فرانتسيا ۇلتتىق فۋتبول قۇراماسىنىڭ باس باپكەرى ديدە دەشام قىزمەتىنەن كەتتى. بۇل تۋرالى فرانتسيا فۋتبول فەدەراتسياسى رەسمي مالىمدەدى، دەپ حابارلايدى "ادىرنا".
فەدەراتسيا دەشامعا 2012 جىلدان بەرى ۇلتتىق قۇراماداعى ەڭبەگى ءۇشىن العىس ءبىلدىرىپ، ونىڭ فرانتسۋز فۋتبولىنىڭ دامۋىنا قوسقان ۇلەسىن جوعارى باعالادى.
«ديدە دەشام ءتارتىپتىڭ، تالاپشىلدىقتىڭ، بىرلىكتىڭ جانە فرانتسيا قۇراماسىنىڭ كوك جەيدەسىنە دەگەن ادالدىقتىڭ سيمۆولىنا اينالدى. ونىڭ جەتەكشىلىگىمەن ۇلتتىق قۇراما 2018 جىلى الەم چەمپيونى اتانىپ، 2021 جىلى ۇلتتار ليگاسىن جەڭىپ الدى. سونداي-اق بىرنەشە مارتە ءىرى حالىقارالىق تۋرنيرلەردىڭ فينالىنا شىعىپ، الەمدىك فۋتبولداعى كوشباسشى كوماندالاردىڭ ءبىرى رەتىندە تۇراقتى ناتيجەلەر كورسەتتى»، – دەلىنگەن فەدەراتسيا حابارلاماسىندا.
رەسمي مالىمەتكە سايكەس، دەشام باس باپكەر رەتىندە فرانتسيا قۇراماسىن 185 ماتچقا باستاپ شىعىپ، ونىڭ 120-سىندا جەڭىسكە جەتكەن. ول تەك جوعارى ناتيجەلەرگە قول جەتكىزىپ قانا قويماي، جەڭىسكە دەگەن ۇمتىلىس پەن جاۋاپكەرشىلىك مادەنيەتىن قالىپتاستىرىپ، كەيىنگى بۋىنعا ۇلگى بولاتىن مۇرا قالدىردى.
فەدەراتسيانىڭ اتاپ وتۋىنشە، دەشام حالىقارالىق دەڭگەيدەگى كوپتەگەن فۋتبولشىنىڭ قالىپتاسۋىنا ىقپال ەتىپ، ءار بۋىندى ورتاق قۇندىلىقتار توڭىرەگىنە توپتاستىرا ءبىلدى. سونىمەن قاتار ول جانكۇيەرلەر مەن ۇلتتىق قۇرامانىڭ اراسىنداعى بايلانىستى نىعايتۋعا زور ۇلەس قوستى.
ديدە دەشام 1998 جىلعى الەم چەمپيوناتى مەن 2000 جىلعى ەۋروپا چەمپيوناتىندا فرانتسيا قۇراماسىنىڭ كاپيتانى رەتىندە جەڭىسكە جەتسە، اراعا جيىرما جىل سالىپ، 2018 جىلى ءدال سول قۇرامانى الەم چەمپيونى اتاندىرعان باپكەر رەتىندە تاريحقا ەندى.
«ويىنشى رەتىندە دە، باس باپكەر رەتىندە دە فرانتسيا قۇراماسىنا وسىنداي ادالدىقپەن قىزمەت ەتكەن جاندار وتە از. ونىڭ ەڭبەگى كلەرفونتەندەگى ۇلتتىق وقۋ-جاتتىعۋ بازاسىندا عانا ەمەس، ميلليونداعان جانكۇيەردىڭ جۇرەگىندە ماڭگى ساقتالادى. فرانتسيا فۋتبول فەدەراتسياسى وعان شىنايى العىسىن بىلدىرەدى. راقمەت، ديدە!» – دەپ قورىتىندىلادى فەدەراتسيا.
