Ūly Otan soǧysy jyldarynda mektep ǧimaratynda Frunze jaiau äsker uchilişesı ornalasqan.
80 jyldan astam tarihy bar Bışkektegı Kemel Toqaev atyndaǧy №33 mektep-gimnaziiasy - bılım ordasynyŋ tarihy Qazaqstan men Qyrǧyzstannyŋ ortaq tarihyndaǧy bırneşe maŋyzdy kezeŋmen sabaqtasyp jatyr.
№33 mektep-gimnaziiasy Bışkektegı eŋ köne bılım beru mekemelerınıŋ bırı sanalady. Onyŋ ǧimaraty 1940 jyly salynǧan jäne qalalyq maŋyzy bar tarihi eskertkış märtebesıne ie.
Ūly Otan soǧysy jyldarynda būl ǧimaratta Frunze jaiau äsker uchilişesı ornalasqan. Däl osy jerde qazaq jazuşysy, maidanger Kemel Toqaev pen Rahymjan Qoşqarbaev äskeri daiyndyqtan ötken.
Soǧystan keiın, 1947 jylǧy 1 qyrküiekte mektep bılım beru mekemesı retınde qaita jūmysyn bastady. Keiıngı onjyldyqtarda ol tolyq emes orta mektepten mektep-gimnaziiaǧa deiıngı joldan öttı. 2012 jyly bılım beru mekemesıne resmi türde gimnaziia märtebesı berıldı.
Bügınde mektep Bışkektıŋ Sverdlov audanynda ornalasqan jäne qaladaǧy belgılı bılım beru mekemelerınıŋ bırı retınde jūmysyn jalǧastyryp keledı.
Nelıkten mektepke Kemel Toqaevtyŋ esımı berıldı?
Aita keteiık, mektepke Kemel Toqaevtyŋ esımı 2025 jylǧy mamyrda Qyrǧyzstan Prezidentı Sadyr Japarovtyŋ bastamasymen berıldı.
Mūndai şeşım ǧimarattyŋ tarihymen bailanysty. Ūly Otan soǧysy jyldarynda Kemel Toqaev osy jerde Frunze jaiau äsker uchilişesınde daiyndyqtan ötıp, keiın maidanǧa attanǧan.
Kemel Toqaev 1923 jyly düniege kelgen. Ol Ūly Otan soǧysyna qatysyp, keiın belgılı qazaq jazuşysy ärı qazaq ädebietındegı detektiv janrynyŋ negızın qalauşylardyŋ bırı boldy.
Soǧys turaly estelık
2024 jylǧy mamyrda mūnda Rahymjan Qoşqarbaev pen Kemel Toqaevqa arnalǧan patriottyq būryş aşyldy. Onda bılım beru mekemesınıŋ tarihy, qazaqstandyqtardyŋ ömırbaiany men maidandaǧy jauyngerlık joly turaly materialdar ūsynylǧan.
Sol kezde mektepte Qazaqstannan äkelıngen arhiv qūjattary men kıtaptar körmesı de ūiymdastyryldy.
Osylaişa, mekteptıŋ tarihy tek bılım berumen ǧana emes, Ūly Otan soǧysy oqiǧalary turaly tarihi jadty saqtaumen de bailanysty.
Qazaqstanmen bailanys
Soŋǧy jyldary №33 mektep-gimnaziiasy Qazaqstanmen bailanysty belsendı damytyp keledı.
Būǧan deiın Qazaqstan Prezidentı Qasym-Jomart Toqaev bılım beru mekemesıne oquşylardy tasymaldauǧa arnalǧan avtobus syilady. Sonymen qatar mektepke jaŋa kompiuterler, interaktivtı taqtalar jäne basqa da jabdyqtar berıldı.
Üzdık tülekter üşın Almatydaǧy Satbayev University-de tegın bılım aluǧa üş oryn qarastyrylǧan.
Tek mektep emes, ortaq tarihtyŋ bır bölıgı
Bügınde Kemel Toqaev atyndaǧy №33 gimnaziia – tek bılım beru mekemesı ǧana emes, ekı eldıŋ tarihy, soǧys buyny turaly estelık pen zamanaui bılım beru bailanystary toǧysqan oryn.
