مەكتەپ قابىرعاسىندا ءجۇرىپ دايىندىق مەكتەبىن اشقان تالاپتى وقۋشى ءوزىنىڭ حالىقارالىق سىناقتان قالاي ەڭ جوعارى بالل جيناپ، جەتىستىككە جەتۋ جولىنداعى ءوزىنىڭ تاجىريبەسىمەن بولىسەدى.
17 جاستاعى قازاقستاندىق سايا قىدىرالى حالىقارالىق دەڭگەيدەگى اعىلشىن ءتىلى ەمتيحانىنان ەڭ جوعارى 9 بالل جيناپ، الەمدىك رەكورد ورناتتى. ول قازاقستاننان IELTS ەمتيحانىنان ماكسيمالدى ۇپاي جيناعان جالعىز ادام جانە الەمدەگى ەڭ جاس IELTS-ساراپشى. بۇعان دەيىن IELTS سىناعىنا قاتىسىپ باق سىناعانداردىڭ 0,5 پايىزى عانا 9.0 ۇپاي ناتيجەسىنە قول جەتكىزگەن.
14 جاسىندا دايىندىق مەكتەبىن اشقان جاس كاسىپكەر الداعى جوسپارلارىمەن ءبولىستى.
- اعىلشىن ءتىلىن ۇيرەنۋدى قاشان، قالاي باستادىڭىز؟ قىزىعۋشىلىق قايدان پايدا بولدى؟
- اعىلشىن تىلىنە دەگەن قىزىعۋشىلىعىم كىشكەنتاي كەزىمنەن باستالدى. ءدال قاي جاستا باستاعانىم ەسىمدە جوق. بىراق اتا-انام كىشكەنتايىمنان كىتاپ وقۋعا، ءتىل ۇيرەنۋگە كوپ كوڭىل ءبولدى. ال ماقساتىم – ءوزىمدى شەكتەۋسىز دامىتۋ بولدى. اعىلشىن – الەمدىك ءتىل، ول ارقىلى ەڭ ۇزدىك بىلىمگە، رەسۋرستارعا قول جەتكىزۋگە بولادى. IELTS-ءتى العاش تاپسىرعان كەزدە وزىمە جوعارى ماقسات قويدىم. ويتكەنى بۇل تەك ەمتيحان عانا ەمەس، وزىمە، مۇمكىندىكتەرىمە دەگەن سەنىمنىڭ كورسەتكىشى بولدى.
- كاسىبىڭىز تۋرالى ايتساڭىز؟ ءوزىڭىز وقۋشىسىز. كوماندانى جيناۋ، باسقارۋ قيىن بولمادى ما؟
- مەن IELTS-كە دايىندىق مەكتەبىن 14 جاسىمدا اشتىم. باستاپقىدا شاعىن اۋديتوريامەن جۇمىس ىستەدىم، كەيىن سۇرانىس ارتىپ، كوماندا قۇرۋ قاجەتتىلىگى تۋىندادى. كوماندانى جيناۋ قيىن بولدى. سەبەبى مەنىڭ وزىمە دە تاجىريبە كەرەك ەدى. بىراق باستى تالابىم – ساپا. مۇعالىمدەردى تاڭداعاندا ولاردىڭ ءبىلىم دەڭگەيىنە عانا ەمەس، وقۋشىلارمەن بايلانىس ورناتا الۋ قابىلەتىنە، جاۋاپكەرشىلىگىنە ەرەكشە ءمان بەرەمىن. شاكىرتتەرىمنىڭ باسىم بولىگى جوعارى ناتيجەگە جەتۋگە تالپىناتىندار. سوندىقتان ولارعا دا، وزىمە دە قاتاڭ تالاپ قويامىن.
- قاتەلەسپەسەم، 10 سىنىپتا شەتەلدە ءبىلىم الۋعا ۇسىنىس تۇسكەن ەكەن. نەگە باس تارتتىڭىز؟
- ءيا، بىرنەشە ەلدەن ۇسىنىس بولدى. بىراق مەن ءوز جوبامدى ءارى قاراي دامىتۋدى ءجون كوردىم. قازاقستاندا ءبىلىم سالاسىنا ۇلەس قوسۋدى، ءوز مەكتەبىمدى حالىقارالىق دەڭگەيگە شىعارۋدى ماقسات ەتتىم. مەن ەڭ باستىسى ءوز ەلىمدە تالانتتى جاستاردىڭ كوبىرەك بولۋىنا ىقپال ەتكىم كەلەدى.
