رەسەيدەن قازاقستانعا باعىت العان 252 مىڭ دانا تاۋىق جۇمىرتقاسى مىندەتتى ۆەتەريناريالىق قۇجاتتارى بولماعاندىقتان ەل اۋماعىنا وتكىزىلمەدى، دەپ حابارلايدى "ادىرنا" ۇلتتىق پورتالى قازتاگ-قا سىلتەپ.
بۇل تۋرالى اۋىل شارۋاشىلىعى مينيسترلىگىنىڭ ءباسپاسوز قىزمەتى حابارلادى.
وقيعا «جايساڭ» ۆەتەريناريالىق باقىلاۋ بەكەتىندە بولعان. قر اۋىل شارۋاشىلىعى مينيسترلىگى ۆەتەريناريالىق باقىلاۋ جانە قاداعالاۋ كوميتەتىنىڭ اقتوبە وبلىستىق اۋماقتىق ينسپەكتسياسى قىزمەتكەرلەرى رەسەيدەن بايقوڭىر قالاسىنا باعىت العان كولىكتى تەكسەرگەن.
باقىلاۋ بارىسىندا تاسىمالدانعان جۇمىرتقا پارتياسىنا قاجەتتى ۆەتەريناريالىق ىلەسپە قۇجاتتاردىڭ جوق ەكەنى انىقتالعان.
وسى فاكتى بويىنشا ءتيىستى اكت تولتىرىلىپ، اكىمشىلىك قۇقىق بۇزۋشىلىق تۋرالى حاتتاما راسىمدەلدى.
مينيسترلىك مالىمەتىنشە، 252 مىڭ دانا جۇمىرتقا تيەلگەن پارتيا رەسەيگە كەرى قايتارىلعان. تاسىمالداۋشىعا ۆەتەريناريالىق زاڭناما تالاپتارى جانە باقىلاۋداعى ونىمدەردى مەملەكەتتىك شەكارا ارقىلى وتكىزۋ ءتارتىبى ءتۇسىندىرىلدى.
