فۋتبولدان قازاقستان ۇلتتىق قۇراماسىنىڭ باس باپكەرى دجون ۆان ’ت سحيپ مولدوۆادان جەڭىلگەننەن كەيىن قىزمەتىنەن كەتۋ جوسپارى جوق ەكەنىن ايتتى، دەپ حابارلايدى "ادىرنا" ۇلتتىق پورتالى TengriSport-قا سىلتەپ.
ۇلتتار ليگاسىنىڭ العاشقى ءۇش كەزدەسۋىندە قازاقستان قۇراماسى جەڭىسكە جەتپەدى. كوماندا فارەر ارالدارىمەن تەڭ ويناپ، كەيىن سلوۆاكيا مەن مولدوۆادان جەڭىلدى.
«استانا ارەنادا» وتكەن ماتچتان كەيىن باس باپكەرگە وتستاۆكاعا كەتۋ تۋرالى سۇراق قويىلدى. نيدەرلاندىلىق مامان شەشىم قابىلداۋ ءوز قۇزىرەتىندە ەمەس ەكەنىن ايتىپ، جۇمىسىن جالعاستىرۋعا نيەتتى ەكەنىن جەتكىزدى.
«مەن وتستاۆكاعا كەتۋدى جوسپارلاپ وتىرعان جوقپىن. جۇمىسىمدى جالعاستىرامىن دەپ ۇمىتتەنەمىن. ءبىز ءبارىمىز بىرگە جەڭىلدىك. ەندى الداعى ويىندارعا جاقسىراق دايىندالۋىمىز كەرەك»، – دەدى دجون ۆان ’ت سحيپ.
ايتا كەتەيىك، 62 جاستاعى مامان قازاقستان قۇراماسىنىڭ باس باپكەرى قىزمەتىنە 7 تامىزدا تاعايىندالعان. ول بۇعان دەيىن گرەكيا مەن ارمەنيا ۇلتتىق قۇرامالارىن جاتتىقتىرعان.
