Фото: Report
Қазақстанда халықаралық көлік дәліздерін дамытуға бағытталған 55 жоба жүзеге асырылмақ. Олардың жалпы инвестициялық құны 32,6 млрд АҚШ долларын құрайды. Соның ішінде Орта дәліз жобаларына 12 млрд доллардан астам қаржы бөлу жоспарланып отыр.
Бұл туралы Еуразиялық даму банкінің (ЕАДБ) Интеграциялық зерттеулер орталығының аға сарапшысы Айдос Омаров «Еуразиядағы көлік дәліздерінің инфрақұрылымы: даму қорытындылары және негізгі инвестициялық үрдістер» атты презентация барысында мәлімдеді.
Сарапшының айтуынша, Қазақстан географиялық орналасуының арқасында Орталық Азиядағы ғана емес, бүкіл Еуразиядағы ірі көлік хабтарының біріне айналып отыр.
Елімізде көлік дәліздерінің инфрақұрылымын дамытуға арналған шамамен 55 жоба бар. Олардың жиынтық құны 32,6 млрд долларды құрайды. Бұл Орталық Азиядағы жалпы инвестициялық портфельдің жартысына жуығы.
Инвестициялардың ең үлкен бөлігі автомобиль жолдарын дамытуға бағытталады. Бұл мақсатқа шамамен 22,7 млрд доллар қарастырылған. Ал теміржол инфрақұрылымын дамытуға 6 млрд доллардан астам қаржы жұмсалмақ.
Қазақстандағы көлік инфрақұрылымы жобалары бірнеше қаржыландыру көзі арқылы іске асырылады.
Атап айтқанда, 21 жоба ұлттық бюджет есебінен қаржыландырылады. Тағы 34 жоба қарыздық қаржыландыру тетігі арқылы жүзеге асырылса, 14 жобаға халықаралық қаржы институттары қатысады.
Мұндай қаржыландыру құрылымы ірі инфрақұрылымдық жобаларды кезең-кезеңімен іске асыруға мүмкіндік береді.
Қазақстандағы көлік инфрақұрылымын дамыту бірнеше стратегиялық бағытты қамтиды. Олардың қатарында ТРАСЕКА, Орталық Еуразиялық және Орта дәліз бағыттары бар.
Инвестиция көлемі бойынша ТРАСЕКА дәлізі алдыңғы қатарда тұр. Бұл бағытқа шамамен 16 млрд доллар қаражат қажет. Орталық Еуразиялық дәлізге де соған шамалас көлемде инвестиция салу жоспарланған.
Ал Орта дәлізді дамытуға 12 млрд доллардан астам қаржы бағытталмақ.
Орта дәліздің негізгі артықшылығы – Азия мен Еуропаны Каспий теңізі, Кавказ және Түркия арқылы байланыстыратын балама транзиттік бағыт болуы. Қазақстан бұл дәліздің маңызды буыны ретінде көлік инфрақұрылымын жаңғыртуға және транзиттік мүмкіндіктерін арттыруға басымдық беріп отыр.
