بۇگىن، 2 شىلدە – قازاقستان حالىق جازۋشىسى، اقىن ءارى قوعام قايراتكەرى مۇحتار شاحانوۆتىڭ تۋعان كۇنى، دەپ حابارلايدى «ادىرنا» ءتىلشىسى.
ول 1942 جىلى 2 شىلدەدە تۇركىستان وبلىسى، تولە بي اۋدانىنداعى قاسقاسۋ اۋىلىندا دۇنيەگە كەلگەن. جەتى جىلدىق مەكتەپتى بىتىرگەن سوڭ تراكتوردىڭ تىركەۋشىسى، وبلىستىق «وڭتۇستىك قازاقستان» گازەتىندە كوررەكتور، ادەبي قىزمەتكەر، «لەنينشىل جاس» گازەتىندە وڭتۇستىك وبلىستار بويىنشا مەنشىكتى ءتىلشى، قازاقستان جازۋشىلار وداعى باسقارماسىنىڭ حاتشىسى، رەسپۋبليكالىق «جالىن» جۋرنالىنىڭ باس رەداكتورى، ت.ب. قىزمەتتەر اتقارعان. كسرو حالىق دەپۋتاتى، كسرو جوعارعى كەڭەسىنىڭ مۇشەسى، قر حالىق دەپۋتاتى بولعان.
العاشقى ولەڭدەر جيناعى 24 جاسىندا جارىق كورگەن. ونىڭ «وركەنيەتتىڭ اداسۋى»، «جازاگەر جادى كوسموفورمۋلاسى» (شىڭعىس حاننىڭ پەندەلىك قۇپياسى) اتتى روماندارى يۋنەسكو شەڭبەرىندە قارالدى.
شاحانوۆ 1993-2003 جىلدارى قازاقستان رەسپۋبليكاسىنىڭ قىرعىز رەسپۋبليكاسىنداعى توتەنشە جانە وكىلەتتى ەلشىسى قىزمەتىن اتقارعان. 2003-2004 جىلدارى «جالىن» جۋرنالىنىڭ باس رەداكتورى، الەم ويشىلدارىنىڭ باسىن بىرىكتىرەتىن ء«ححى عاسىر جانە رۋحانيات» اتتى حالىقارالىق ەليتا كلۋبىنىڭ پرەزيدەنتى، 2004 جىلى قر پارلامەنتى ءماجىلىسىنىڭ دەپۋتاتى بولعان. كوپتەگەن ولەڭ كىتابى جانە حالىق اراسىنا كەڭ تاراعان بىرقاتار ءاننىڭ اۆتورى.
1986 جىلعى جەلتوقسان كوتەرىلىسىنە تىكەلەي قاتىسۋشى بولماسا دا، مۇحتار شاحانوۆ وقيعانىڭ شىندىعىن اشۋدا باستى ءرول اتقاردى. 1989 جىلى كسرو حالىق دەپۋتاتتارىنىڭ I سەزىندە (ماسكەۋ) جەلتوقسان وقيعاسىن العاش رەت وداقتىق دەڭگەيدە كوتەرىپ، رەسمي «ۇلتشىلدىق» دەگەن باعانى جوققا شىعارعان ەدى. ونىڭ باستاماسىمەن قازاقستاندا جەلتوقسان وقيعاسىن زەرتتەۋ كوميسسياسى قۇرىلىپ، شاحانوۆ ونىڭ توراعاسى بولدى. كوميسسيا قۇپيا قۇجاتتاردى اشىپ، 8 مىڭنان استام ادامنىڭ ۇستالعانىن، 90-نان استامىنىڭ سوتتالعانىن دالەلدەدى. بۇل جەلتوقسان قۇرباندارىنىڭ اقتالۋىنا نەگىز بولدى.
ايبىندى اقىن 20 ساۋىرگە قاراعان ءتۇنى 84 جاسقا قاراعان شاعىندا ومىردەن وزعان ەدى. ۇلت جاناشىرى تۋعان جەرى تۇركىستان وبلىسى، وتىرار اۋدانىنداعى ارىستان باب كەسەنەسىنىڭ ماڭىنداعى اۋىلعا جەرلەندى.
