قىزىلوردا قالاسىن ىستىق سۋمەن قامتاماسىز ەتۋ جوباسى ءساتتى جۇزەگە اسىرىلۋدا. بۇگىندە 187 ءۇي ىستىق سۋعا قوسىلدى. كەلەسى جىلۋ بەرۋ ماۋسىمىنا دەيىن وبلىس ورتالىعىنىڭ كوپقاباتتى تۇرعىن ۇيلەرىنىڭ بارلىعىنا ىستىق سۋ بەرىلەدى. بۇل تۋرالى قىزىلوردا وبلىسى اكىمىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
بۇل تۋرالى مەملەكەت باسشىسى قاسىم-جومارت توقاەۆتىڭ توراعالىعىمەن وتكەن ۇكىمەتتىڭ كەڭەيتىلگەن وتىرىسىندا وبلىس اكىمى نۇرلىبەك نالىباەۆ اتاپ ءوتتى.
مەملەكەت باسشىسىنىڭ قولداۋىمەن ايماقتا ماڭىزدى جوبالار جۇزەگە اسۋدا. تۇركيالىق ينۆەستور «اكسا ەنەردجي» كومپانياسى قولعا العان قۋاتى 240 مەگاۆاتتىق جاڭا جىلۋ-ەلەكتر ورتالىعى قۇرىلىسىنىڭ 70 پايىزى اياقتالدى. نىسان قىركۇيەك ايىندا پايدالانۋعا بەرىلەدى. جاڭا ستانتسيا وبلىس ورتالىعىن جىلۋمەن، ايماقتى ەلەكتر ەنەرگياسىمەن تولىق قامتاماسىز ەتەدى. وندىرىلگەن ەلەكتر ەنەرگياسىنىڭ ارتىلعان بولىگىن وزگە وڭىرلەرگە ساتۋعا مۇمكىندىك بەرەدى.
«قىزىلوردا-جەزقازعان» اۆتوموبيل جولىن قايتا جاڭعىرتۋ جۇمىستارى 2022 جىلى باستاۋ العانى بەلگىلى. رەسپۋبليكالىق ماڭىزى بار جولدىڭ وبلىس اۋماعىنداعى 216 شاقىرىمىنىڭ 151 شاقىرىمى پايدالانۋعا بەرىلدى. جوبا بيىل تولىق اياقتالادى.
سونداي-اق، قىزىلوردا قالاسىنان اقتوبە وبلىسىنىڭ شەكاراسىنا دەيىنگى 566 شاقىرىم جولدى ءى ساناتقا اۋىستىرۋ وسى جىلى باستالادى. قازىرگى تاڭدا، دەمەۋشىلىكپەن 350 ملن تەڭگەگە تەحنيكا-ەكونوميكالىق نەگىزدەمەسى ازىرلەندى.
