ارال اۋدانىندا تۇيە سۇتىنەن قۇرعاق ۇنتاق شىعاراتىن زاۋىت ىسكە قوسىلدى

بۇگىن ايماق باسشىسى مۇرات ەرگەشباەۆ، وبلىس پروكۋرورى ريزابەك وجاروۆ، زيالى قاۋىم وكىلدەرى مەن ەل اعالارى ارال قالاسىنداعى تۇيە سۇتىنەن قۇرعاق ۇنتاق شىعاراتىن زاۋىتتىڭ اشىلۋ راسىمىنە قاتىستى. 

سالتاناتتى شارادا وبلىس اكىمى بۇل باستاما ءوڭىردىڭ وندىرىستىك قۋاتىن نىعايتۋعا، الەۋمەتتىك-ەكونوميكالىق دامۋىنا وڭ ىقپال ەتەتىنىن اتاپ ءوتتى. 

«بارشاڭىزدى ايماعىمىز ءۇشىن ماڭىزدى جوبالاردىڭ ءبىرى – تۇيە سۇتىنەن ۇنتاق شىعارۋ زاۋىتىنىڭ رەسمي اشىلۋىمەن قۇتتىقتايمىن! بۇل ءوڭىر ەكونوميكاسىنىڭ دامۋىنا تىڭ سەرپىن، ەلىمىزدىڭ ەكسپورتتىق الەۋەتىن ارتتىرۋعا، جاڭا جۇمىس ورىندارىن اشۋعا مول مۇمكىندىك بەرەدى.

مەملەكەت باسشىسى قاسىم-جومارت كەمەلۇلى 
«جاڭا ينۆەستيتسيالار ەڭ الدىمەن ەلىمىزدەگى زاماناۋي ونەركاسىپتىڭ نەگىزىن قالىپتاستىرۋعا باعىتتالۋى كەرەك»، - دەگەن بولاتىن.
وسى رەتتە ايماعىمىزدا ءىرى ينۆەستيتسيالىق جوبالار ءساتتى جۇزەگە اسۋدا. سونىڭ ءبىرى -  3 ملرد تەڭگەگە سالىنعان «قازاق كەمەل» كومپانياسىنىڭ تۇيە سۇتىنەن قۇرعاق ۇنتاق دايىنداۋ زاۋىتى. 
جالپى، ەلىمىزدە تۇيە ءسۇتىن وڭدەيتىن كاسىپورىندار بار بولعانىمەن، ونەركاسىپتىك دەڭگەيدە قۇرعاق ۇنتاق وندىرەتىن زاۋىتتار وتە از. سوندىقتان بۇل - بىرەگەي ءارى ماڭىزدى باستاما»، - دەدى مۇرات نالقوجاۇلى. 

جىلىنا شامامەن 400 توننا ءونىم وندىرىلەتىن بۇل زاۋىتتا  23 ادام تۇراقتى جۇمىسپەن قامتىلادى.  تۇيە ءسۇتىن قۇرعاق ۇنتاققا اينالدىرۋ ءۇشىن كۇنىنە 20 مىڭ ليتر ءسۇت قاجەت. بۇل جەرگىلىكتى تۇرعىندار ءۇشىن ءتيىمدى بولماق.  تۇيە ءسۇتىن كۇندەلىكتى وتكىزىپ، تۇراقتى تابىس تابادى. جەرگىلىكتى ونىمگە سۇرانىستى ارتتىرۋ ماقساتىندا كەلىسىمشارت جاسالىپ، الداعى 10 جىلدا قىتاي نارىعىنا ەكسپورتتالادى. مەملەكەتتىك قولداۋ اياسىندا يندۋستريالىق ايماقتان 1 گەكتار جەر تەلىمى بەرىلگەن. سونداي-اق «ونەركاسىپتى دامىتۋ قورى» ارقىلى قىتايدان قاجەتتى تەحنولوگيالىق جابدىقتاردى ساتىپ الۋعا 1,8 ملرد. تەڭگە قارجى قاراستىرىلدى.

راسىمدە وبلىس پروكۋرورى ريزابەك وجاروۆ، ەل اعالارى ايتباي كوشەرباي، ادىلبەك ايىمبەتوۆ ءسوز سويلەپ، اۋداننىڭ الەۋمەتتىك-ەكونوميكالىق دامۋىنا ۇلەس قوسقان جانە زاۋىتتىڭ ىسكە قوسىلۋىنا اتسالىسقان  ازاماتتار وبلىس اكىمىنىڭ العىس حاتىمەن ماراپاتتالدى.

وڭىردە ەكونوميكانى ءارتاراپتاندىرۋ ماقساتىندا الداعى ءۇش جىلدا 1 ترلن. 900 ملرد. تەڭگەگە  48 ينۆەستيتسيالىق جوبا جۇزەگە اسىرىلىپ، 10 مىڭنان اسا جاڭا جۇمىس ورنى اشىلماق. بيىل 100 ملرد. تەڭگەگە 21 جوبا ىسكە قوسىلادى دەپ جوسپارلانعان.