakt kezınde körsetken erlıgı üşın ie boldy.
2011 jylǧy 12 qaraşada Taraz qalasynda Maqsat Qariev esımdı qaruly qylmysker bırqatar auyr qylmys jasap, tūrǧyndardyŋ ömırıne qauıp töndırdı. Oqiǧa ornyna alǧaşqylardyŋ bırı bolyp jetken polisiia kapitany Ǧaziz Baitasov qylmyskerdı toqtatuǧa äreket jasady.
Auyr jaralanǧanyna qaramastan, ol qylmyskerdı zalalsyzdandyruǧa ūmtyldy. Qolyndaǧy granatanyŋ jarylu qaupın baiqaǧan Baitasov ainalasyndaǧy adamdardy qorǧau üşın qylmyskerge qarai ūmtyldy. Jarylys saldarynan polisiia kapitany qaza tapty. Ol kezde Ǧaziz Baitasov 40 jasta edı.
