قازاقستاندا ەت باعاسىنىڭ ءوسۋى جالعاسىپ جاتىر. اسىرەسە قوي ەتىنىڭ قۇنى ايتارلىقتاي قىمباتتاعان. 2026 جىلعى شىلدەدە قوي ەتىنىڭ باعاسى وتكەن جىلدىڭ سايكەس كەزەڭىمەن سالىستىرعاندا 27,9 پايىزعا وسكەن. بۇل رەتتە ەلدەگى ەت ءوندىرىسى دە ارتىپ، سوڭعى جىلدارداعى رەكوردتىق دەڭگەيگە جەتتى، دەپ حابارلايدى "ادىرنا".
Energyprom مالىمەتىنشە، قوي ەتى قازاقستانداعى ەڭ جىلدام قىمباتتاپ جاتقان ەت تۇرىنە اينالدى. وزگە ەت ونىمدەرىنىڭ باعاسى دا ءبىر جىل ىشىندە ايتارلىقتاي وسكەن. اتاپ ايتقاندا، سيىر ەتى 15,1 پايىزعا، جىلقى ەتى 14,4 پايىزعا قىمباتتاعان.
قوي ەتىنىڭ باعاسى اسىرەسە كوكتەم مەن جازدىڭ باسىندا كۇرت وسكەن. ماسەلەن، مامىر ايىندا ونىڭ قۇنى ءبىر ايدىڭ ىشىندە 4,7 پايىزعا ارتتى. بۇل 2011 جىلدان بەرى جۇرگىزىلىپ كەلە جاتقان ستاتيستيكاداعى ەڭ جوعارى ايلىق ءوسىم رەتىندە تىركەلدى.
ماۋسىم ايىندا قوي ەتىنىڭ باعاسى تاعى 4,2 پايىزعا كوتەرىلسە، شىلدەدە 2,3 پايىزعا ءوستى.
بۇعان دەيىن اۋىل شارۋاشىلىعى مينيسترلىگى باعانىڭ قىمباتتاۋىن قۇربان ايت قارساڭىنداعى سۇرانىستىڭ ارتۋىمەن تۇسىندىرگەن ەدى. ۆەدومستۆو قازاقستاندا ەت تاپشىلىعى جوق ەكەنىن دە مالىمدەگەن. الايدا مەرەكەدەن كەيىن دە قوي ەتىنىڭ باعاسى تومەندەمەي، ءوسۋىن جالعاستىردى.
ەت ءوندىرىسى رەكوردتىق دەڭگەيگە جەتتى
باعانىڭ ءوسۋى ەت ءوندىرىسىنىڭ ارتۋى جاعدايىندا بايقالىپ وتىر. 2026 جىلدىڭ قاڭتار-شىلدە ايلارىندا قازاقستاندا 48,2 مىڭ توننا جاڭا جانە سالقىنداتىلعان ەت وندىرىلگەن. بۇل وتكەن جىلدىڭ سايكەس كەزەڭىمەن سالىستىرعاندا 9,3 پايىزعا كوپ. 2025 جىلدىڭ العاشقى جەتى ايىندا بۇل كورسەتكىش 44,1 مىڭ توننانى قۇراعان.
بيىلعى كورسەتكىش 1999 جىلدان بەرى جۇرگىزىلىپ كەلە جاتقان ستاتيستيكاداعى العاشقى جەتى اي ءۇشىن ەڭ جوعارى كولەم بولىپ وتىر.
دەگەنمەن، ۇزاق مەرزىمدى كەزەڭمەن سالىستىرعاندا ءوندىرىس كولەمىنىڭ ءوسىمى اسا ۇلكەن ەمەس. مىسالى، 2016 جىلدىڭ قاڭتار-شىلدە ايلارىندا ەلدە 47,2 مىڭ توننا ەت وندىرىلگەن. قاراستىرىلىپ وتىرعان كەزەڭدەگى ەڭ تومەنگى كورسەتكىش 2021 جىلى تىركەلىپ، 37,1 مىڭ توننانى قۇراعان.
ەت باعاسىنىڭ قىمباتتاۋىنا قاراماستان، تۇرعىنداردىڭ ەت جانە ەت ونىمدەرىن تۇتىنۋ كولەمى ايتارلىقتاي وزگەرمەگەن.
2026 جىلدىڭ ءبىرىنشى توقسانىندا قازاقستاننىڭ ءبىر تۇرعىنىنا ورتا ەسەپپەن 20,7 كەلى ەت جانە ەت ونىمدەرى تيەسىلى بولعان. ءبىر جىل بۇرىن بۇل كورسەتكىش 20,6 كەلىنى قۇراعان.
