جەتىسۋ وبلىسىندا بىرقاتار جۇك كولىگىنىڭ اۆتوماتتى سالماق باقىلاۋ جۇيەسىنەن اينالىپ جۇرگەنى انىقتالدى. تاسىمالداۋشىلار «سارىوزەك – كوكتال» اۆتوجولىنداعى باقىلاۋ بەكەتىن اينالىپ ءوتۋ ءۇشىن وندىرىستىك ماقساتتاعى تەحنيكالىق جولدى پايدالانعان، دەپ حابارلايدى "ادىرنا".
قۇقىق بۇزۋشىلىقتىڭ الدىن الۋ ماقساتىندا باس كولىك پروكۋراتۋراسىنىڭ ۇيلەستىرۋىمەن «قازاۆتوجول» اتالعان جولدى جاپتى. قازىر جۇك كولىكتەرى سالماقتىق باقىلاۋدان اۆتوماتتاندىرىلعان ارنايى ستانتسيا ارقىلى وتەدى.
باقىلاۋ شارالارىن كۇشەيتۋ ءۇشىن ارنايى جۇمىس توبى قۇرىلدى. كولىك پروكۋرورلارى جۇك تاسىمالى سالاسىنداعى زاڭ بۇزۋشىلىقتاردى انىقتاۋ بويىنشا تۇراقتى تۇردە تەكسەرۋ جۇرگىزىپ كەلەدى.
قر باس كولىك پروكۋرورىنىڭ ورىنباسارى اقان يسكاكوۆتىڭ ايتۋىنشا، جىل باسىنان بەرى كولىك باقىلاۋ ينسپەكتسياسى سالماق تالاپتارىن ساقتاماعان 22 مىڭ تاسىمالداۋشىنى اكىمشىلىك جاۋاپكەرشىلىككە تارتقان. ولارعا جالپى سوماسى 6 ملرد تەڭگەگە جۋىق ايىپپۇل سالىنعان.
سونىمەن قاتار كولىكتەردىڭ بەلگىلەنگەن نورمادان ارتىق جۇكپەن جولعا شىعۋىنا جاعداي جاسايتىن كاسىپورىندارعا دا باقىلاۋ كۇشەيتىلگەن. وسى كەزەڭدە مۇنداي تالاپتاردى بۇزعان 363 سۋبەكت جاۋاپكەرشىلىككە تارتىلعان.
«زاڭ مەن ءتارتىپ» يدەولوگەماسى اياسىندا «Legal Talk: اشىق ميكروفون» فورماتىنداعى جاستار فورۋمى ءوتتى
