ۇلى وتان سوعىسى جىلدارىندا مەكتەپ عيماراتىندا فرۋنزە جاياۋ اسكەر ۋچيليششەسى ورنالاسقان.
80 جىلدان استام تاريحى بار بىشكەكتەگى كەمەل توقاەۆ اتىنداعى №33 مەكتەپ-گيمنازياسى - ءبىلىم ورداسىنىڭ تاريحى قازاقستان مەن قىرعىزستاننىڭ ورتاق تاريحىنداعى بىرنەشە ماڭىزدى كەزەڭمەن ساباقتاسىپ جاتىر.
№33 مەكتەپ-گيمنازياسى بىشكەكتەگى ەڭ كونە ءبىلىم بەرۋ مەكەمەلەرىنىڭ ءبىرى سانالادى. ونىڭ عيماراتى 1940 جىلى سالىنعان جانە قالالىق ماڭىزى بار تاريحي ەسكەرتكىش مارتەبەسىنە يە.
ۇلى وتان سوعىسى جىلدارىندا بۇل عيماراتتا فرۋنزە جاياۋ اسكەر ۋچيليششەسى ورنالاسقان. ءدال وسى جەردە قازاق جازۋشىسى، مايدانگەر كەمەل توقاەۆ پەن راحىمجان قوشقارباەۆ اسكەري دايىندىقتان وتكەن.
سوعىستان كەيىن، 1947 جىلعى 1 قىركۇيەكتە مەكتەپ ءبىلىم بەرۋ مەكەمەسى رەتىندە قايتا جۇمىسىن باستادى. كەيىنگى ونجىلدىقتاردا ول تولىق ەمەس ورتا مەكتەپتەن مەكتەپ-گيمنازياعا دەيىنگى جولدان ءوتتى. 2012 جىلى ءبىلىم بەرۋ مەكەمەسىنە رەسمي تۇردە گيمنازيا مارتەبەسى بەرىلدى.
بۇگىندە مەكتەپ بىشكەكتىڭ سۆەردلوۆ اۋدانىندا ورنالاسقان جانە قالاداعى بەلگىلى ءبىلىم بەرۋ مەكەمەلەرىنىڭ ءبىرى رەتىندە جۇمىسىن جالعاستىرىپ كەلەدى.
نەلىكتەن مەكتەپكە كەمەل توقاەۆتىڭ ەسىمى بەرىلدى؟
ايتا كەتەيىك، مەكتەپكە كەمەل توقاەۆتىڭ ەسىمى 2025 جىلعى مامىردا قىرعىزستان پرەزيدەنتى سادىر جاپاروۆتىڭ باستاماسىمەن بەرىلدى.
مۇنداي شەشىم عيماراتتىڭ تاريحىمەن بايلانىستى. ۇلى وتان سوعىسى جىلدارىندا كەمەل توقاەۆ وسى جەردە فرۋنزە جاياۋ اسكەر ۋچيليششەسىندە دايىندىقتان ءوتىپ، كەيىن مايدانعا اتتانعان.
كەمەل توقاەۆ 1923 جىلى دۇنيەگە كەلگەن. ول ۇلى وتان سوعىسىنا قاتىسىپ، كەيىن بەلگىلى قازاق جازۋشىسى ءارى قازاق ادەبيەتىندەگى دەتەكتيۆ جانرىنىڭ نەگىزىن قالاۋشىلاردىڭ ءبىرى بولدى.
سوعىس تۋرالى ەستەلىك
2024 جىلعى مامىردا مۇندا راحىمجان قوشقارباەۆ پەن كەمەل توقاەۆقا ارنالعان پاتريوتتىق بۇرىش اشىلدى. وندا ءبىلىم بەرۋ مەكەمەسىنىڭ تاريحى، قازاقستاندىقتاردىڭ ءومىربايانى مەن مايدانداعى جاۋىنگەرلىك جولى تۋرالى ماتەريالدار ۇسىنىلعان.
سول كەزدە مەكتەپتە قازاقستاننان اكەلىنگەن ارحيۆ قۇجاتتارى مەن كىتاپتار كورمەسى دە ۇيىمداستىرىلدى.
وسىلايشا، مەكتەپتىڭ تاريحى تەك ءبىلىم بەرۋمەن عانا ەمەس، ۇلى وتان سوعىسى وقيعالارى تۋرالى تاريحي جادتى ساقتاۋمەن دە بايلانىستى.
قازاقستانمەن بايلانىس
سوڭعى جىلدارى №33 مەكتەپ-گيمنازياسى قازاقستانمەن بايلانىستى بەلسەندى دامىتىپ كەلەدى.
بۇعان دەيىن قازاقستان پرەزيدەنتى قاسىم-جومارت توقاەۆ ءبىلىم بەرۋ مەكەمەسىنە وقۋشىلاردى تاسىمالداۋعا ارنالعان اۆتوبۋس سىيلادى. سونىمەن قاتار مەكتەپكە جاڭا كومپيۋتەرلەر، ينتەراكتيۆتى تاقتالار جانە باسقا دا جابدىقتار بەرىلدى.
ۇزدىك تۇلەكتەر ءۇشىن الماتىداعى Satbayev University-دە تەگىن ءبىلىم الۋعا ءۇش ورىن قاراستىرىلعان.
تەك مەكتەپ ەمەس، ورتاق تاريحتىڭ ءبىر بولىگى
بۇگىندە كەمەل توقاەۆ اتىنداعى №33 گيمنازيا – تەك ءبىلىم بەرۋ مەكەمەسى عانا ەمەس، ەكى ەلدىڭ تاريحى، سوعىس بۋىنى تۋرالى ەستەلىك پەن زاماناۋي ءبىلىم بەرۋ بايلانىستارى توعىسقان ورىن.
