Bügın Qyzylordada Qazaqstan Respublikasynyŋ Prezidentı Qasym-Jomart Kemelūly Toqaevtyŋ «Ädılettı qoǧamǧa – şynşyl söz» atty kıtabyn talqylauǧa arnalǧan öŋırlık döŋgelek üstel öttı.
Alqaly jiyndy oblys äkımınıŋ orynbasary Meirambek Şermaǧanbet jürgızdı. Oǧan ziialy qauym, memleket jäne qoǧam qairatkerlerı, ǧylymi-akademiialyq orta ökılderı, zaŋgerler men belsendı jastar qatysty.
Jiynda Memleket basşysynyŋ eŋbegınde köterılgen negızgı taqyryptar, qoǧamdyq-saiasi, äleumettık, ruhani-adamgerşılık mäseleler men el damuynyŋ strategiialyq baǧyttary jan-jaqty talqylandy.
Memleket jäne qoǧam qairatkerı Mūrat Baqtiiarūly «Ädılettı Qazaqstan, Taza Qazaqstan, halyqaralyq saiasat» atty baiandamasynda elımızdegı jüielı reformalar, qoǧamdyq jauapkerşılık jäne ekologiialyq bastamalardyŋ özara sabaqtastyǧyna toqtaldy.
Qorqyt ata atyndaǧy Qyzylorda universitetınıŋ basqarma töraǧasy – rektory, oblystyq qoǧamdyq keŋes töraǧasy Nauryzbai Baiqadamov öz baiandamasynda bäsekege qabılettı ūlt qalyptastyrudaǧy sapaly bılım, ǧylym men tiımdı memlekettık basqarudyŋ maŋyzyn atap öttı.
Qazaqstan Jazuşylar odaǧy oblystyq filialynyŋ töraǧasy Qarşyǧa Esımseiıtova «Tarih, mädeniet jäne ruhaniiat turaly paiymdar» taqyrybynda ūlttyq qūndylyqtardy saqtau, tarihi sanany jaŋǧyrtu jäne ruhani sabaqtastyq mäselelerın ortaǧa saldy.
Qazaqstan Respublikasy Prezidentı janyndaǧy Memlekettık basqaru akademiiasy Qyzylorda oblysy boiynşa filialynyŋ direktory, zaŋ ǧylymdarynyŋ kandidaty Aqzada Madalieva «Konstitusiia jäne Zaŋ men Tärtıp» taqyrybyndaǧy baiandamasynda qūqyqtyq memlekettı nyǧaitu, zaŋ üstemdıgın qamtamasyz etu jäne azamattyq jauapkerşılıktı arttyru mäselelerın saralady.
Qorqyt ata atyndaǧy Qyzylorda universitetınıŋ filosofiia doktory (PhD) Serıkhan Jüzeev «Jastarǧa arnalǧan oilar: bılım, eŋbek, jauapkerşılık jäne bolaşaq» taqyrybynda söz söilep, jas ūrpaqtyŋ boiynda bılımge ūmtylys, eŋbekqorlyq, otanşyldyq jäne jauapkerşılık qūndylyqtaryn qalyptastyrudyŋ maŋyzyn atap öttı.
Döŋgelek üstelge qatysuşylar Memleket basşysynyŋ eŋbegındegı ädılettılık, zaŋ üstemdıgı, aşyqtyq, adal eŋbek pen jauapkerşılık qaǧidattarynyŋ qoǧam damuyndaǧy maŋyzyn jan-jaqty talqylady.
Pıkır almasu kezınde «Zaŋ men Tärtıp» qaǧidatyn qoǧamdyq sanada ornyqtyru, ūlttyq ruhaniiatty damytu, bılım men ǧylymnyŋ bedelın arttyru, jastardy adal eŋbek pen azamattyq jauapkerşılıkke baulu boiynşa ūsynystar aityldy.
Jiyn Memleket basşysynyŋ eŋbegınde köterılgen bastamalar men qūndylyqtardy qoǧamda keŋınen nasihattauǧa, el bolaşaǧyna qatysty özektı mäseleler töŋıregınde mazmūndy pıkır almasuǧa mümkındık bergen maŋyzdy dialog alaŋyna ainaldy.
