قۇربانقۇلى بەردىمۇحامەدوۆ قازاقستان پرەزيدەنتىنە جىلى لەبىز جولدادى، دەپ حابارلايدى "ادىرنا" ۇلتتىق پورتالى.
تۇركىمەنستاننىڭ حالىق ءماسليحاتى توراعاسى بەردىمۇحامەدوۆ قازاقستان پرەزيدەنتى قاسىم-جومارت توقاەۆقا بەيرەسمي حابارلاما جولدادى. حابارلاما تۇركىمەنستاندىق كوشباسشىنىڭ ۇشاعى قازاقستان اۋماعى ارقىلى ۇشىپ بارا جاتقان ساتتە جازىلعان.
حاتىندا قازاقستاننىڭ كوكتەمگى تابيعاتىنىڭ كوركەم كورىنىستەرىمەن ءبولىستى. تاۋ-تاس، كولدەر مەن شەكسىز جاسىل دالالاردى ۇشاق تەرەڭىنەن تاماشالاعان ول ۇلى قازاق اقىنى جانە ويشىلى اباي قۇنانباەۆتىڭ ولەڭ جولدارىن كەلتىرگەن.
تۇركىمەنستان باسشىسى حاتىندا قازاق حالقىنا دەگەن دوستىق، باۋىرلاستىق سەزىمىن ءبىلدىرىپ، قازاقستاننىڭ جەتىستىكتەرىنە قۋانىشپەن قارايتىنىن اتاپ ءوتتى.
«قازاقستاننىڭ ءسىز باسشىلىق ەتكەن كەزەڭدەگى ستراتەگيالىق رەفورمالارى مەن وزگەرىستەرىنە باۋىرلاستىق قولداۋىمدى ءبىلدىرۋ ەشقاشان كەش ەمەس»، – دەپ جازدى قۇربانقۇلى بەردىمۇحامەدوۆ.
