بۇگىن قىزىلوردا وبلىسىنىڭ اكىمى نۇرلىبەك نالىباەۆتىڭ توراعالىعىمەن كونستيتۋتسيالىق رەفورمالار جونىندەگى وڭىرلىك اكتيۆ وتىرىسى ءوتتى. وعان ءماسليحات دەپۋتاتتارى، قۇقىق قورعاۋ ورگاندارىنىڭ، باسقارمالار مەن اۋماقتىق دەپارتامەنتتەردىڭ باسشىلارى، قوعامدىق كەڭەستىڭ مۇشەلەرى، زيالى قاۋىم، بۇقارالىق اقپارات قۇرالدارىنىڭ وكىلدەرى قاتىستى.
مەملەكەت باسشىسىنىڭ باستاماسىمەن ەلىمىزدە جاڭا اتا زاڭنىڭ جوباسى ازىرلەندى. وسى ماقساتتا 130 ادامنان تۇراتىن كونستيتۋتسيالىق كوميسسيا قۇرىلدى. ءبىر اپتاعا جۋىق جۇمىس جاساعان كوميسسيا جەكە ازاماتتاردان، ساياسي پارتيالاردان، قوعامدىق ۇيىمدار مەن ساراپشىلاردان تۇسكەن ۇسىنىستاردى ەگجەي-تەگجەيلى تالدادى.
اشىق قوعامدىق تالقىلاۋلاردىڭ، جاڭا نورمالار مەن ەرەجەلەردى جان-جاقتى ءارى تياناقتى پىسىقتاۋدىڭ ناتيجەسىندە اتا زاڭنىڭ جاڭا جوباسى ازىرلەنىپ، بۇقارالىق اقپارات قۇرالدارىندا جاريالاندى.
ايماق باسشىسى جاڭا كونستيتۋتسيا جوباسىنىڭ ماڭىزدىلىعىنا توقتالىپ، سىر ءوڭىرى جۇرتشىلىعىن بۇل باستاماعا جوعارى جاۋاپكەرشىلىكپەن، بەلسەندى اتسالىسۋعا شاقىردى.
«مەملەكەت باسشىمىز قاسىم-جومارت كەمەلۇلى 2025 جىلعى 8 قىركۇيەكتە حالىققا ارناعان جولداۋىندا قازاقستاندا ءبىر پالاتالى پارلامەنت قۇرۋ جونىندە باستاما كوتەردى. بۇل ۇسىنىس كونستيتۋتسيالىق رەفورمانى جۇزەگە اسىرۋعا نەگىز بولىپ، پارلامەنتتىك رەفورما جونىندەگى ارنايى جۇمىس توبى قۇرىلدى.
قازان ايىنان بەرى ەلىمىزدەگى ساياسي پارتيالاردان، ساراپشىلاردان، ساياسي-قوعامدىق ينستيتۋتتاردان، ۇكىمەتتىك ەمەس ۇيىمداردان، ازاماتتارىمىزدان پارلامەنتتىك رەفورماعا قاتىستى ۇسىنىستار جيناقتالدى.
مەملەكەت باسشىمىز سىر وڭىرىندە وتكەن ۇلتتىق قۇرىلتايدىڭ قورىتىندى بەسىنشى وتىرىسىندا جۇمىس توبىنىڭ ۇسىنىستارىن نەگىزگە الا وتىرىپ، قازاقستاننىڭ الداعى ساياسي باعىت-باعدارىن ايقىنداپ بەردى.
پرەزيدەنتىمىز قۇرىلتايدا ەلىمىزدەگى بۇعان دەيىنگى اۋقىمدى ساياسي رەفورمالارىنىڭ جالعاسى رەتىندە كونستيتۋتسيالىق رەفورماعا قاتىستى ءوز ۇستانىمدارىن جەتكىزدى. ەل تاريحىنداعى ماڭىزدى شەشىمدەردى ۇسىندى.
جاڭا اتا زاڭنىڭ جوباسىنداعى بىرقاتار باپتار مەن بولىمدەردىڭ مازمۇنى تۇتاس كونستيتۋتسيالىق مودەلدى ايتارلىقتاي جاڭعىرتۋعا، ساياسي-قوعامدىق ينستيتۋتتاردى جەتىلدىرۋگە، ازاماتتاردىڭ قۇقىقتارى مەن بوستاندىقتارىن قورعاۋ تەتىكتەرىن كۇشەيتۋگە نەگىز بولادى. بۇل – ەل تاريحىنداعى ماڭىزدى ءارى تاعدىرلى قادام بولماق»، – دەدى ن.نالىباەۆ.
جيىندا قر پارلامەنتى سەناتىنىڭ جانىنداعى سەناتورلار كەڭەسىنىڭ مۇشەسى، قىزىلوردا وبلىسىنىڭ قۇرمەتتى ازاماتتارى بەكمىرزا قايىپۇلى مەن مۇرات باقتيارۇلى، وبلىس پروكۋرورى ريزابەك كارىمۇلى، وبلىستىق ءماسليحاتتىڭ توراعاسى، كونستيتۋتسيالىق كوميسسيانىڭ مۇشەسى مۇرات جولكەلدىۇلى، قازاقستاننىڭ ەڭبەك ەرى، كونستيتۋتسيالىق كوميسسيانىڭ مۇشەسى يمامزادا قۋانىشبايۇلى ءوز ۇسىنىس-پىكىرلەرىن ءبىلدىردى.
