شىلدە ايىنىڭ العاشقى جەكسەنبىسىندە باتىس قازاقستان وبلىسى بۇكىل ەلمەن بىرگە ۇلتتىق دومبىرا كۇنىن اتاپ وتۋدە. مەرەكەلىك ءىس-شارالار وبلىستىڭ بارلىق 12 اۋدانىندا جانە ورال قالاسىندا ۇيىمداستىرىلىپ، مىڭداعان تۇرعىننىڭ باسىن قوستى. باعدارلاما اياسىندا كونتسەرتتەر، شىعارماشىلىق اكتسيالار، دومبىراشىلار بايقاۋى، ۇلتتىق سپورت تۇرلەرىنەن جارىستار، مارافوندار، كورمەلەر جانە اۋقىمدى فلەشموبتار وتكىزىلۋدە.
تاڭەرتەڭنەن باستاپ مەرەكەلىك كوڭىل كۇي قالالار مەن اۋىلداردىڭ ورتالىق الاڭدارىندا، مادەنيەت ۇيلەرىندە، ساياباقتاردا جانە قوعامدىق كەڭىستىكتەردە سەزىلۋدە. مۇندا قۇرمانعازى، داۋلەتكەرەي، دينا نۇرپەيىسوۆا، قازانعاپ سىندى ۇلى كۇيشى-كومپوزيتورلاردىڭ ماڭگىلىك كۇيلەرى ورىندالۋدا.
بيىل بالالار مەن جاستاردىڭ قاتىسۋىنا ەرەكشە كوڭىل ءبولىندى. ماسەلەن، ءبورلى اۋدانىندا مۋزىكا مەكتەپتەرى مەن شىعارماشىلىق ۇيىرمەلەردىڭ 300-گە جۋىق تاربيەلەنۋشىسى قاتىسقان اۋقىمدى فلەشموب ۇيىمداستىرىلدى. جاس دومبىراشىلار قازاقتىڭ ايگىلى كۇيلەرىن ءبىر مەزەتتە ورىنداپ، ۇلتتىق ونەردىڭ ساباقتاستىعى مەن ءداستۇردىڭ ۇرپاقتان-ۇرپاققا جالعاسىپ كەلە جاتقانىن كورسەتتى.
مەرەكەلىك شارالار كونتسەرتتىك الاڭدارمەن عانا شەكتەلگەن جوق. ورال قالاسىندا قوعامدىق كولىك تە ەرەكشە شىعارماشىلىق الاڭعا اينالدى. قالالىق اۆتوبۋستاردا مۋزىكا مەكتەپتەرىنىڭ تاربيەلەنۋشىلەرى جولاۋشىلارعا ارناپ دومبىرادا قازاقتىڭ بەلگىلى كۇيلەرىن ورىنداپ، جول ۇستىندە ەرەكشە مەرەكەلىك اتموسفەرا سىيلادى. كۇتپەگەن مۋزىكالىق تارتۋ قالا تۇرعىندارىنىڭ ىستىق ىقىلاسىنا بولەنىپ، جولاۋشىلار جاس ونەرپازدارعا قول سوعىپ، ولاردىڭ ونەرىن بەينەجازباعا ءتۇسىرىپ، تانىس كۇيلەردى بىرگە ىڭىلداپ وتىردى.
ۇيىمداستىرۋشىلاردىڭ ايتۋىنشا، ۇلتتىق دومبىرا كۇنىنىڭ باستى ماقساتى – قازاق حالقىنىڭ باي مۋزىكالىق مۇراسىن ساقتاۋ، ۇلتتىق ونەردى دارىپتەۋ جانە ءداستۇرلى كۇي ونەرىنە دەگەن سۇيىسپەنشىلىكتى جاس ۇرپاققا جەتكىزۋ. سوندىقتان ءداستۇرلى كونتسەرتتىك باعدارلامالار فلەشموبتارمەن، شىعارماشىلىق اكتسيالارمەن، ينتەراكتيۆتى الاڭدارمەن جانە اشىق اسپان استىنداعى ونەر كورسەتۋلەرمەن تولىقتىرىلدى.
مەرەكەنىڭ شارىقتاۋ شەگى كەشكى ۋاقىتتا ورال قالاسىندا وتەتىن «دومبىرا – ءداۋىر ءۇنى» اتتى مۋزىكالىق مارافون بولماق. سالتاناتتى شاراعا وبلىس باسشىلىعى قاتىسادى. مەرەكەلىك كەشتە داۋلەتكەرەي اتىنداعى قازاق حالىق اسپاپتار وركەسترى، ءوڭىردىڭ بەلگىلى ونەرپازدارى مەن شىعارماشىلىق ۇجىمدارى ونەر كورسەتەدى. كەش سوڭىندا قاتىسۋشىلار قازاقتىڭ ايگىلى كۇيلەرىن بىرلەسە ورىنداپ، ۇلتتىق مۇراعا دەگەن قۇرمەت پەن ۇرپاقتار ساباقتاستىعىن پاش ەتەدى.
ورال قالاسىنىڭ تۇرعىنى ەرلان ساعىندىقوۆتىڭ ايتۋىنشا، ۇلتتىق دومبىرا كۇنى بۇگىندە ءتۇرلى بۋىن وكىلدەرىن بىرىكتىرەتىن ەرەكشە مەرەكەگە اينالعان.
«دومبىرا – جاي عانا مۋزىكالىق اسپاپ ەمەس. ول – حالقىمىزدىڭ تاريحى، مادەنيەتى مەن ۇلتتىق رۋحىنىڭ سيمۆولى. بالالاردىڭ دومبىرانى ەرەكشە ىقىلاسپەن ورىنداپ جاتقانىن كورگەندە، ۇلتتىق ءداستۇرىمىزدىڭ جالعاسىپ كەلە جاتقانىن سەزىنەسىڭ. وسىنداي مەرەكەلەر جاستاردىڭ ءوز تامىرىنا دەگەن قۇرمەتىن ارتتىرىپ، مادەني مۇرامىزدى باعالاۋعا تاربيەلەيدى»، – دەيدى ول.
جىل سايىن ۇلتتىق دومبىرا كۇنى ەلىمىزدەگى ەڭ اۋقىمدى مادەني مەرەكەلەردىڭ بىرىنە اينالىپ كەلەدى. بيىل دا باتىس قازاقستان وبلىسىندا ۇيىمداستىرىلعان مەرەكەلىك باعدارلاما ۇلتتىق مۋزىكا مەن مادەنيەتكە دەگەن قىزىعۋشىلىقتىڭ ارتىپ كەلە جاتقانىن ايقىن كورسەتىپ، ءوڭىر تۇرعىندارىن قازاق حالقىنىڭ رۋحاني مۇراسىن ايشىقتايتىن قاسيەتتى دومبىرانىڭ توڭىرەگىنە توپتاستىردى.
