Спорттың тілі ортақ. Оның алаңында ұлт пен ұлыстың бөлектігі емес, ортақ мақсатқа деген ұмтылыс пен жеңіске деген жігер сыналады. Ал сол бәсекеге достық пен қайырымдылықтың мәні қосылса, жарыстың тағылымы да тереңдей түседі.
Республика күні қарсаңында Көкшетауда өткен «Достық добы» II облыстық қайырымдылық волейбол турнирінің астарында осындай мазмұн бар.
Этномәдени бірлестіктер мен қоғамдық құрылымдардың басын қосқан жарысқа 11 команда қатысты. Волейбол алаңында әр команда өз мүмкіндігін байқап, шеберлігі мен ұйымшылдығын көрсетті. Допқа талас қызған сәттерде жеңіске деген жігер де, қарсыласқа деген құрмет те қатар көрінді. Өйткені спорттағы шынайы жеңіс тек есеп тақтасындағы көрсеткішпен өлшенбейді. Ол - ортақ ережеге бағыну, өзгенің мүмкіндігін мойындау, жеңісті бағалап, жеңілісті сабырмен қабылдай білу.
Турнирдің ашылуында Ақмола облысы ішкі саясат басқармасының бөлім басшысы Еркін Сейітов, «Қоғамдық келісім» КММ басшысы Қуаныш Шақшақов және «Манас» этномәдени орталығының төрағасы Закирдин Жоробеков құттықтау сөз сөйлеп, қатысушыларға сәттілік тіледі.
Тартысты ойындардың қорытындысында Атбасар командасы бірінші орынды иеленді. «Қазақ тілі мен мәдениеті» командасы екінші орынға тұрақтаса, «Ақмола облысының орыс орталығы» командасы үшінші орынға ие болды. Жеңімпаздар мен жүлдегерлер марапатталды.
Алайда турнирдің түпкі мақсаты жүлделі орындарды анықтаумен шектелмейді. Оның ар жағында достықты бекемдеу, ел ішіндегі бірлік пен ынтымақты нығайту, қайырымдылықты дәріптеу мұраты жатыр. Жарыс аясында көпбалалы отбасыларға немесе спортпен шұғылданатын балаларға қолдау көрсету үшін қаражат жинау көзделген. Демек, бұл жолы командалар жеңіс үшін ғана емес, игі іске үлес қосу үшін де күш біріктірді.
Қайырымдылықтың қадірі - жария болған сомада ғана емес, көмекке мұқтаж жанға деген жанашырлықта. Біреуге демеу болу, бір баланың спортқа деген талабын қолдау, бір отбасының үмітіне үміт қосу - қоғамның адамгершілік өлшемін танытатын қасиеттер. Осы тұрғыдан алғанда, «Достық добы» турнирінің маңызы спорттық бәсекеден әлдеқайда кең.
Бірлік туралы айту бір басқа, оны іс жүзінде көрсету бір басқа. Бір алаңда бас қосып, ортақ ережемен ойнап, жеңіс үшін адал күресу және қайырымды іске бірге атсалысу - қоғамдық келісімнің нақты көрінісі. Түрлі этномәдени бірлестіктер мен қоғамдық құрылымдардың өкілдерін тоғыстырған мұндай бастамалар адамдарды жақындастырып, өзара сенім мен құрметті нығайта түседі.
Республика күні - мемлекеттіліктің мәнін, елдіктің қадірін пайымдайтын мереке. Ал елдіктің тірегі ортақ тарих пен ортақ мекенде ғана емес, адамдардың бір-біріне деген құрметі мен жанашырлығында да жатыр. Сондықтан достықты дәріптеген әрбір бастама, ынтымақты бекемдеген әрбір кездесу қоғам өмірінде өзіндік орын алады.
«Достық добы» турнирі де осы ойды спорт тілімен жеткізді. Алаңда командалар бақ сынады, үздіктер анықталды. Бірақ жарыстың ең маңызды нәтижесі жүлделермен ғана өлшенбейді. Ол - ортақ іске жұмылған жұрттың ынтымағы, қайырымдылыққа ұласқан ниеті және бірліктің күнделікті істерден басталатынын көрсеткен өнегесі.
Өйткені достықтың да өз алаңы бар. Ол - адамдардың бірін-бірі түсінуге талпынған жері. Ал бірліктің шынайы бағасы - сол түсіністікті сақтап, игі істі бірге атқара білуде.
Аслан Оспанов.
