«كىتاپ وقيتىن ۇلت» جوباسى اياسىندا تۇركىستان وبلىسىنىڭ اكىمى نۇرالحان كوشەروۆ كىتاپ تاڭداۋ ەستافەتاسىن ماڭعىستاۋ وبلىسىنىڭ اكىمى نۇرداۋلەت قيلىباي يگىلىكۇلىنا جولدادى.
ايماق باسشىسى ەستافەتانى دارحان ساتىبالدىدان قابىل الىپ، يگى باستامانى جالعاستىردى.
بۇل باستاما اياسىندا كىتاپسۇيەر قاۋىمعا قازاق ادەبيەتىنىڭ كورنەكتى وكىلى ءىلياس جانسۇگىروۆتىڭ «جولداستار» رومانى وقۋعا ۇسىنىلدى.
جوبا اياسىنداعى challenge شارتتارى دا جاريالاندى. وعان سايكەس قاتىسۋشىلار:
- ءىلياس جانسۇگىروۆتىڭ «جولداستار» رومانىن وقۋى كەرەك;
- وقىعان شىعارما بويىنشا قويىلعان سۇراققا تىكەلەي ەفيردە جاۋاپ بەرۋى ءتيىس.
ۇيىمداستىرۋشىلاردىڭ ايتۋىنشا، بۇل باستامانىڭ ماقساتى – جاستار اراسىندا كىتاپ وقۋعا دەگەن قىزىعۋشىلىقتى ارتتىرۋ جانە قازاق ادەبيەتىن كەڭىنەن ناسيحاتتاۋ.
سونىمەن قاتار جوبا اياسىندا بەلسەندى قاتىسۋشىلارعا ىنتالاندىرۋ سىيلىقتارى قاراستىرىلعان. ەڭ ەرەكشە جاۋاپ بەرگەن قاتىسۋشىعا iPhone ۇتىسى بەرىلەدى.
ۇقساس جاڭالىقتار
