سپورتتىڭ ءتىلى ورتاق. ونىڭ الاڭىندا ۇلت پەن ۇلىستىڭ بولەكتىگى ەمەس، ورتاق ماقساتقا دەگەن ۇمتىلىس پەن جەڭىسكە دەگەن جىگەر سىنالادى. ال سول باسەكەگە دوستىق پەن قايىرىمدىلىقتىڭ ءمانى قوسىلسا، جارىستىڭ تاعىلىمى دا تەرەڭدەي تۇسەدى.
رەسپۋبليكا كۇنى قارساڭىندا كوكشەتاۋدا وتكەن «دوستىق دوبى» II وبلىستىق قايىرىمدىلىق ۆولەيبول ءتۋرنيرىنىڭ استارىندا وسىنداي مازمۇن بار.
ەتنومادەني بىرلەستىكتەر مەن قوعامدىق قۇرىلىمداردىڭ باسىن قوسقان جارىسقا 11 كوماندا قاتىستى. ۆولەيبول الاڭىندا ءار كوماندا ءوز مۇمكىندىگىن بايقاپ، شەبەرلىگى مەن ۇيىمشىلدىعىن كورسەتتى. دوپقا تالاس قىزعان ساتتەردە جەڭىسكە دەگەن جىگەر دە، قارسىلاسقا دەگەن قۇرمەت تە قاتار كورىندى. ويتكەنى سپورتتاعى شىنايى جەڭىس تەك ەسەپ تاقتاسىنداعى كورسەتكىشپەن ولشەنبەيدى. ول - ورتاق ەرەجەگە باعىنۋ، وزگەنىڭ مۇمكىندىگىن مويىنداۋ، جەڭىستى باعالاپ، جەڭىلىستى سابىرمەن قابىلداي ءبىلۋ.
ءتۋرنيردىڭ اشىلۋىندا اقمولا وبلىسى ىشكى ساياسات باسقارماسىنىڭ ءبولىم باسشىسى ەركىن سەيىتوۆ، «قوعامدىق كەلىسىم» كمم باسشىسى قۋانىش شاقشاقوۆ جانە «ماناس» ەتنومادەني ورتالىعىنىڭ توراعاسى زاكيردين جوروبەكوۆ قۇتتىقتاۋ ءسوز سويلەپ، قاتىسۋشىلارعا ساتتىلىك تىلەدى.
تارتىستى ويىنداردىڭ قورىتىندىسىندا اتباسار كومانداسى ءبىرىنشى ورىندى يەلەندى. «قازاق ءتىلى مەن مادەنيەتى» كومانداسى ەكىنشى ورىنعا تۇراقتاسا، «اقمولا وبلىسىنىڭ ورىس ورتالىعى» كومانداسى ءۇشىنشى ورىنعا يە بولدى. جەڭىمپازدار مەن جۇلدەگەرلەر ماراپاتتالدى.
الايدا ءتۋرنيردىڭ تۇپكى ماقساتى جۇلدەلى ورىنداردى انىقتاۋمەن شەكتەلمەيدى. ونىڭ ار جاعىندا دوستىقتى بەكەمدەۋ، ەل ىشىندەگى بىرلىك پەن ىنتىماقتى نىعايتۋ، قايىرىمدىلىقتى دارىپتەۋ مۇراتى جاتىر. جارىس اياسىندا كوپبالالى وتباسىلارعا نەمەسە سپورتپەن شۇعىلداناتىن بالالارعا قولداۋ كورسەتۋ ءۇشىن قاراجات جيناۋ كوزدەلگەن. دەمەك، بۇل جولى كوماندالار جەڭىس ءۇشىن عانا ەمەس، يگى ىسكە ۇلەس قوسۋ ءۇشىن دە كۇش بىرىكتىردى.
قايىرىمدىلىقتىڭ قادىرى - جاريا بولعان سومادا عانا ەمەس، كومەككە مۇقتاج جانعا دەگەن جاناشىرلىقتا. بىرەۋگە دەمەۋ بولۋ، ءبىر بالانىڭ سپورتقا دەگەن تالابىن قولداۋ، ءبىر وتباسىنىڭ ۇمىتىنە ءۇمىت قوسۋ - قوعامنىڭ ادامگەرشىلىك ولشەمىن تانىتاتىن قاسيەتتەر. وسى تۇرعىدان العاندا، «دوستىق دوبى» ءتۋرنيرىنىڭ ماڭىزى سپورتتىق باسەكەدەن الدەقايدا كەڭ.
بىرلىك تۋرالى ايتۋ ءبىر باسقا، ونى ءىس جۇزىندە كورسەتۋ ءبىر باسقا. ءبىر الاڭدا باس قوسىپ، ورتاق ەرەجەمەن ويناپ، جەڭىس ءۇشىن ادال كۇرەسۋ جانە قايىرىمدى ىسكە بىرگە اتسالىسۋ - قوعامدىق كەلىسىمنىڭ ناقتى كورىنىسى. ءتۇرلى ەتنومادەني بىرلەستىكتەر مەن قوعامدىق قۇرىلىمداردىڭ وكىلدەرىن توعىستىرعان مۇنداي باستامالار ادامداردى جاقىنداستىرىپ، ءوزارا سەنىم مەن قۇرمەتتى نىعايتا تۇسەدى.
رەسپۋبليكا كۇنى - مەملەكەتتىلىكتىڭ ءمانىن، ەلدىكتىڭ قادىرىن پايىمدايتىن مەرەكە. ال ەلدىكتىڭ تىرەگى ورتاق تاريح پەن ورتاق مەكەندە عانا ەمەس، ادامداردىڭ ءبىر-بىرىنە دەگەن قۇرمەتى مەن جاناشىرلىعىندا دا جاتىر. سوندىقتان دوستىقتى دارىپتەگەن ءاربىر باستاما، ىنتىماقتى بەكەمدەگەن ءاربىر كەزدەسۋ قوعام ومىرىندە وزىندىك ورىن الادى.
«دوستىق دوبى» ءتۋرنيرى دە وسى ويدى سپورت تىلىمەن جەتكىزدى. الاڭدا كوماندالار باق سىنادى، ۇزدىكتەر انىقتالدى. بىراق جارىستىڭ ەڭ ماڭىزدى ناتيجەسى جۇلدەلەرمەن عانا ولشەنبەيدى. ول - ورتاق ىسكە جۇمىلعان جۇرتتىڭ ىنتىماعى، قايىرىمدىلىققا ۇلاسقان نيەتى جانە بىرلىكتىڭ كۇندەلىكتى ىستەردەن باستالاتىنىن كورسەتكەن ونەگەسى.
ويتكەنى دوستىقتىڭ دا ءوز الاڭى بار. ول - ادامداردىڭ ءبىرىن-ءبىرى تۇسىنۋگە تالپىنعان جەرى. ال بىرلىكتىڭ شىنايى باعاسى - سول تۇسىنىستىكتى ساقتاپ، يگى ءىستى بىرگە اتقارا بىلۋدە.
اسلان وسپانوۆ.
