بۇگىن قىزىلوردادا قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆتىڭ «ادىلەتتى قوعامعا – شىنشىل ءسوز» اتتى كىتابىن تالقىلاۋعا ارنالعان وڭىرلىك دوڭگەلەك ۇستەل ءوتتى.
القالى جيىندى وبلىس اكىمىنىڭ ورىنباسارى مەيرامبەك شەرماعانبەت جۇرگىزدى. وعان زيالى قاۋىم، مەملەكەت جانە قوعام قايراتكەرلەرى، عىلىمي-اكادەميالىق ورتا وكىلدەرى، زاڭگەرلەر مەن بەلسەندى جاستار قاتىستى.
جيىندا مەملەكەت باسشىسىنىڭ ەڭبەگىندە كوتەرىلگەن نەگىزگى تاقىرىپتار، قوعامدىق-ساياسي، الەۋمەتتىك، رۋحاني-ادامگەرشىلىك ماسەلەلەر مەن ەل دامۋىنىڭ ستراتەگيالىق باعىتتارى جان-جاقتى تالقىلاندى.
مەملەكەت جانە قوعام قايراتكەرى مۇرات باقتيارۇلى «ادىلەتتى قازاقستان، تازا قازاقستان، حالىقارالىق ساياسات» اتتى بايانداماسىندا ەلىمىزدەگى جۇيەلى رەفورمالار، قوعامدىق جاۋاپكەرشىلىك جانە ەكولوگيالىق باستامالاردىڭ ءوزارا ساباقتاستىعىنا توقتالدى.
قورقىت اتا اتىنداعى قىزىلوردا ۋنيۆەرسيتەتىنىڭ باسقارما توراعاسى – رەكتورى، وبلىستىق قوعامدىق كەڭەس توراعاسى ناۋرىزباي بايقاداموۆ ءوز بايانداماسىندا باسەكەگە قابىلەتتى ۇلت قالىپتاستىرۋداعى ساپالى ءبىلىم، عىلىم مەن ءتيىمدى مەملەكەتتىك باسقارۋدىڭ ماڭىزىن اتاپ ءوتتى.
قازاقستان جازۋشىلار وداعى وبلىستىق فيليالىنىڭ توراعاسى قارشىعا ەسىمسەيىتوۆا «تاريح، مادەنيەت جانە رۋحانيات تۋرالى پايىمدار» تاقىرىبىندا ۇلتتىق قۇندىلىقتاردى ساقتاۋ، تاريحي سانانى جاڭعىرتۋ جانە رۋحاني ساباقتاستىق ماسەلەلەرىن ورتاعا سالدى.
قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسى قىزىلوردا وبلىسى بويىنشا فيليالىنىڭ ديرەكتورى، زاڭ عىلىمدارىنىڭ كانديداتى اقزادا ماداليەۆا «كونستيتۋتسيا جانە زاڭ مەن ءتارتىپ» تاقىرىبىنداعى بايانداماسىندا قۇقىقتىق مەملەكەتتى نىعايتۋ، زاڭ ۇستەمدىگىن قامتاماسىز ەتۋ جانە ازاماتتىق جاۋاپكەرشىلىكتى ارتتىرۋ ماسەلەلەرىن سارالادى.
قورقىت اتا اتىنداعى قىزىلوردا ۋنيۆەرسيتەتىنىڭ فيلوسوفيا دوكتورى (PhD) سەرىكحان جۇزەەۆ «جاستارعا ارنالعان ويلار: ءبىلىم، ەڭبەك، جاۋاپكەرشىلىك جانە بولاشاق» تاقىرىبىندا ءسوز سويلەپ، جاس ۇرپاقتىڭ بويىندا بىلىمگە ۇمتىلىس، ەڭبەكقورلىق، وتانشىلدىق جانە جاۋاپكەرشىلىك قۇندىلىقتارىن قالىپتاستىرۋدىڭ ماڭىزىن اتاپ ءوتتى.
دوڭگەلەك ۇستەلگە قاتىسۋشىلار مەملەكەت باسشىسىنىڭ ەڭبەگىندەگى ادىلەتتىلىك، زاڭ ۇستەمدىگى، اشىقتىق، ادال ەڭبەك پەن جاۋاپكەرشىلىك قاعيداتتارىنىڭ قوعام دامۋىنداعى ماڭىزىن جان-جاقتى تالقىلادى.
پىكىر الماسۋ كەزىندە «زاڭ مەن ءتارتىپ» قاعيداتىن قوعامدىق سانادا ورنىقتىرۋ، ۇلتتىق رۋحانياتتى دامىتۋ، ءبىلىم مەن عىلىمنىڭ بەدەلىن ارتتىرۋ، جاستاردى ادال ەڭبەك پەن ازاماتتىق جاۋاپكەرشىلىككە باۋلۋ بويىنشا ۇسىنىستار ايتىلدى.
جيىن مەملەكەت باسشىسىنىڭ ەڭبەگىندە كوتەرىلگەن باستامالار مەن قۇندىلىقتاردى قوعامدا كەڭىنەن ناسيحاتتاۋعا، ەل بولاشاعىنا قاتىستى وزەكتى ماسەلەلەر توڭىرەگىندە مازمۇندى پىكىر الماسۋعا مۇمكىندىك بەرگەن ماڭىزدى ديالوگ الاڭىنا اينالدى.
