قىزىلوردا وبلىسىنىڭ اكىمى نۇرلىبەك نالىباەۆقا جاڭا ورىنباسار كەلدى، دەپ حابارلايدى «ادىرنا» ءتىلشىسى.
«قازاقستان رەسپۋبليكاسى پرەزيدەنتى اكىمشىلىگىنىڭ كەلىسىمى بويىنشا وبلىس اكىمىنىڭ وكىمىمەن شەرماعانبەت مەيرامبەك زينابدينۇلى وبلىس اكىمىنىڭ ورىنباسارى لاۋازىمىنا تاعايىندالدى»،—دەلىنگەن اكىمدىك حابارلاماسىەدا.
مەيرامبەك زينابدينۇلى بۇعان دەيىن اتقارىپ كەلگەن قازالى اۋدانىنىڭ اكىمى قىزمەتىنەن بوساتىلدى.
مەيرامبەك شەرماعانبەت 1972 جىلى 25 جەلتوقساندا قىزىلوردا وبلىسى، جاڭاقورعان اۋدانىندا دۇنيەگە كەلگەن. قورقىت اتا اتىنداعى قىزىلوردا مەملەكەتتىك ۋنيۆەرسيتەتىن "تاريح", "ەكونوميكا" ماماندىقتارى بويىنشا، قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىن "قۇقىقتانۋ" ماماندىعى بويىنشا بىتىرگەن، پەداگوگيكا عىلىمدارىنىڭ كانديداتى.
ەڭبەك جولىن 1994 جىلى جاڭاقورعان اۋدانىنداعى №239 مەكتەپتە تاريح ءپانىنىڭ مۇعالىمى بولىپ باستاعان. 2001-2016 جىلدارى جاڭاقورعان اۋدانى اكىمى اپپاراتىنىڭ باسشىسى، وبلىس اكىمى اپپاراتى باسشىسىنىڭ ورىنباسارى، وبلىستىق ءبىلىم، تىلدەردى دامىتۋ باسقارمالارىنىڭ باسشىسى، قىزىلوردا وبلىسى بويىنشا ءبىلىم سالاسىنداعى باقىلاۋ باسقارماسىنىڭ باسشىسى قىزمەتتەرىن ابىرويمەن اتقاردى.
