اقش قازاقستان ۇكىمەتىمەن جەر ۋچاسكەسىن الۋعا كەلىسىم جاساسقانى ءمالىم بولدى، دەپ حابارلايدى "ادىرنا" ۇلتتىق پورتالى.
قازتاگ مالىمەتىنشە، الماتى قالاسىنان 49 جىلعا جەردى جالعا الۋ جوباسى ماقۇلدانعان.
«قازاقستان رەسپۋبليكاسىنىڭ ۇكىمەتى مەن امەريكا قۇراما شتاتتارىنىڭ ۇكىمەتى اراسىنداعى امەريكا قۇراما شتاتتارىنىڭ ۇكىمەتىنە الماتى قالاسىنداعى اقش-تىڭ كونسۋلدىق مەكەمەسىنىڭ عيماراتىن سالۋ ءۇشىن جەر ۋچاسكەسىن جالعا بەرۋ تۋرالى كەلىسىمنىڭ جوباسى ماقۇلدانسىن»، – دەلىنگەن قازاقستان ۇكىمەتىنىڭ قاۋلىسىندا.
كەلىسىم جوباسىنا سايكەس قازاقستان ۇكىمەتى اقش ۇكىمەتىنە جاماقاەۆا كوشەسى، ءال-فارابي داڭعىلى، سەيفۋللين داڭعىلى، الدارا كوسە كوشەسىنىڭ اراسىندا ورنالاسقان جەر ۋچاسكەسىن جالعا بەرەدى. ۋچاسكە اۋدانى – 70 593 شارشى مەتر.
«باستاپقى 49 جىلدىق جالداۋ مەرزىمى جانە بارلىق كەيىنگى 49 جىلدىق جاڭارتۋ كەزەڭدەرى ءۇشىن جەردى جالعا الۋ اقىسى (جالپى ۇزاقتىعىنا شەكتەۋسىز) $25 301 016 قۇرايدى جانە وسى كەلىسىم كۇشىنە ەنگەن كۇننەن باستاپ 30 كۇنتىزبەلىك كۇن ىشىندە ءبىر رەتتىك تولەممەن تولەنەدى»، – دەلىنگەن كەلىسىم جوباسىندا.
اقش پەن قازاقستان ەكونوميكالىق تۇرعىدان سەرىكتەس ەلدەر. 2024 جىلدىڭ ءبىرىنشى جارتىجىلدىعىندا قازاقستاننان اقش-قا جىبەرىلگەن تاۋار كولەمى 888,8 ميلليون دوللارعا جەتكەنى حابارلاندى.
