ءۇش ايدىڭ شاماسىندا بولۋ كەرەك، كوپ جىل جولداس بولعان كەمپىرىنەن ايرىلىپ قالدى. سول كەزدە تەلەفون سوقتى، ء«اي، بەرىك، اينالايىن، جەڭگەڭ كەتىپ قالدى عوي» دەپ. جەر شالعاي، امال قانشا، سول كەزدە دە جەتە الماعانمىن.
جاقىندا، ءبىر ايدىڭ شاماسىندا بولۋ كەرەك، تاعى تەلەفون شالىپ ەدى، «ولاي-بۇلاي بولىپ كەتسەم كەلەرسىڭ، اعاڭنىڭ باسىندا بولارسىڭ، شارۋانىڭ قالعانى وزىڭە بەلگىلى عوي» دەگەندى ايتىپ. شاماسى، «جۇرت قاتارلى جەرلەي سالماسىن، ەڭ بولماسا قارالى جيىن جاساپ، ازدى-كوپتى ەڭبەگىمدى ەسكەرسىن» دەگەنى بولۋ كەرەك. ءبىراز سويلەسىپ، قوشتاساردا كەمسەڭدەپ قالعان. جالپى ءبىز ءجيى حابارلاسىپ تۇراتىنبىز. كوبىنە ءوزى تەلەفون سوعاتىن. وسىدان ەكى جىل بۇرىن ارنايى بارىپ، سالەم بەرىپ، كوكىرەگىندەگى ءسوز-قازىنانى ەكىنشى مارتە ۇنتاستاسپاعا سارقا حاتتاپ، قاسىندا ءبىر كۇن بولىپ، كەلىسى كۇنى جولعا قامدانعانىمدا: «اعاڭ ولاي-بۇلاي بولىپ كەتسە مىندەتتى تۇردە كەل، ءوزىڭ شىعارىپ سال» دەپ ەدى-اۋ، جارىقتىق. كەشە، تاڭ الدىندا نەمەرە كەلىنى ايزادا تەلەفون سوقتى، «اتامنىڭ ءحالى ناشار. ەسى وزىندە كەزدە اقىرعى رەت ء«سىزدىڭ ەسىمىڭىزدى اتادى، حابارلاس، جاعدايىمدى ايت. نامازىما كەلەر، قالعانىن ءوزى بىلەدى» دەپتى. بۇگىن تاڭ الدىندا سۋىق حابار سۋماڭ ەتتى. جالما-جان قىزىلورداعا، ۇشاققا بيلەت الىپ، جالاعاشقا – تۇراق احەتوۆ دوسىما حابار سالىپ، اكىمدىكتەگى جىگىتتەردىڭ قۇلاعىن كوتەرىپ، مۇحتار نيازوۆ ىنىمە تەلەفون سوعىپ، سىرداعى مادەنيەت پەن رۋحانيات سالاسىندا جۇرگەن باس كوتەرەر ازاماتتارعا ايتىپ، «ەرتەڭ قوناعاسى شىعار، ارعى كۇنى شىعاراتىن بولار» دەگەن ۇمىتپەن دايىندىق قامىنا كىرىسىپ كەتكەنمىن. قالاي دەگەنمەن سوڭعى امانات ءسوزى بار. ءسويتىپ، ءبىر ءوڭىردىڭ ءسوز ۇستاعان قازىنالى قارياسىن جۇرت الدىندا جاريا جيىن جاساپ، شىعارىپ سالاتىن بولارمىز دەگەن ىزگى ويىم ادىرا قالدى. اعايىن-جۇرت ىلدىم-جىلدىم ويلاسا كەلە، كۇنى ەرتەڭ جەرلەۋگە شەشىم قابىلداپ جىبەرىپتى. قاريانىڭ اقىرعى ءسوزىن ايتىپ، قۇدايدىڭ زارىن قىلدىم. باسقانى بىلمەدىم، ماقپالكولدەن تەلەفون سوققان مولدا كۇمىسبەك ءىنىمنىڭ ءۋاجى سولاي، ويلاستىق كەزىندە كەلىنى ەشتەڭە دەمەپتى-ءمىس. بۇل نە قىلعان اسىعىس تىرلىك؟ دەنەسى شىدامايدى، كۇتۋدى كوتەرمەيدى دەيتىندەي شىلىڭگىر شىلدە بولسا ءبىر ءسارى. ءاي، وسى ءبىز بار عوي...