- IELTS ەمتيحانى بويىنشا ءالەمدەگى ەڭ جوعارعى كورسەتكىشكە يە بولدىڭىز. ەندىگى جوسپارىڭىز قانداي?
- IELTS-ءتىڭ ەڭ جوعارعى بالى – 9.0. بۇل – تەك ءبىر بەلەس. قازىر SAT-قا دايىندالىپ جاتىرمىن. سونىمەن قاتار، ءوزىمنىڭ مەكتەبىمدى كەڭەيتۋ، جاڭا جوبالار باستاۋ ويىمدا بار. مەن ءۇشىن ەڭ ماڭىزدىسى – ءوزىمنىڭ جانە اينالامداعى ادامداردىڭ ۇنەمى دامىپ وتىرۋى.
- باسقا بالالار ويناپ جۇرگەندە، وقىدىڭىز. بارىنە قولدى ءبىر سىلتەپ تاستاپ كەتكىڭىز كەلگەن كەزدەر بولدى ما؟ ونداي كۇيدەن قالاي شىعاسىز؟
- ارينە، ونداي كەزدەر بولدى. كەز كەلگەن ادامدا شارشاۋ، موتيۆاتسيانىڭ ءتۇسۋى بولادى. بۇل – قالىپتى جاعداي. بىراق مەنىڭ ماقساتىم ماڭىزدى بولعاندىقتان، مۇنداي ويلاردان تەز ارىلامىن. ادەتتە سپورتپەن اينالىسۋ، تابيعاتقا شىعۋ، جاقىن ادامدارىممەن ۋاقىت وتكىزۋ ماعان كومەكتەسەدى. ەڭ باستىسى – نەلىكتەن باستاعانىڭدى ەسكە ءتۇسىرۋ.
- قالاي ويلايسىز، جالپى جەتىستىككە جەتكىسى كەلەتىن ادام قانداي بولۋ كەرەك؟
- ەڭ الدىمەن تاباندى بولۋى كەرەك. كەدەرگىلەردەن قورىقپايتىن، ۇنەمى ءوزىن دامىتاتىن ادام عانا بيىككە جەتە الادى. سونىمەن قاتار، ناتيجە ءۇشىن جۇيەلى جۇمىس ىستەۋ قاجەت. جاي عانا موتيۆاتسيا جەتكىلىكسىز – ناقتى جوسپار، ارەكەت بولۋى شارت.
- بالا ءۇشىن اتا-انانىڭ قولداۋى قانشالىقتى ماڭىزدى دەپ ويلايسىز؟ اسىرەسە, 11 سىنىپ وقۋشىلارى ءۇشىن
- وتە ماڭىزدى. قىسىم مەن تالاپ قويۋ ءبىر بولەك، ال شىنايى قولداۋ – مۇلدە باسقا نارسە. 11 سىنىپ وقۋشىلارى ۇلكەن سترەسس جاعدايىندا بولادى. سول سەبەپتى اتا-انانىڭ قولداۋى، سەنىم بىلدىرۋى ولارعا كۇش بەرەدى. ەڭ باستىسى – «سەنىڭ قولىڭنان كەلەدى» دەگەن سوزدەردى ەستۋ.
- رەكورد ورناتتىڭىز. IELTS ورتالىعىنان قانداي كەرى بايلانىس بولدى؟
- IELTS ورتالىعىنىڭ وكىلدەرى مەنىڭ ناتيجەمدى ەرەكشە اتاپ ءوتتى. سەبەبى بۇل – قازاقستاندا وتە سيرەك كەزدەسەتىن ناتيجە. مەنىڭ مەكتەبىمدەگى وزگە وقۋشىلار دا جوعارى ناتيجە كورسەتكەندىكتەن، ورتالىقتار بىزبەن ىنتىماقتاستىق ورناتۋعا قىزىعۋشىلىق بىلدىرۋدە. بىراق مەن ءۇشىن باستى ناتيجە – شاكىرتتەرىمنىڭ جەتىستىگى.
- سۇحباتتاسقانىڭىزعا راقمەت!
مەرەي مىرزاعاليقىزى
«ادىرنا» ۇلتتىق پورتالى
