جەتىسۋ وبلىسىندا مەملەكەت باسشىسىنىڭ تاپسىرماسىنا سايكەس ينكليۋزيۆتى سپورت كەشەنىنىڭ قۇرىلىسى باستالدى. وسىعان وراي بۇگىن تالدىقورعان قالاسىنداعى قۇرىلىس الاڭىنا ۋاقىت كاپسۋلاسى سالىندى.
سالتاناتتى شاراعا وبلىس اكىمى بەيبىت يساباەۆ، «قازاقستان حالقىنا» قورىنىڭ باسقارما ءتورايىمى ءلاززات شىڭعىسباەۆا، ەرەكشە قاجەتتىلىگى بار سپورتشىلار قاتىستى.
الدىمەن جينالعان قاۋىمدى جاڭا ينكليۋزيۆتى نىسان قۇرىلىسىنىڭ باستالۋىمەن وبلىس اكىمى قۇتتىقتادى.
- مەملەكەت باسشىسى قاسىم-جومارت كەمەلۇلى توقاەۆ ينكليۋزيۆتى سپورت ورتالىقتارىن اشۋ تۋرالى تاپسىرما بەرگەن بولاتىن. سوعان سايكەس بۇگىن ارنايى سپورت كەشەنىنىڭ قۇرىلىسىن باستاپ وتىرمىز. بولاشاقتا بۇل نىسان 22 سپورت تۇرىنەن كاسىبي شەبەرلىكتى جەتىلدىرۋگە مۇمكىندىك بەرەدى. جالپى، ءبىزدىڭ وڭىردە پاراسپورت قارقىندى دامىعان. وبلىس قۇرىلعاننان بەرى پاراسپورتشىلارىمىز ءتۇرلى دەڭگەيدەگى جارىستاردا جالپى سانى 1300-دەن استام مەدال يەلەندى. مەن بارلىق پاراسپورتشىلارعا ءومىردىڭ ءتۇرلى قيىندىقتارىنا مويىماي، سپورتپەن اينالىسىپ، قازاقستاننىڭ اتىن شىعارىپ، كوك تۋىمىزدى جەلبىرەتىپ جۇرگەنى ءۇشىن ۇلكەن العىسىمدى ايتامىن. ءبىز بۇدان بىلاي دا پاراسپورتتى ارى قاراي دامىتۋدى جالعاستىرامىز، - دەگەن بەيبىت يساباەۆ وسى جوباعا قارجىلاي قولداۋ كورسەتكەن «قازاقستان حالقىنا» قوعامدىق قورىنا شىنايى ريزاشىلىعىن ءبىلدىردى.
مۇنان سوڭ ءسوز العان قوردىڭ باسقارما ءتورايىمى ءلاززات شىڭعىسباەۆا بۇل ورتالىقتى سالۋ قولجەتىمدى ورتانى قالىپتاستىرۋ جولىنداعى ماڭىزدى قادام ەكەندىگىن اتاپ ءوتتى.
- ءبىز بۇعان دەيىن استانا جانە قىزىلوردا قالالارىندا وسىنداي ينكليۋزيۆتى سپورت ورتالىقتارىن سالدىق، بۇگىن ءۇشىنشى بولىپ تالدىقورعاندا قۇرىلىسى باستالىپ وتىر. بۇل جەردە تەك سپورتپەن شۇعىلدانۋ عانا ەمەس، سونىمەن قاتار وڭالتۋعا ارنالعان قۇرال-جابدىقتار بولادى، مەديتسينا بولىمدەرى قاراستىرىلادى، ويتكەنى ەرەكشە قاجەتتىلىگى بار ازاماتتار ءۇشىن ونىڭ ءوز بەكىتىلگەن ستاندارتتارى بار. سول سياقتى قوردىڭ قارجىسىنا ۇشتوبەدە سپورت كەشەنى سالىنادى، - دەدى ل. شىڭعىسباەۆا.
بۇدان ءارى ىشىنە كەلەشەك ۇرپاققا ارنالعان امانات حاتى بار ۋاقىت كاپسۋلاسىن سالۋ ءراسىمى اتقارىلدى.
