باتىس قازاقستان وبلىسىندا قىزمەتتىك مىندەتىن اتقارۋ كەزىندە ەكى پوليتسيا قىزمەتكەرى قازا تاپتى، دەپ حابارلايدى "ادىرنا" ۇلتتىق پورتالى.
بۇل تۋرالى ىشكى ىستەر ءمينيسترى ەرجان سادەنوۆ مالىمدەدى.
مينيستر الەۋمەتتىك جەلىدەگى پاراقشاسىندا قازا بولعان پوليتسەيلەردىڭ تۋعان-تۋىستارى مەن جاقىندارىنا كوڭىل ايتتى.
«قىزمەتتىك مىندەتتەرىن اتقارۋ كەزىندە قازا تاپقان باتىس قازاقستان وبلىسى پد تاسقالا اۋداندىق پوليتسيا ءبولىمىنىڭ قىزمەتكەرلەرى – پوليتسيا مايورى ابزال ۇمبەتقاليەۆ پەن پوليتسيا اعا سەرجانتى نۇرعالي اديەتوۆتىڭ تۋعان-تۋىستارى مەن جاقىندارىنا كوڭىل ايتامىن»، – دەپ جازدى ەرجان سادەنوۆ.
سونىمەن قاتار ىشكى ىستەر ءمينيسترى ۆەدومستۆو تاراپىنان قازا تاپقان پوليتسيا قىزمەتكەرلەرىنىڭ وتباسىلارىنا جان-جاقتى قولداۋ كورسەتىلەتىنىن جەتكىزدى.
وقيعانىڭ ءمان-جايى تۋرالى ازىرگە قوسىمشا اقپارات جاريالانعان جوق.
