ءسۇيىنشى! ارال ايدىنىڭ اۋدانى كەڭىپ، سۋى مولايدى. 2023 جىلعى قاڭتار-اقپاندا تەڭىزگە 800 ميلليون تەكشە مەتر سۋ تۇسكەن. بۇل كورسەتكىش بىلتىر جىل بويعى كورسەتكىشكە پارا-پار، دەپ سۇيىنشىلەيدى "ادىرنا" ۇلتتىق پورتالى.
...بۇل ولكە قالايشا بولادى ازاپ تۇنەگى،
ەجەلگى مۇڭ-زارىڭ از با ەدى، قازاقتىڭ ەلى؟
قايتەمىن، ارالىم، بۇگىندە قالدى سۇلدەرىڭ،
ءتوزىمى ەلىنە ۇقساعان كونبىسىم مەنىڭ، - دەپ اقىن مۇحتار شاحانوۆ جىرعا قوسقان ارال تاعدىرىنا قاتىستى قۋانتارلىق اقپار حابارلاندى.
قىزىلوردا وبلىسى اكىمدىگىنىڭ حابارلاۋىنشا, ارال تەڭىزىنىڭ دەڭگەيى 2022 جىلدىڭ قازان ايىمەن سالىستىرعاندا 48 سانتيمەترگە ارتقان. 2022 جىل بويى ارال تەڭىزىنە 816 ميلليون تەكشە مەتر سۋ قۇيىلسا، 2023 جىلعى ەكى ايدىڭ وزىندە 803 ميلليون سۋ تۇسكەن.
"ارال-سىرداريا باسسەيندىك ينسپەكتسياسى باسشىسىنىڭ مىندەتىن اتقارۋشى زەينۋللا قازتوعانوۆ حابارلاعانداي، وسى ۋاقىتقا دەيىن سولتۇستىك ارال تەڭىزىنە جينالعان سۋ كولەمى 27,0 ملرد.تەكشە مەتردەن، 18,5 ملرد تەكشە مەترگە ازايىپ، سۋ دەڭگەيى 40,42 مبج (مەتر بالتىق جۇيەسىمەن) دەيىن تومەندەگەن بولاتىن. 2022 جىلدىڭ قازان ايىنان باستاپ بۇگىنگى تاڭعا تەڭىزدەگى سۋ دەڭگەيى 40,90 مبج (48 سانتيمەتر) كوتەرىلىپ، جينالعان سۋ كولەمى 19,7 ملرد تەكشە مەترگە ۇلعايدى", – دەپ جازىلعان قىزىلوردا وبلىسى اكىمدىگىنىڭ حابارلاماسىندا.
"ادىرنا" ۇلتتىق پورتالى
