Sporttyŋ tılı ortaq. Onyŋ alaŋynda ūlt pen ūlystyŋ bölektıgı emes, ortaq maqsatqa degen ūmtylys pen jeŋıske degen jıger synalady. Al sol bäsekege dostyq pen qaiyrymdylyqtyŋ mänı qosylsa, jarystyŋ taǧylymy da tereŋdei tüsedı.
Respublika künı qarsaŋynda Kökşetauda ötken «Dostyq doby» II oblystyq qaiyrymdylyq voleibol turnirınıŋ astarynda osyndai mazmūn bar.
Etnomädeni bırlestıkter men qoǧamdyq qūrylymdardyŋ basyn qosqan jarysqa 11 komanda qatysty. Voleibol alaŋynda är komanda öz mümkındıgın baiqap, şeberlıgı men ūiymşyldyǧyn körsettı. Dopqa talas qyzǧan sätterde jeŋıske degen jıger de, qarsylasqa degen qūrmet te qatar körındı. Öitkenı sporttaǧy şynaiy jeŋıs tek esep taqtasyndaǧy körsetkışpen ölşenbeidı. Ol - ortaq erejege baǧynu, özgenıŋ mümkındıgın moiyndau, jeŋıstı baǧalap, jeŋılıstı sabyrmen qabyldai bılu.
Turnirdıŋ aşyluynda Aqmola oblysy ışkı saiasat basqarmasynyŋ bölım basşysy Erkın Seiıtov, «Qoǧamdyq kelısım» KMM basşysy Quanyş Şaqşaqov jäne «Manas» etnomädeni ortalyǧynyŋ töraǧasy Zakirdin Jorobekov qūttyqtau söz söilep, qatysuşylarǧa sättılık tıledı.
Tartysty oiyndardyŋ qorytyndysynda Atbasar komandasy bırınşı oryndy ielendı. «Qazaq tılı men mädenietı» komandasy ekınşı orynǧa tūraqtasa, «Aqmola oblysynyŋ orys ortalyǧy» komandasy üşınşı orynǧa ie boldy. Jeŋımpazdar men jüldegerler marapattaldy.
Alaida turnirdıŋ tüpkı maqsaty jüldelı oryndardy anyqtaumen şektelmeidı. Onyŋ ar jaǧynda dostyqty bekemdeu, el ışındegı bırlık pen yntymaqty nyǧaitu, qaiyrymdylyqty därıpteu mūraty jatyr. Jarys aiasynda köpbalaly otbasylarǧa nemese sportpen şūǧyldanatyn balalarǧa qoldau körsetu üşın qarajat jinau közdelgen. Demek, būl joly komandalar jeŋıs üşın ǧana emes, igı ıske üles qosu üşın de küş bırıktırdı.
Qaiyrymdylyqtyŋ qadırı - jariia bolǧan somada ǧana emes, kömekke mūqtaj janǧa degen janaşyrlyqta. Bıreuge demeu bolu, bır balanyŋ sportqa degen talabyn qoldau, bır otbasynyŋ ümıtıne ümıt qosu - qoǧamnyŋ adamgerşılık ölşemın tanytatyn qasietter. Osy tūrǧydan alǧanda, «Dostyq doby» turnirınıŋ maŋyzy sporttyq bäsekeden äldeqaida keŋ.
Bırlık turaly aitu bır basqa, ony ıs jüzınde körsetu bır basqa. Bır alaŋda bas qosyp, ortaq erejemen oinap, jeŋıs üşın adal küresu jäne qaiyrymdy ıske bırge atsalysu - qoǧamdyq kelısımnıŋ naqty körınısı. Türlı etnomädeni bırlestıkter men qoǧamdyq qūrylymdardyŋ ökılderın toǧystyrǧan mūndai bastamalar adamdardy jaqyndastyryp, özara senım men qūrmettı nyǧaita tüsedı.
Respublika künı - memlekettılıktıŋ mänın, eldıktıŋ qadırın paiymdaityn mereke. Al eldıktıŋ tıregı ortaq tarih pen ortaq mekende ǧana emes, adamdardyŋ bır-bırıne degen qūrmetı men janaşyrlyǧynda da jatyr. Sondyqtan dostyqty därıptegen ärbır bastama, yntymaqty bekemdegen ärbır kezdesu qoǧam ömırınde özındık oryn alady.
«Dostyq doby» turnirı de osy oidy sport tılımen jetkızdı. Alaŋda komandalar baq synady, üzdıkter anyqtaldy. Bıraq jarystyŋ eŋ maŋyzdy nätijesı jüldelermen ǧana ölşenbeidı. Ol - ortaq ıske jūmylǧan jūrttyŋ yntymaǧy, qaiyrymdylyqqa ūlasqan nietı jäne bırlıktıŋ kündelıktı ısterden bastalatynyn körsetken önegesı.
Öitkenı dostyqtyŋ da öz alaŋy bar. Ol - adamdardyŋ bırın-bırı tüsınuge talpynǧan jerı. Al bırlıktıŋ şynaiy baǧasy - sol tüsınıstıktı saqtap, igı ıstı bırge atqara bılude.
Aslan Ospanov.