مەيلى، ەندى امال جوق. ەكى جىلدان بەرى ايتىپ، قايتا-قايتا قاقساپ جۇرۋىندە، ءسوزىن نىعارلاپ، ءۇستىن-ءۇستىن تەلەفون سوعۋىندا ءمان بار ەكەن-اۋ. ءىشى سەزگەن سياقتى عوي، جارىقتىقتىڭ. وسىنشاما قوبالجۋدىڭ مانىنە بويلاي باستاعاندايمىن. جەرلەپ قويعاننان كەيىن بارعانمەن سۇيەگىن كورىپ، توپىراق سالىپ ۇلگەرە المايمىن، اسىل اعانىڭ دەنەسى قۇم كورپەسىن قىمتاپ الايىن دەپ تۇر ەكەن. امال قايسى، ۇشاققا العان بيلەتىمدى كەرى وتكىزەرىمدى دە، وتكىزبەسىمدى دە بىلمەي، بەت سيپاپ وتىرعان جايىم بار. «اعا، ءوزىم حابارلاسامىن، ءبىر دەرەگىن ايتامىن» دەگەن مولدەكەم دە قاراسىن كورسەتپەي كەتتى. باسقا – باسقا، تاپ وسى ءومىرتاي قاريانىڭ جەرلەۋىنە اسىعىستىق تانىتپاۋ كەرەك ەدى. مەن بۇل كىسىنىڭ كوكىرەگىندەگى قازىنانى 2014 جىلى، مارقۇم قاھارمان باباعۇلوۆ دۇنيەدەن وتكەن سوڭ، مارۇمنىڭ ء«ومىر جىرى» دەرەكتى رومانىنىڭ جەلىسى بويىنشا، مەنىڭ جەتەكشىلىگىممەن رەجيسسەر كەنجەباي دۇيسەنباي تۇسىرگەن فيلم-پورترەت جوباسى بارىسىندا تولىق قاتتاي باستادىم. سول ساپاردا كوزىم جەتكەن، ونىڭ ەرەسەن داڭعىلدىعىنا. ارادا ون جىل وتكەندە، 2024 جىلى گۇلفايرۋز ەكەۋمىز جالاعاشقا – ماقپالكولگە ارنايى ىزدەپ بارىپ، قاسىندا ءبىر كۇن بولىپ، ارقايىم اڭگىمەلەسىپ، بىلەتىن اڭگىمەلەرىن تاعى ءبىر مارتە جازىپ العانمىن.
جارىقتىقتىڭ جادى باياعىداي، مولدىرەپ تۇر ەكەن. ءوزى جايىندا بىرنەشە ماقالا جازعانىمدى قالادى. مەن 2024 جىلى تامىزدا «سەن كىمنىڭ گوي-گويى ەدىڭ، كۇمىساي؟» دەگەن كولەمدى ماقالا جازىپ قانا ۇلگەردىم. كەشەگى سارىباي ءسادىر مەن بەكىش بيلەردىڭ جۇراعاتى ومەكەڭنىڭ – ءومىرتاي كەمەلۇلىنىڭ بىلگەنى مەن تۇيگەنى كوپ ەدى. اتتەڭ، كونەكوز قاريالاردىڭ اڭگىمەسىنە ءمان بەرۋ، سارقىپ تىڭداۋ مادەنيەتىنەن جۇرداي زامانعا تاپ بولىپ، بويىنداعى وتە سيرەك كەزدەسەتىن اڭگىمەشىلدىك ونەرى ءوز دەڭگەيىندە باعالانبادى. اقىر اياعى، مىنە، ءبىر اسىعىس، ەكى ۇسىگىس تىرلىك اراسىندا «جيىن» جاساپ، سالتاناتىمەن شىعارىپ سالۋعا دا مۇرسات بەرىلمەگەنى عوي. مارقۇم، ءوزى سونىڭ جايىن بىلگەندەي-اق تىقىرشىعان ەكەن. امال قانشا، ءومىرتاي-ءداۋىردىڭ قوڭىراۋلى كوشى ماڭگىلىككە بەت تۇزەدى. ابىروي — تىرىلەر ءۇشىن. ەندى وعان ەشتەڭەنىڭ دە قاجەتى جوق. تەك «قاپ-اي» دەپ قالعانىمىز بولماسا. قوش اعا، قوش قازىنالى قارا نار، اللا اقىرىڭدى ابات ەتكەي!
ۇقساس جاڭالىقتار
