مەملەكەت باسشىسىنىڭ سۇحباتىن وقىپ، تانىستىق. قوعامداعى بىرقاتار سۇراقتاردىڭ جاۋابىن الدىق. سونىمەن قاتار، ەلىمىزدىڭ رۋحاني بولمىسى، ۇلتتىق تاريح، قوعامنىڭ دامۋى باعىتىندا دا بىرقاتار سۇبەلى ويلار قوزعالعان ەكەن. ارينە، بۇل باعىتتا پرەزيدەنت ەڭ باستىسى تاعى دا ابايدى الدىعا شىعارعان. باسقاشا بولۋى دا مۇمكىن ەمەس. ويتكەنى مەملەكەت باسشىسىنىڭ ءوزى ايتقانىنداي اباي ءىلىمى – بارىنەن بيىك.
پرەزيدەنتتىڭ ءار الاڭدارداعى ءسوزىن پايىمداساق، ول ابايعا سۇيەنەتىنىن اڭعارۋعا بولادى. ۇلتتىڭ جاڭا ساپاسىن قالىپتاستىرۋدا قاسىم-جومارت توقاەۆ اباي وسيەتىنە باس ۇرادى. سەبەبى، اباي مۇراسى – تەك وتكەننىڭ ەنشىسى ەمەس، بۇگىن مەن بولاشاقتىڭ دا رۋحاني باعدارشامى. ول ادامگەرشىلىك، ءبىلىم جانە ادىلەت ارقىلى قوعامنىڭ دامۋىنا جول سىلتەيدى. مىسالى، ابايدىڭ «بەس نارسەدەن قاشىق بول، بەس نارسەگە اسىق بول» دەگەن وسيەتى ادامعا قاۋىپتى ءىس-ارەكەتتەردەن ساق بولۋعا ۇندەيدى. ال، ۇلتتىق قۇرىلتايدىڭ ءىىى وتىرىسىنداعى پرەزيدەنت سوزىندە بۇل ويدىڭ قازىرگى زامانعا بەيىمدەلگەن نۇسقاسى كورىنىس تاپتى. ول ابايدىڭ دانالىعىن قازىرگى قوعامداعى سىن-قاتەرلەرمەن ساباقتاستىرا وتىرىپ، نازاردى جاڭا بەس كەسەلگە اۋداردى: ناشاقورلىق، قۇمارپازدىق (لۋدومانيا), تۇرمىستىق زورلىق-زومبىلىق، ۆانداليزم جانە ىسىراپشىلدىق. بۇل قاۋىپتەرگە قارسى كۇرەس تەك زاڭدىق جولمەن ەمەس، ەڭ الدىمەن سانا مەن تاربيەدەن باستالۋى ءتيىس ەكەنى ايتىلدى.
اباي قوعامدى ادىلەتتىلىك پەن جاۋاپكەرشىلىك ارقىلى جاڭعىرتۋعا شاقىرسا، پرەزيدەنت بۇل مۇرانى ناقتى ءىس-ارەكەتكە اينالدىرۋ ارقىلى ەلدىڭ رۋحاني جاڭعىرۋىن قامتاماسىز ەتۋدى ماقسات ەتەدى. ۇرپاقتىڭ بولاشاعىنا الاڭداپ، ابايدىڭ دانالىق ويلارىن مەملەكەتتىڭ ستراتەگيالىق باعىتىنا ەنگىزۋ – قازاقستاننىڭ سانالى، ادىلەتتى قوعام رەتىندە قالىپتاسۋىنا جاسالعان ماڭىزدى قادام.
بىزدىكى اباي ءىلىمى مەن پرەزيدەنتتىڭ ساياساتى ءبىر ارنادا توعىسىپ، رۋحاني نەگىزى بەرىك، بولاشاعى نىق قازاقستاندى قۇرۋعا قىزمەت ەتە بەرسىن دەگەن تىلەك. ەلدىڭ اداسپاي، ۇلتتىڭ بولمىسىن ساقتاپ قالۋى، جاستاردىڭ ساناسىن تەرىس ىقپالداردان قورعاۋى، ۇلتتىڭ جاڭا ساپاسىنىڭ قالىپتاسۋى – وسى ءىلىم مەن مەملەكەتتىڭ بىرلەسكەن ۇمتىلىسىنىڭ جەمىسى بولماق.
