Şılde aiynyŋ alǧaşqy jeksenbısınde Batys Qazaqstan oblysy bükıl elmen bırge Ūlttyq dombyra künın atap ötude. Merekelık ıs-şaralar oblystyŋ barlyq 12 audanynda jäne Oral qalasynda ūiymdastyrylyp, myŋdaǧan tūrǧynnyŋ basyn qosty. Baǧdarlama aiasynda konsertter, şyǧarmaşylyq aksiialar, dombyraşylar baiqauy, ūlttyq sport türlerınen jarystar, marafondar, körmeler jäne auqymdy fleşmobtar ötkızılude.
Taŋerteŋnen bastap merekelık köŋıl küi qalalar men auyldardyŋ ortalyq alaŋdarynda, mädeniet üilerınde, saiabaqtarda jäne qoǧamdyq keŋıstıkterde sezılude. Mūnda Qūrmanǧazy, Däuletkerei, Dina Nūrpeiısova, Qazanǧap syndy ūly küişı-kompozitorlardyŋ mäŋgılık küilerı oryndaluda.
Biyl balalar men jastardyŋ qatysuyna erekşe köŋıl bölındı. Mäselen, Börlı audanynda muzyka mektepterı men şyǧarmaşylyq üiırmelerdıŋ 300-ge juyq tärbielenuşısı qatysqan auqymdy fleşmob ūiymdastyryldy. Jas dombyraşylar qazaqtyŋ äigılı küilerın bır mezette oryndap, ūlttyq önerdıŋ sabaqtastyǧy men dästürdıŋ ūrpaqtan-ūrpaqqa jalǧasyp kele jatqanyn körsettı.
Merekelık şaralar konserttık alaŋdarmen ǧana şektelgen joq. Oral qalasynda qoǧamdyq kölık te erekşe şyǧarmaşylyq alaŋǧa ainaldy. Qalalyq avtobustarda muzyka mektepterınıŋ tärbielenuşılerı jolauşylarǧa arnap dombyrada qazaqtyŋ belgılı küilerın oryndap, jol üstınde erekşe merekelık atmosfera syilady. Kütpegen muzykalyq tartu qala tūrǧyndarynyŋ ystyq yqylasyna bölenıp, jolauşylar jas önerpazdarǧa qol soǧyp, olardyŋ önerın beinejazbaǧa tüsırıp, tanys küilerdı bırge yŋyldap otyrdy.
Ūiymdastyruşylardyŋ aituynşa, Ūlttyq dombyra künınıŋ basty maqsaty – qazaq halqynyŋ bai muzykalyq mūrasyn saqtau, ūlttyq önerdı därıpteu jäne dästürlı küi önerıne degen süiıspenşılıktı jas ūrpaqqa jetkızu. Sondyqtan dästürlı konserttık baǧdarlamalar fleşmobtarmen, şyǧarmaşylyq aksiialarmen, interaktivtı alaŋdarmen jäne aşyq aspan astyndaǧy öner körsetulermen tolyqtyryldy.
Merekenıŋ şaryqtau şegı keşkı uaqytta Oral qalasynda ötetın «Dombyra – däuır ünı» atty muzykalyq marafon bolmaq. Saltanatty şaraǧa oblys basşylyǧy qatysady. Merekelık keşte Däuletkerei atyndaǧy qazaq halyq aspaptar orkestrı, öŋırdıŋ belgılı önerpazdary men şyǧarmaşylyq ūjymdary öner körsetedı. Keş soŋynda qatysuşylar qazaqtyŋ äigılı küilerın bırlese oryndap, ūlttyq mūraǧa degen qūrmet pen ūrpaqtar sabaqtastyǧyn paş etedı.
Oral qalasynyŋ tūrǧyny Erlan Saǧyndyqovtyŋ aituynşa, Ūlttyq dombyra künı bügınde türlı buyn ökılderın bırıktıretın erekşe merekege ainalǧan.
«Dombyra – jai ǧana muzykalyq aspap emes. Ol – halqymyzdyŋ tarihy, mädenietı men ūlttyq ruhynyŋ simvoly. Balalardyŋ dombyrany erekşe yqylaspen oryndap jatqanyn körgende, ūlttyq dästürımızdıŋ jalǧasyp kele jatqanyn sezınesıŋ. Osyndai merekeler jastardyŋ öz tamyryna degen qūrmetın arttyryp, mädeni mūramyzdy baǧalauǧa tärbieleidı», – deidı ol.
Jyl saiyn Ūlttyq dombyra künı elımızdegı eŋ auqymdy mädeni merekelerdıŋ bırıne ainalyp keledı. Biyl da Batys Qazaqstan oblysynda ūiymdastyrylǧan merekelık baǧdarlama ūlttyq muzyka men mädenietke degen qyzyǧuşylyqtyŋ artyp kele jatqanyn aiqyn körsetıp, öŋır tūrǧyndaryn qazaq halqynyŋ ruhani mūrasyn aişyqtaityn qasiettı dombyranyŋ töŋıregıne toptastyrdy.
