جەتىسۋ وبلىسىنىڭ اكىمى بەيبىت يساباەۆ قوعام وكىلدەرىمەن جاڭا كونستيتۋتسيانىڭ جوباسىن تالقىلاۋعا ارنالعان جيىن وتكىزدى.
جيىنعا قوعامدىق كەڭەستەر مۇشەلەرى، جەرگىلىكتى ءماسليحاتتار توراعالارى، زيالى قاۋىم وكىلدەرى، ساياسي پارتيالار مەن قوعامدىق ۇيىمدار وكىلدەرى، ءتۇرلى سالا ماماندارى - جالپى جۇزدەن استام ادام قاتىستى. اتاپ وتسەك، جيىنعا وبلىستىق ءماسليحاتتىڭ توراعاسى، كونستيتۋتسيالىق رەفورما جونىندەگى كوميسسيا مۇشەسى، وڭىرلىك كواليتسيا توراعاسىنىڭ ورىنباسارى گۇلنار تويلىباەۆا مودەراتورلىق ەتتى.
جيىننىڭ كىرىسپە سوزىندە بەيبىت يساباەۆ كونستيتۋتسيادا ۇسىنىلىپ وتىرعان وزگەرىستەردىڭ نەگىزىندە جاتقان باستى قاعيداتتارعا توقتالدى.
- اتاپ ايتقاندا، بىرىنشىدەن، پارلامەنت پەن وكىلدى ورگانداردىڭ ءرولىن كۇشەيتۋ. بۇل – بيلىك تارماقتارى اراسىنداعى تەپە-تەڭدىكتى نىعايتۋعا، شەشىمدەردى اشىق ءارى ينستيتۋتسيونالدىق ديالوگ ارقىلى قابىلداۋعا باعىتتالعان قادام. ەكىنشىدەن، ازاماتتاردىڭ مەملەكەتتى باسقارۋ پروتسەسىنە قاتىسۋىن كەڭەيتۋ. قوعامدىق باقىلاۋ تەتىكتەرىن دامىتۋ، جەرگىلىكتى ءوزىن-ءوزى باسقارۋدى كۇشەيتۋ، ازاماتتىق قوعام ينستيتۋتتارىنىڭ شەشىم قابىلداۋ ۇدەرىسىنە ناقتى ىقپال ەتۋىنە جاعداي جاساۋ كوزدەلىپ وتىر. ۇشىنشىدەن، ادام قۇقىقتارى مەن بوستاندىقتارىن نىعايتۋ. كونستيتۋتسيا ءار ازاماتتىڭ قادىر-قاسيەتىن قورعاۋدىڭ ناقتى تەتىگىنە اينالۋى ءتيىس. زاڭ الدىنداعى تەڭدىك، ءادىل سوت تورەلىگى، الەۋمەتتىك قۇقىقتاردىڭ قورعالۋى – بۇل قاعاز جۇزىندەگى ۇران ەمەس، مەملەكەتتىك ساياساتتىڭ وزەكتى مىندەتى. تورتىنشىدەن، جاۋاپتى جانە كۇشتى مەملەكەت قالىپتاستىرۋ. بيلىك قوعام الدىندا ەسەپ بەرەتىن، ينستيتۋتتار اشىق ءارى كاسىبي جۇمىس ىستەيتىن جەردە عانا سەنىم قالىپتاسادى. ال سەنىم – بۇگىنگى تاڭدا ۇلكەن كۇش جانە ستراتەگيالىق دامۋ رەسۋرسى، - دەپ اتاپ ءوتتى ب. يساباەۆ.
بۇدان كەيىن ءسوز العان جيىنعا قاتىسۋشىلار اتا زاڭداعى وزگەرىستەردىڭ ءمان-مازمۇنىن ءار قىرىنان اشىپ، وي-پىكىرلەرىن جەتكىزدى.
- بۇگىندە ەلىمىز دۇرىس باعىتتا دامىپ كەلەدى. ماسەلەن، وبلىس قۇرىلعالى بەرى مادەنيەت سالاسىندا قانشاما نىسان سالىنىپ، جوندەۋدەن ءوتتى، بىزگە الاڭسىز جۇمىس ىستەۋگە بارلىق جاعداي جاسالۋدا. جالپى، كونستيتۋتسياداعى جاڭا وزگەرىستەردىڭ ءبارى حالىق ءۇشىن جاسالىپ وتىر. مەملەكەت باسشىسىنىڭ يگى باستامالارىن ىسكە اسىرۋ، ادال ەڭبەك ەتۋ، ءبىر ماقساتقا جۇمىلۋ – ءبارىمىزدىڭ ورتاق مىندەتىمىز، - دەدى قازاقستاننىڭ حالىق ءارتىسى، ب. ريموۆا اتىنداعى اكادەميالىق دراما تەاترىنىڭ اكتريساسى الماحان كەنجەبەكوۆا.
سول سياقتى ال «ەرلىك» قيمىل قوزعالىسى كەم مۇگەدەكتەر قوعامدىق بىرلەستىگىنىڭ جەتەكشىسى روزا اقجاركەنوۆا رەفەرەندۋمعا كەدەرگىسىز قاتىسۋ ءۇشىن سايلاۋ ۋچاسكەلەرىنىڭ مۇمكىندىگى شەكتەۋلى ازاماتتار ءۇشىن قولجەتىمدى بولۋى ماڭىزدى.
