قازىرگى ەڭبەك نارىعى بۇرىنعىداي تۇراقتى ەمەس. ءار بىرنەشە جىل سايىن جاڭا ماماندىقتار پايدا بولىپ، كەيبىرى وزەكتىلىگىن جوعالتادى.
وسىنداي قارقىندى وزگەرىستەر كەزەڭىندە بولاشاقتا سۇرانىسقا يە بولۋ ءۇشىن كاسىبي باعىتتى ەرتە ايقىنداۋ ماڭىزدى.
وسى قاجەتتىلىكتى ەسكەرە وتىرىپ، تيمۋر قۇلىباەۆتىڭ Halyk قايىرىمدىلىق قورى «تالىمگەر» جوباسى اياسىندا Bolashaq.me تسيفرلىق پروفوريەنتاتسيالىق پلاتفورماسى ىسكە قوسىلدى. جوبا جاسوسپىرىمدەرگە ماماندىقتى سانالى تاڭداۋعا كومەكتەسەتىن جاڭا بۋىن ينفراقۇرىلىمى رەتىندە ۇسىنىلىپ وتىر.
Bolashaq.me پلاتفورماسى قولدانۋشىلارعا ارنايى تەستىلەۋدەن ءوتىپ، وزىنە سايكەس كەلەتىن ماماندىقتار سپەكترىن انىقتاۋعا مۇمكىندىك بەرەدى. ءارى قاراي وقۋشى نەمەسە ستۋدەنت تاڭدالعان ماماندىقتىڭ مازمۇنىمەن تەرەڭىرەك تانىسا الادى: جۇمىس كۇنى قالاي وتەدى، قانداي داعدىلار قاجەت، ەڭبەك نارىعىنداعى سۇرانىس دەڭگەيى قانداي، جالاقى مولشەرى قانشا – بارلىعى جۇيەلەنگەن فورماتتا ۇسىنىلعان.
پلاتفورما بازاسىندا 24 سالا بويىنشا توپتاستىرىلعان 1000-نان استام ماماندىق قامتىلعان. ءار ماماندىققا بالاما اتاۋلار ەنگىزىلگەن، بۇل ىزدەۋ پروتسەسىن جەڭىلدەتەدى.
كىشى سىنىپ وقۋشىلارى ءۇشىن اقپارات جەڭىل ءارى تۇسىنىكتى تىلدە ۇسىنىلسا، جوعارى سىنىپ وقۋشىلارى مەن ستۋدەنتتەرگە ناقتى ەڭبەك شارتتارى مەن جۇمىس بەرۋشىلەردىڭ تالاپتارىنا باسىمدىق بەرىلەدى.
جوبا الداعى ۋاقىتتا دا دامىتىلادى: مەكتەپ پروفوريەنتولوگتارىنا ارنالعان ادىستەمەلىك ماتەريالدار مەن اتا-انالارعا پراكتيكالىق كەڭەستەر قوسىلادى. سونىمەن قاتار تەست ناتيجەسىنە سايكەس جوعارى وقۋ ورىندارىنداعى ماماندىقتار تۋرالى ناقتى دەرەكتەر ەنگىزۋ جوسپارلانعان.
بيزنەس – سەرىكتەس ءارى تاجىريبە كوزى
Bolashaq.me پلاتفورماسىن ازىرلەۋگە بيزنەس وكىلدەرى دە تارتىلعان. 100-دەن استام ماماندىق بويىنشا ناقتى سالادا ەڭبەك ەتىپ جۇرگەن كاسىبي مامانداردىڭ بەينەماتەريالدارى جاريالانعان. ولار ءوز جۇمىس ورنىن كورسەتىپ، ماماندىقتىڭ ارتىقشىلىقتارى مەن قيىندىقتارى تۋرالى شىنايى تاجىريبەسىمەن بولىسەدى.
بۇل ءتاسىل جاسوسپىرىمگە ماماندىقتى سىرتتاي ەمەس، «ىشىنەن» كورۋگە مۇمكىندىك بەرەدى. ياعني تاڭداۋ ابستراكتىلى سيپاتتامالارعا ەمەس، ناقتى تاجىريبەگە نەگىزدەلەدى.
AI – جەكە باعىتتاۋشى قۇرال
پلاتفورمادا جاساندى ينتەللەكت نەگىزىندەگى كەڭەسشى جۇمىس ىستەيدى. ول تەست ناتيجەلەرىن تالداپ، كاسىبي قىزىعۋشىلىقتاردى ناقتىلاپ، جەكە ۇسىنىستار قالىپتاستىرادى.
2026 جىلى AI فۋنكتسيونالى كەڭەيتىلىپ، جۇيە پايدالانۋشىنىڭ جاس ەرەكشەلىگى مەن داعدىلارىنىڭ دامۋ ديناميكاسىن ەسكەرەتىن ۇزاق مەرزىمدى سۇيەمەلدەۋ قۇرالىنا اينالادى.
سەرۆيس تولىقتاي تەگىن جانە Kundelik.kz ءبىلىم بەرۋ جۇيەسىمەن ينتەگراتسيالانعان. بۇل ونى ەلىمىزدىڭ كەز كەلگەن وڭىرىندەگى وقۋشىلار ءۇشىن قولجەتىمدى ەتەدى.
Bolashaq.me پلاتفورماسىنىڭ ىسكە قوسىلۋى – ادام كاپيتالىنا باعىتتالعان جۇيەلى ينۆەستيتسيالىق ستراتەگيانىڭ ءبىر بولىگى. قارجى، ونەركاسىپ، ينۆەستيتسيا جانە ءبىلىم سالالارىن بىرىكتىرەتىن ەكوجۇيە ەلىمىزدەگى ءىرى جەكە جۇمىس بەرۋشىلەردىڭ قاتارىنا جاتادى.
وسى تۇرعىدا بىلىمگە سالىنعان ينۆەستيتسيا – جەكەلەگەن قايىرىمدىلىق اكتسياسى ەمەس، ەكونوميكالىق ستراتەگيانىڭ لوگيكالىق جالعاسى. ەكونوميكا مۇمكىندىكتەر جاسايدى، ءبىلىم سول مۇمكىندىكتەرگە دايىندايدى، ال تسيفرلىق قۇرالدار سانالى تاڭداۋ جاساۋعا جول اشادى.
Bolashaq.me ءجاسوسپىرىم ءۇشىن وسى مۇمكىندىكتەر ەكوجۇيەسىنە باستار العاشقى قادام بولماق. پلاتفورما ارقىلى وقۋشى قاي سالالار قارقىندى دامىپ جاتقانىن، قاي باعىتتا كادر تاپشىلىعى بار ەكەنىن، بولاشاقتا قانداي داعدىلار سۇرانىسقا يە بولاتىنىن جانە ناقتى ناتيجەگە جەتكىزەتىن ءبىلىم بەرۋ تراەكتورياسىن تۇسىنە الادى.
وسىلايشا ءىرى جۇمىس بەرۋشى تەك جۇمىس ورىندارىن قۇرۋمەن شەكتەلمەي، الداعى 10–15 جىلعا ارنالعان كادرلىق رەزەرۆتىڭ قالىپتاسۋىنا دا ۇلەس قوسادى.