قازاقستاندىقتار اراسىندا ەڭ كوپ تۇتىنىلاتىن ەت ءتۇرى – سيىر ەتى. ءبىر ادامعا توقسانىنا ورتا ەسەپپەن 6 كەلى سيىر ەتى كەلەدى. قوي ەتىن تۇتىنۋ كولەمى شامامەن 1,1 كەلىنى، ال شوشقا ەتىن تۇتىنۋ 0,8 كەلىنى قۇرايدى.
سونىمەن قاتار جىلقى ەتىنىڭ تۇتىنۋ كولەمى دە ارتقان. ەگەر 2021 جىلدىڭ ءبىرىنشى توقسانىندا ءبىر ادام ورتا ەسەپپەن 1,8 كەلى جىلقى ەتىن تۇتىنسا، 2026 جىلدىڭ سايكەس كەزەڭىندە بۇل كورسەتكىش 2,2 كەلىگە جەتكەن.
جالپى قازاقستان بويىنشا ەت باعاسى ءبىر جىل ىشىندە 15,8 پايىزعا وسكەن.
ەڭ جوعارى ءوسىم جەتىسۋ وبلىسىندا تىركەلدى – 21,9 پايىز. اقمولا جانە ۇلىتاۋ وبلىستارىندا ەت باعاسى 19,6 پايىزعا، جامبىل وبلىسىندا 17,4 پايىزعا، سولتۇستىك قازاقستان وبلىسىندا 17,1 پايىزعا، تۇركىستان وبلىسىندا 16,7 پايىزعا قىمباتتاعان.
باعانىڭ ەڭ تومەن ءوسىمى شىعىس قازاقستان وبلىسىندا بايقالدى – 12,2 پايىز. قىزىلوردا وبلىسىندا ەت قۇنى 12,9 پايىزعا، ال الماتى وبلىسىندا 13,6 پايىزعا وسكەن.
ياعني، باعا ءوسىمى سالىستىرمالى تۇردە تومەن بولعان وڭىرلەردىڭ وزىندە ەت ءبىر جىل ىشىندە 10 پايىزدان استام قىمباتتاعان.
2026 جىلعى شىلدەدەگى مالىمەت بويىنشا، سۇيەكتى سيىر ەتىنىڭ ورتاشا باعاسى ءبىر كەلىسى شامامەن 3,8 مىڭ تەڭگەنى قۇراعان. ەڭ جوعارى باعا الماتىدا تىركەلىپ، ءبىر كەلىسى 4,2 مىڭ تەڭگەگە جۋىقتاعان. ال اقتوبەدە سيىر ەتىنىڭ ورتاشا باعاسى شامامەن 3,4 مىڭ تەڭگە بولعان.
قوي ەتىنىڭ ورتاشا باعاسى ەل بويىنشا ءبىر كەلىسى 4,5 مىڭ تەڭگەنى قۇرادى. ەڭ قىمبات قوي ەتى استانادا ساتىلعان – ءبىر كەلىسى شامامەن 5,4 مىڭ تەڭگە. ال كوكشەتاۋدا قوي ەتىنىڭ باعاسى 3,8 مىڭ تەڭگە شاماسىندا بولعان.
جىلقى ەتىنىڭ ورتاشا قۇنى ءبىر كەلىسى 4,3 مىڭ تەڭگەگە جەتتى. پەتروپاۆلدا ونىڭ باعاسى 4,7 مىڭ تەڭگەگە دەيىن كوتەرىلسە، تۇركىستاندا شامامەن 4 مىڭ تەڭگەنى قۇراعان.
ال شوشقا ەتىنىڭ ورتاشا باعاسى ءبىر كەلىسى شامامەن 3 مىڭ تەڭگە بولعان.
وسىلايشا، قازاقستاندا ەت ءوندىرىسى رەكوردتىق دەڭگەيگە جەتكەنىمەن، بۇل جاعداي نارىقتاعى باعانىڭ تومەندەۋىنە اسەر ەتپەي وتىر. اسىرەسە قوي ەتىنىڭ بىرنەشە اي قاتارىنان قىمباتتاۋى تۇرعىنداردىڭ شىعىنىنا اسەر ەتىپ، ازىق-تۇلىك باعاسىنىڭ ءوسۋى ماسەلەسىن قايتادان كۇن تارتىبىنە شىعاردى.
