قازاقستان ورتا ءدالىزدى دامىتۋعا 12 ملرد دوللاردان استام ينۆەستيتسيا سالماق

بۇل تۋرالى ەۋرازيالىق دامۋ بانكىنىڭ (ەادب) ينتەگراتسيالىق زەرتتەۋلەر ورتالىعىنىڭ اعا ساراپشىسى ايدوس وماروۆ «ەۋرازياداعى كولىك دالىزدەرىنىڭ ينفراقۇرىلىمى: دامۋ قورىتىندىلارى جانە نەگىزگى ينۆەستيتسيالىق ۇردىستەر» اتتى پرەزەنتاتسيا بارىسىندا مالىمدەدى.

ساراپشىنىڭ ايتۋىنشا، قازاقستان گەوگرافيالىق ورنالاسۋىنىڭ ارقاسىندا ورتالىق ازياداعى عانا ەمەس، بۇكىل ەۋرازياداعى ءىرى كولىك حابتارىنىڭ بىرىنە اينالىپ وتىر.

ەلىمىزدە كولىك دالىزدەرىنىڭ ينفراقۇرىلىمىن دامىتۋعا ارنالعان شامامەن 55 جوبا بار. ولاردىڭ جيىنتىق قۇنى 32,6 ملرد دوللاردى قۇرايدى. بۇل ورتالىق ازياداعى جالپى ينۆەستيتسيالىق پورتفەلدىڭ جارتىسىنا جۋىعى.

ينۆەستيتسيالاردىڭ ەڭ ۇلكەن بولىگى اۆتوموبيل جولدارىن دامىتۋعا باعىتتالادى. بۇل ماقساتقا شامامەن 22,7 ملرد دوللار قاراستىرىلعان. ال تەمىرجول ينفراقۇرىلىمىن دامىتۋعا 6 ملرد دوللاردان استام قارجى جۇمسالماق.

قازاقستانداعى كولىك ينفراقۇرىلىمى جوبالارى بىرنەشە قارجىلاندىرۋ كوزى ارقىلى ىسكە اسىرىلادى.

اتاپ ايتقاندا، 21 جوبا ۇلتتىق بيۋدجەت ەسەبىنەن قارجىلاندىرىلادى. تاعى 34 جوبا قارىزدىق قارجىلاندىرۋ تەتىگى ارقىلى جۇزەگە اسىرىلسا، 14 جوباعا حالىقارالىق قارجى ينستيتۋتتارى قاتىسادى.

مۇنداي قارجىلاندىرۋ قۇرىلىمى ءىرى ينفراقۇرىلىمدىق جوبالاردى كەزەڭ-كەزەڭىمەن ىسكە اسىرۋعا مۇمكىندىك بەرەدى.

قازاقستانداعى كولىك ينفراقۇرىلىمىن دامىتۋ بىرنەشە ستراتەگيالىق باعىتتى قامتيدى. ولاردىڭ قاتارىندا تراسەكا، ورتالىق ەۋرازيالىق جانە ورتا ءدالىز باعىتتارى بار.

ينۆەستيتسيا كولەمى بويىنشا تراسەكا ءدالىزى الدىڭعى قاتاردا تۇر. بۇل باعىتقا شامامەن 16 ملرد دوللار قاراجات قاجەت. ورتالىق ەۋرازيالىق دالىزگە دە سوعان شامالاس كولەمدە ينۆەستيتسيا سالۋ جوسپارلانعان.

ال ورتا ءدالىزدى دامىتۋعا 12 ملرد دوللاردان استام قارجى باعىتتالماق.

ورتا ءدالىزدىڭ نەگىزگى ارتىقشىلىعى – ازيا مەن ەۋروپانى كاسپي تەڭىزى، كاۆكاز جانە تۇركيا ارقىلى بايلانىستىراتىن بالاما ترانزيتتىك باعىت بولۋى. قازاقستان بۇل ءدالىزدىڭ ماڭىزدى بۋىنى رەتىندە كولىك ينفراقۇرىلىمىن جاڭعىرتۋعا جانە ترانزيتتىك مۇمكىندىكتەرىن ارتتىرۋعا باسىمدىق بەرىپ وتىر.