ءوز كەزەگىندە پاراپاۋەرليفتينگىدەن قازاقستان رەسپۋبليكاسىنىڭ ەڭبەك سىڭىرگەن سپورت شەبەرى، ريو پاراليمپيادا ويىندارىنىڭ كۇمىس جۇلدەگەرى، الەم چەمپيوناتىنىڭ جانە قازاقستان رەسپۋبليكاسىنىڭ بىرنەشە دۇركىن چەمپيونى راۋشان قويشىباەۆا:
- مۇنداي قولداۋ بىزگە، سپورتشىلارعا ۇلكەن موتيۆاتسيا بەرەدى، كۇش-جىگەرىمىزدى ەسەلەي تۇسەدى. وسىدان بىرنەشە جىل بۇرىن استاناداعى پاراليمپيادا جاتتىعۋ ورتالىعىنا كىرگەندە كەرەمەت قىزىققان ەدىم. ونداي زالدا سپورتشى بارلىق جاعىنان ىڭعايلى بولعاندىقتان راحاتتانىپ تۇرىپ جاتتىعۋ جاسايدى. سول كەزدە بىزدە قاشان سالىنادى ەكەن دەپ ارمانداپ ەدىم. بۇگىن، مىنە، سول ارمانىمىز ورىندالاتىن كۇنگە دە جەتتىك. ءبىز الداعى ۋاقىتتا دا حالىقارالىق ارەنالاردا بارىمىزدى سالىپ، ەلدىڭ نامىسىن ابىرويمەن قورعاي بەرەمىز، - دەدى ول.
سالتاناتتى شارا سوڭىندا وبلىس اكىمى مەن قور باسشىسى سپورتشىلارمەن تىلدەسىپ، جاڭا كەشەننىڭ مۇمكىندىكتەرى، بۇدان بولەك قولعا الىناتىن باسقا دا جوبالار جايلى بايانداپ بەردى.
جالپى اۋدانى 2 641 م² بولاتىن ينكليۋزيۆتى سپورت كەشەنىندە امبەباپ سپورت زالى، مامانداندىرىلعان جاتتىعۋ الاڭدارى، كۇرەس جانە كۇشتىك دايىندىق زالدارى، وق اتۋ ءتيرى، ساداق اتۋ الاڭى، مەديتسينالىق بلوك، سونداي-اق جاتتىعۋلار، جارىستار مەن وڭالتۋ ءىس-شارالارىن وتكىزۋگە قاجەتتى ينفراقۇرىلىم قاراستىرىلعان. نىسان كەدەرگىسىز ورتا قاعيداتتارىن ەسكەرە وتىرىپ جوبالانعان جانە ءبىر مەزگىلدە 150-گە دەيىن كەلۋشىنى قابىلداي الادى. عيمارات حالىقتىڭ ءجۇرىپ-تۇرۋى شەكتەۋلى توپتارىنا بەيىمدەلگەن جولاۋشىلار ليفتىسىمەن جابدىقتالادى.
جوبانى ىسكە اسىرۋ ەرەكشە قاجەتتىلىكتەرى بار ادامداردىڭ سپورتپەن تۇراقتى تۇردە اينالىسۋعا تارتىلۋىنا، ولاردىڭ فيزيكالىق جانە پسيحولوگيالىق دەنساۋلىعىن نىعايتۋعا، سونداي-اق الەۋمەتتىك بەيىمدەلۋ مەن قوعامدىق ومىرگە قاتىسۋ مۇمكىندىكتەرىن كەڭەيتۋگە ىقپال ەتەدى.
اتاپ وتسەك، قازىرگى تاڭدا وبلىستاعى «دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعى» كمم-ىندە سپورتشىلار سپورتتىڭ 24 تۇرىمەن شۇعىلدانادى. سونىڭ ىشىندە پاراليمپيالىق جانە پاراليمپيالىق ەمەس، سۋردليمپيالىق جانە سۋردليمپيالىق ەمەس، ارنايى وليمپيادا سپورت تۇرلەرى بار. قازىرگى تاڭدا ورتالىقتا 360 سپورتشى جۇيەلى تۇردە سپورتپەن اينالىسادى. ونىڭ ىشىندە 287 سپورتشى - سپورتتىق اتاقتار مەن سپورتتىق رازريادتاردىڭ يەگەرلەرى. سول قاتاردا اۋىر اتلەتيكادان پاراليمپيادا ويىندارىنىڭ كۇمىس جۇلدەگەرى راۋشان قويشىباەۆا، گرەك-ريم كۇرەسىنەن سۋردليمپيادا ويىندارىنىڭ قولا جۇلدەگەرى رامازان ءابدراسىل، پاراپاۋەرليفتينگتەن الەم چەمپيونى راحمەتجان حاماەۆ سياقتى سپورت جۇلدىزدارى بار.
