تۇركيادان قازاقستانعا الاياقتىق جاسادى دەگەن كۇدىككە ءىلىنىپ، حالىقارالىق ىزدەۋدە جۇرگەن ەر ادام دەپورتاتسيالاندى، دەپ حابارلايدى "ادىرنا" ۇلتتىق پورتالى.
قۇقىق قورعاۋ ورگاندارىنىڭ مالىمەتىنشە، كۇدىكتى قازاقستان ءىىم ۇلتتىق ورتالىق بيۋروسىنىڭ ينتەرپول ارقىلى جولداعان سۇراۋى نەگىزىندە تۇركيانىڭ سامسۋن قالاسىندا ۇستالعان. ونى ەلگە قايتارۋ جۇمىستارى قازاقستان ءىىم-ءنىڭ تۇركياداعى وكىلدىگى مەن قازاقستان ەلشىلىگىنىڭ قولداۋىمەن جۇزەگە اسىرىلعان. تەرگەۋ نۇسقاسىنا سايكەس، كۇدىكتى 2024 جىلدىڭ قىركۇيەگى مەن جەلتوقسانى ارالىعىندا Instagram الەۋمەتتىك جەلىسىندەگى اككاۋنت پەن اقپاراتتىق جۇيەلەردى پايدالانىپ، اتىراۋ قالاسىنىڭ ەكى تۇرعىنىن الداپ، ولاردىڭ اقشاسىن يەمدەنگەن. كەلتىرىلگەن جالپى ماتەريالدىق شىعىن كولەمى 3 ميلليون تەڭگەدەن اسادى.
قازىر كۇدىكتى قازاقستانعا جەتكىزىلىپ، وعان قاتىستى تەرگەۋ امالدارى جالعاسىپ جاتىر. سونداي-اق ونىڭ وسىعان ۇقساس وزگە دە قىلمىستارعا قاتىسى بار-جوعى تەكسەرىلۋدە.
