25 قاراشا - زورلىق – زومبىلىققا قارسى كۇنگە وراي ەلىمىزدە “زورلىق-زومبىلىققا قارسى بەلسەندىلىكتىڭ 16 كۇنى” اكتسياسى باستالدى، دەپ حابارلايدى "ادىرنا" ۇلتتىق پورتالى Polisia.kz-كە سىلتەپ.
بۇل اكتسيانىڭ ماقساتى – ايەلدەرگە قاتىستى زورلىق-زومبىلىقتىڭ الدىن الۋ، بولدىرماۋ جانە جولىن كەسۋ، انا مەن بالانى، ولاردىڭ ءومىرىن قورعاۋ، سونداي-اق وتباسىلىق قۇندىلىقتاردى ناسيحاتتاۋ بولىپ تابىلادى.
ايەلدەرگە قاتىستى كەمسىتۋشىلىكتىڭ بارلىق ءتۇرىن جويۋ اياسىندا ىشكى ىستەر مينيسترلىگى 25 قاراشادان 10 جەلتوقسانعا دەيىن مۇددەلى مەملەكەتتىك ورگانداردىڭ، ۇكىمەتتىك ەمەس جانە حالىقارالىق ۇيىمداردىڭ وكىلدەرىن، بارشا حالىقتى “زورلىق-زومبىلىققا قارسى بەلسەندىلىكتىڭ 16 كۇنى” اكتسياسىن وتكىزۋگە شاقىرادى.
اتالمىش شارانى وتكىزۋ بارىسىندا يميدجدىك ءىس-شارالاردان بولەك وتباسىندا قۇقىق بۇزۋشىلىق جاساۋعا بەيىم ادامداردى، سونداي-اق جايسىز وتباسىلاردى تۇرعىلىقتى جەرى بويىنشا تەكسەرۋ جوسپارلانعان.
ءار وڭىردە قۇرىلعان ءموبيلدى توپتار تۇرمىسى جايسىز وتباسىلار مەن ومىرلىك قيىن جاعدايعا تاپ بولعان وتباسىلارعا كەشەندى كومەك كورسەتۋگە ەرەكشە نازار اۋدارماق.
وتباسىنداعى اگرەسسورلارمەن اكىمشىلىك قاماۋدى وتەۋ كەزەڭىندە پروفيلاكتيكالىق جۇمىس جاساۋ ءۇشىن قوعامنىڭ بەلسەندى وكىلدەرى جۇمىلدىرىلىپ، ارنايى قابىلداعىشتارعا بارۋ جوسپارلانعان.
"قۇرمەتتى ازاماتتار! ەگەر ءسىز وتباسىلىق-تۇرمىستىق زورلىق-زومبىلىقتىڭ قۇربانى بولساڭىز نەمەسە وسىنداي جاعداي تۋرالى بىلسەڭىز، ونى جاسىرۋدىڭ قاجەتى جوق. پوليتسيانىڭ 102 جەدەل ارناسى ۇنەمى جۇمىس ىستەيدى. ودان بولەك ەلىمىزدە جاقىندا عانا ىسكە قوسىلعان 111 تەگىن سەنىم تەلەفونى بار، وعان قوڭىراۋ شالىپ، تۇرمىستىق زورلىق-زومبىلىق قۇرباندارىنا كومەك كورسەتۋ باعدارلامالارى تۋرالى كەڭەس الۋعا بولادى. ءاربىر شاقىرۋ بويىنشا پوليتسيا قىزمەتكەرلەرى جەدەل تۇردە سول جەرگە كەلىپ، كىنالى ادامداردى جاۋاپقا تارتۋ ءۇشىن زاڭدا كوزدەلگەن بارلىق شارالاردى قابىلدايدى", – دەدى قر ءىىم اكىمشىلىك پوليتسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقمارال سەرىكباەۆا.
