قازاقستاندا ماتەريالدىق جاعدايى تۇراقتى ازاماتتار مەملەكەتتىك جاردەماقىلاردان ءوز ەركىمەن باس تارتۋ تۋرالى شەشىمدەرىن الەۋمەتتىك جەلىلەردە جاريالاۋدا. ولار مەملەكەت تاراپىنان كورسەتىلگەن قولداۋعا العىس ءبىلدىرىپ، الەۋمەتتىك كومەكتىڭ شىن مانىندە مۇقتاج وتباسىلارعا باعىتتالۋى ماڭىزدى ەكەنىن اتاپ وتۋدە.
كوپبالالى انا جانات الەۋمەتتىك جەلىدەگى جازباسىندا مەملەكەتتەن بەرىلەتىن جاردەماقىنىڭ وتباسى ءۇشىن، اسىرەسە بالالارى كىشكەنتاي كەزىندە، ۇلكەن كومەك بولعانىن جەتكىزگەن. قازىرگى ۋاقىتتا بالالارى ءوسىپ، وتباسىنىڭ جاعدايى جاقسارعانىن ايتقان ول كەيبىر تولەمدەردىڭ توقتاۋىنا قارسىلىق بىلدىرمەيتىنىن اتاپ وتكەن. ونىڭ پىكىرىنشە، بالانى دۇنيەگە اكەلۋدەگى باستى ماقسات جاردەماقى الۋ ەمەس، ۇرپاق جالعاستىرىپ، بالالاردى امان-ەسەن ءوسىرىپ، جاقسى ازامات ەتىپ تاربيەلەۋ.
سونداي-اق لەسحان شايمەرجەنوۆ Facebook الەۋمەتتىك جەلىسىندەگى جازباسىندا قازىرگى جاعدايىنىڭ جاقسى ەكەنىن ايتىپ، الىپ جۇرگەن جەكەلەگەن مەملەكەتتىك جاردەماقىلاردان ءوز ەركىمەن باس تارتۋ تۋرالى شەشىم قابىلداعانىن حابارلادى. ول وسى ۋاقىتقا دەيىن كورسەتىلگەن كومەك ءۇشىن العىس ءبىلدىرىپ، ء«ار نارسەنىڭ ءوز رەتى بار. ەلىمىز امان بولسىن!» دەپ جازعان.
اتالعان ازاماتتاردىڭ جازبالارى قوعامداعى الەۋمەتتىك جاۋاپكەرشىلىك پەن ءوزارا قولداۋ ماسەلەسىن كۇن تارتىبىنە شىعارۋدا. ولاردىڭ ۇستانىمى بويىنشا، وتباسىنىڭ ماتەريالدىق جاعدايى ءوز قاجەتتىلىكتەرىن ءوز بەتىنشە قامتاماسىز ەتۋگە مۇمكىندىك بەرسە، مەملەكەتتىك قولداۋدان باس تارتۋ ارقىلى كومەككە مۇقتاج ازاماتتارعا باسىمدىق بەرۋگە بولادى.
سونىمەن قاتار زاڭنامادا بەلگىلەنگەن تالاپتارعا سايكەس جاردەماقى الۋعا قۇقىعى بار ازاماتتاردىڭ مەملەكەتتىك قولداۋدى پايدالانۋى زاڭدى ەكەنىن اتاپ وتكەن ءجون. ال تولەمدەردەن ءوز ەركىمەن باس تارتۋ – ءار ازاماتتىڭ جەكە شەشىمى. مۇنداي باستامالار قوعامداعى الەۋمەتتىك ىنتىماقتاستىق پەن ازاماتتىق جاۋاپكەرشىلىكتىڭ ماڭىزىن كورسەتەدى.
