شىمكەنتتە كافەل وندىرەتىن زاۋىتتا قازا تاپقان 28 جاستاعى سپورتشى ءادىل تىلەكتەستىڭ تۋىستارى كاسىپورىندا ەڭبەك قاۋىپسىزدىگى تالاپتارى ساقتالماعان بولۋى مۇمكىن دەپ كۇدىكتەنەدى، دەپ حابارلايدى "ادىرنا" ينفورمبيۋروعا سىلتەپ.
الدىن الا مالىمەت بويىنشا، ءادىل تىلەكتەس جۇمىس كەزىندە ەلەكتر توعىنا ءتۇسىپ، بيىكتەن قۇلاعان. ول العان جاراقاتىنان كوز جۇمعان. مارقۇمنىڭ اپكەلەرىنىڭ ايتۋىنشا، ولار دەمالىس كۇنى ءادىلدى جۇمىستان الىپ كەتۋگە بارعان. سول كۇنى وتباسى اكەلەرىنىڭ تۋعان كۇنىن اتاپ ءوتۋدى جوسپارلاعان. الايدا زاۋىتقا بارعان كەزدە باۋىرلارىنىڭ اۋىر جاراقات العانىن بىلگەن.
تۋىستارى كاسىپورىندا قاۋىپسىزدىك تالاپتارىنىڭ قانشالىقتى ساقتالعانىن انىقتاۋدى سۇراپ وتىر. سونداي-اق وتباسى كىنالىلەر زاڭ اياسىندا جاۋاپقا تارتىلىپ، مارقۇمنىڭ جاقىندارىنا وتەماقى تولەنۋىن تالاپ ەتەدى. تۋىستارىنىڭ سوزىنشە، كاسىپورىن وكىلدەرى وتباسىنا كومەك كورسەتۋگە ۋادە بەرگەن.
ءادىل تىلەكتەس گرەك-ريم كۇرەسىنەن قازاقستان چەمپيونى بولعان. ول ەستۋ قابىلەتى تومەن سپورتشىلار اراسىندا وتكەن حالىقارالىق جارىستارعا قاتىسىپ، ەل نامىسىن قورعاعان. ىم-يشارا ءتىلىن قولدانعان بالۋان سپورتتان تۇراقتى تابىس بولماعاندىقتان، زاۋىتقا جۇمىسقا ورنالاسقان.
شىمكەنت قالاسى پوليتسيا دەپارتامەنتىنىڭ مالىمەتىنشە، كاسىپورىن اۋماعىندا جۇمىسشىنىڭ قازا بولۋىنا بايلانىستى قىلمىستىق ءىس قوزعالىپ، سوتقا دەيىنگى تەرگەپ-تەكسەرۋ جۇرگىزىلىپ جاتىر.
الدىن الا مالىمەت بويىنشا، ەر ادام جۇمىس كەزىندە ەلەكتر توعىنا ءتۇسىپ، ولىمگە اكەلگەن جاراقات العان. قازىر وقيعانىڭ بارلىق ءمان-جايىن انىقتاۋ ءۇشىن قاجەتتى تەرگەۋ ارەكەتتەرى جۇرگىزىلۋدە.
