16 قىركۇيەكتە ازەربايجان پرەزيدەنتى يلحام اليەۆ ەل استاناسىنداعى قاراداق اۋدانىندا ورنالاسقان قۋاتى 100 مۆت بولاتىن «گوبۋستان» كۇن ەلەكتر ستانتسياسىنىڭ اشىلۋ راسىمىنە قاتىستى، دەپ حابارلايدى «ادىرنا» ءتىلشىسى.
Report اگەنتتىگىنىڭ مالىمەتىنشە، مەملەكەت باسشىسىن ەنەرگەتيكا ءمينيسترى پارۆيز شاحبازوۆ، قىتاي حالىق رەسپۋبليكاسىنىڭ ازەربايجانداعى ەلشىسى لۋ مەي جانە Universal International Holdings Limited كومپانياسىنىڭ باس اتقارۋشى ديرەكتورى ي نان قارسى العان.
پرەزيدەنت يلحام اليەۆكە «گوبۋستان» كۇن ەلەكتر ستانتسياسى، Universal Energy كومپانياسى جانە ونىڭ ازەربايجانداعى قىزمەتى تۋرالى اقپارات بەرىلگەن.
كەزدەسۋ بارىسىندا قىتايدىڭ شانحاي قالاسىندا قۇرىلعان كومپانيانىڭ جاسىل ەنەرگەتيكا مەن ەنەرگيا ساقتاۋ جۇيەلەرى سالاسىندا شەشىمدەر ۇسىناتىنى ايتىلدى.
Universal Energy جاڭارتىلاتىن ەنەرگيا كوزدەرى سالاسىنداعى جوبالاردى قىتايدا عانا ەمەس، قازاقستان مەن وزبەكستاندا دا جۇزەگە اسىرىپ كەلەدى.
ازەربايجان مينيسترلەر كابينەتىنىڭ 2023 جىلعى شەشىمىمەن باكۋ قالاسىنىڭ قاراداق اۋدانىنداعى پيرساات كەنتىندە ورنالاسقان 300,77 گەكتار جەر تەلىمى كۇن ەلەكتر ستانتسياسىن سالۋ ماقساتىندا جاڭارتىلاتىن ەنەرگيا كوزدەرى ايماعى رەتىندە بەلگىلەنگەن ەدى.
اتالعان جەر تەلىمى كۇن ەلەكتر ستانتسياسىن سالۋ ءۇشىن اۋكتسيونعا شىعارىلىپ، 2024 جىلى ونىڭ جەڭىمپازى رەتىندە قىتايدىڭ Universal International Holdings Limited كومپانياسى تانىلدى.
«گوبۋستان» كۇن ەلەكتر ستانتسياسى جوباسى – ازەربايجاندا اۋكتسيون ارقىلى جۇزەگە اسىرىلعان العاشقى جوبا ءارى Universal Energy كومپانياسىنىڭ ەلدەگى تۇڭعىش جوباسى.
ستانتسيادا كۇن پانەلدەرىمەن قاتار دالالىق ينۆەرتورلار مەن ترانسفورماتورلار ورناتىلىپ، بارلىق كابەلدىك جۇمىستار تولىق اياقتالعان.
«گوبۋستان» كۇن ەلەكتر ستانتسياسى ىسكە قوسىلعاننان كەيىن جىلىنا شامامەن 200 ميلليون كيلوۆاتت-ساعات ەلەكتر ەنەرگياسىن ءوندىرۋ جوسپارلانىپ وتىر. بۇل جىل سايىن 45 ملن تەكشە مەتر تابيعي گازدى ۇنەمدەۋگە جانە اتموسفەراعا شىعارىلاتىن كومىرقىشقىل گازىنىڭ كولەمىن 97 مىڭ تونناعا قىسقارتۋعا مۇمكىندىك بەرەدى.
ايتا كەتەيىك، پرەزيدەنت يلحام اليەۆتىڭ جەتەكشىلىگىمەن جۇزەگە اسىرىلىپ جاتقان ەنەرگەتيكالىق ساياساتتىڭ باسىم باعىتتارىنىڭ ءبىرى – جاڭارتىلاتىن ەنەرگيا كوزدەرىن كەڭىنەن پايدالانۋ.
ازەربايجانداعى جاسىل ەنەرگيا كوزدەرىنىڭ تەحنيكالىق الەۋەتى قۇرلىقتا 135 گۆت، تەڭىزدە 157 گۆت دەپ باعالانادى. ەكونوميكالىق الەۋەتى 27 گۆت-تى قۇرايدى. ونىڭ ىشىندە جەل ەنەرگەتيكاسى – 3 گۆت، كۇن ەنەرگەتيكاسى – 23 گۆت. سونىمەن قاتار بيوەنەرگەتيكا الەۋەتى 380 مۆت، تاۋ وزەندەرىنىڭ ەنەرگەتيكالىق الەۋەتى 520 مۆت دەڭگەيىندە.
«گوبۋستان» كۇن ەلەكتر ستانتسياسى ىسكە قوسىلعاننان كەيىن ازەربايجانداعى جاڭارتىلاتىن ەنەرگيا كوزدەرىنىڭ جالپى قۋاتى 2170 مۆت-قا، ال مۇنداي ستانتسيالار سانى 85-كە جەتەدى. ونىڭ ىشىندە 65 سۋ ەلەكتر ستانتسياسى (1443,5 مۆت), 6 جەل ەلەكتر ستانتسياسى (306,5 مۆت), 9 كۇن ەلەكتر ستانتسياسى (278,2 مۆت), 3 گيبريدتى ەلەكتر ستانتسياسى (7,3 مۆت) جانە 1 بيوەلەكتر ستانتسياسى (37 مۆت) بار.
قازىرگى تاڭدا جاڭارتىلاتىن ەنەرگيا كوزدەرىنىڭ ۇلەسى ەلدىڭ جالپى ەنەرگەتيكالىق قۋاتىنىڭ شامامەن 20,8 پايىزىن قۇرايدى.
2027 جىلدىڭ سوڭىنا دەيىن قۋاتى شامامەن 1,5 گۆت بولاتىن جاڭارتىلاتىن ەنەرگەتيكا جوبالارىن ىسكە اسىرۋ كوزدەلگەن. جەرگىلىكتى جانە حالىقارالىق سەرىكتەستەرمەن بىرلەسىپ جۇزەگە اسىرىلاتىن بۇل جوبالار ەلدىڭ ەلەكتر ەنەرگياسىنا دەگەن سۇرانىسىن قامتاماسىز ەتۋگە ۇلەس قوسىپ قانا قويماي، تابيعي گازدى ۇنەمدەۋگە جانە كومىرقىشقىل گازى شىعارىندىلارىن ايتارلىقتاي ازايتۋعا مۇمكىندىك بەرەدى.
