جۋرناليست، پيار مامانى ەربول ازانبەك پرەزيدەنت توقاەۆتىڭ پرەزيدەنتتىگى كەزەڭىندە ەلدىڭ ۇزاقمەرزىمدى دامۋىنا ىقپال ەتەتىن ەڭ ماڭىزدى رەفورمالار كولىك-لوگيستيكا جانە قارجى-بانك جۇيەسىندە جۇرگىزىلگەنى تۋرالى ايتتى، دەپ حابارلايدى "ادىرنا".
ونىڭ ايتۋىنشا، پاندەميا، جاھاندىق ينفلياتسيا جانە گەوساياسي تۇراقسىزدىق جاعدايىندا قازاقستان كولىك ينفراقۇرىلىمىن جاڭعىرتۋعا باسىمدىق بەردى. سوڭعى جىلدارى دوستىق – مويىنتى، باقتى – اياگوز، داربازا – ماقتاارال تەمىرجول جوبالارى ىسكە قوسىلىپ، الماتىنى اينالىپ وتەتىن تەمىرجول جەلىسىنىڭ قۇرىلىسى قولعا الىندى. سونىمەن قاتار 125 تەمىرجول ۆوكزالىن جاڭعىرتۋ، حالىقارالىق اۆتودالىزدەردى كەڭەيتۋ، شەكاراداعى وتكىزۋ بەكەتتەرىن جاڭارتۋ جانە جۇك تاسىمالىن تسيفرلاندىرۋ جۇمىستارى جۇرگىزىلىپ جاتىر.
مەديا ماماننىڭ پىكىرىنشە، ەرەكشە نازار ترانسكاسپي حالىقارالىق كولىك باعىتىن (ورتا ءدالىز) دامىتۋعا اۋدارىلعان. ناتيجەسىندە 2024 جىلى بۇل باعىت ارقىلى تاسىمالدانعان جۇك كولەمى 62 پايىزعا ارتىپ، 4,5 ميلليون تونناعا جەتكەن. سونداي-اق اقتاۋ جانە قۇرىق پورتتارىن كەڭەيتۋ، كونتەينەرلىك تەرمينالدار سالۋ جانە مۋلتيمودالدى تاسىمالدى دامىتۋ جۇمىستارى جالعاسۋدا.
ەربول ازانبەك قارجى جانە بانك جۇيەسىندە دە سوڭعى جىلدارى جۇيەلى رەفورمالار جۇرگىزىلگەنىن اتاپ ءوتتى. ونىڭ ايتۋىنشا، «قازاقستان رەسپۋبليكاسىنداعى بانكتەر جانە بانك قىزمەتى تۋرالى» جاڭا زاڭ قابىلدانىپ، بازالىق جانە امبەباپ بانكتىك ليتسەنزيالار ەنگىزىلدى. سونىمەن قاتار كورپوراتيۆتىك باسقارۋ تالاپتارى كۇشەيتىلىپ، حالىقارالىق بانك قاداعالاۋ ستاندارتتارى ەنگىزىلدى، يسلامدىق قارجىلاندىرۋدى دامىتۋعا جانە تسيفرلىق قارجى اكتيۆتەرىن قۇقىقتىق رەتتەۋگە مۇمكىندىك جاسالدى.
سونىمەن قاتار، كرەديتتىك الاياقتىقتىڭ الدىن الۋ تەتىكتەرى كۇشەيتىلىپ، بيومەتريالىق سايكەستەندىرۋ كەڭەيتىلدى، ازاماتتاردىڭ قۇقىقتارىن قورعاۋعا باعىتتالعان جاڭا نورمالار قابىلداندى. بۇدان بولەك، سوتتان تىس بانكروتتىق راسىمدەرى جەڭىلدەتىلىپ، قارىزداردى قايتا قۇرىلىمداۋ مۇمكىندىكتەرى كەڭەيتىلدى.
ول تسيفرلىق قارجى جۇيەسىنىڭ قارقىندى دامۋىنا دا توقتالدى. سوڭعى جىلدارى قازاقستاندا ءموبيلدى تولەمدەر، QR ارقىلى تولەم جاساۋ، ونلاين نەسيە بەرۋ، تسيفرلىق مەملەكەتتىك قىزمەتتەر مەن بانكتەردىڭ تسيفرلىق ەكوجۇيەلەرى كەڭىنەن دامىعان. سونىمەن بىرگە بىرىڭعاي QR جۇيەسى ىسكە قوسىلىپ، تسيفرلىق تەڭگە اينالىمعا ەنگىزىلگەن.
ەربول ازانبەكتىڭ پىكىرىنشە، سوڭعى بەس-جەتى جىلدا جۇزەگە اسقان رەفورمالار قازاقستاننىڭ كولىك-لوگيستيكا جانە قارجى سالالارىنىڭ دامۋىنا جاڭا سەرپىن بەردى.