- كونستيتۋتسيالىق رەفورمالاردىڭ نەگىزىندە ءار ادامعا تۇسىنىكتى ءارى جاقىن يدەيا – ادىلدىك، تەڭ مۇمكىندىكتەر مەن ءاربىر ازاماتتىڭ مۇددەسىن قورعاۋ قاعيداتى جاتىر. ءبىزدىڭ جەتىسۋ وڭىرىندە مۇگەدەكتىگى بار ازاماتتاردى قولداۋعا ەرەكشە كوڭىل بولىنگەن. قولجەتىمدى ينفراقۇرىلىم دامىتىلىپ، ء بىلىم الۋ مەن ەڭبەككە ورنالاسۋدا تەڭ جاعداي جاسالىپ، الەۋمەتتىك قىزمەتتەردىڭ ساپاسى ارتىپ كەلەدى. قاراپايىم عانا مىسال: وبلىس قۇرىلعاننان بەرى ينۆاتاكسي سانى 18-دەن 32 بىرلىككە ارتتى. بۇل ارنايى كولىك رەفرەندۋم كۇنى ۇزدىكسىز جۇمىس ىستەيدى. جالپى العاندا، جاڭا كونستيتۋتسيانى قابىلداۋ جونىندەگى الداعى رەفەرەندۋمدى ادىلەتتى ءارى تۇراقتى مەملەكەت قۇرۋ جولىنداعى دەر كەزىندە ءارى سەنىمدى قادام دەپ ەسەپتەيمىن، - دەدى روزا اقجاركەنوۆا.
سول سياقتى ءوز سوزىندە جەتىسۋ وبلىسى قوعامدىق كەڭەسىنىڭ توراعاسى اسەت قىدىرمانوۆ ەڭبەك ادامىنىڭ قۇقىعىن قورعاۋ ماسەلەسى جايلى ايتسا، وبلىستىق كاسىپكەرلەر پالاتاسىنىڭ ديرەكتورى داۋرەن وڭالباەۆ اتا زاڭداعى وزگەرىستەر مەملەكەت پەن كاسىپكەرلەر اراسىنداعى قارىم-قاتىناستى نىعايتا تۇسەتىنىنە توقتالدى. ال جەتىسۋ ۋنيۆەرسيتەتىنىڭ باسقارما توراعاسى-رەكتورى ەرمەك بورىباەۆ جاڭا كونستيتۋتسيا جوباسىندا مادەنيەت پەن بىلىمگە، عىلىم مەن يننوۆاتسياعا سۇيەنەتىن دامۋ مودەلىنە باسىمدىق بەرىلىپ وتىرعانىن تىلگە تيەك ەتتى.
جيىندا جەتىسۋ وبلىسى «اسسامبلەيا جاستارى» رەسپۋبليكالىق قوعامدىق بىرلەستىگىنىڭ توراعاسى ەكاتەرينا پودگورنوۆا دا وي ءبولىستى.
- قازىرگى ساياسي جاڭعىرۋ كەزەڭىندە ءبىز، جەتىسۋ جاستارى، شەتتە قالماي، اتا زاڭىمىزدىڭ جاڭا وزگەرىستەرىمەن بەلسەندى ازامات رەتىندە زەرتتەپ شىقتىق. قازىرگى جاستار – ءبىلىمدى، سانالى، تسيفرلىق الەمدە ەركىن، ءوز ويىن اشىق ايتا الاتىن بۋىن. بۇگىنگى كۇنى جەتىستىككە جەتۋ جولى وتە وڭاي، ەڭ باستىسى قوعامعا پايداڭدى تيگىزىپ، ەلىنە ادال قىزمەت ەتىپ، دامۋ جولىندا ەرىنبەي ەڭبەك ەتۋ ماڭىزدى. ءبىز وزگەرىستەردى قولداپ قانا قويماي، سونىڭ بەلسەندى قاتىسۋشىسى بولۋعا دايىنبىز. كەلەشەك بۇگىننەن باستالادى، - دەدى ول.
وڭىردەگى قوعام وكىلدەرى رەفەرەندۋمعا قاتىسۋ ەلىمىزدىڭ الداعى دامۋىن قالىپتاستىراتىن ماڭىزدى قادام ەكەنىن ايتتى.
جيىندى قورىتىندىلاعان وبلىس اكىمى ب. يساباەۆ:
- ورنىقتى مەملەكەتتەر جاۋاپكەرشىلىككە، ادىلەتتىلىككە، زاڭ ۇستەمدىگىنە جانە ادامعا دەگەن قۇرمەتكە نەگىزدەلەدى. جاڭا كونستيتۋتسيا جوباسى وسى قۇندىلىقتاردى نىعايتۋعا باعىتتالعان. ءبىزدىڭ ورتاق ماقساتىمىز – ادىلەتتى، اشىق ءارى ءتيىمدى مەملەكەت قۇرۋ، - دەدى.
