كوكتەمدەگى كوڭىل-كۇي
كوكتەم سايىن اۋىلدى سۋ باسادى،
كوكتەم سايىن اعايىن شۋلاسادى.
سۋدان قۇرعاق شىعاتىن سۋايت كوكەم
سالى سۋعا كەتكەندەي ءتۇر جاسادى.
“بەلگىلى عوي تاسقىننىڭ جۇرەتىنى،
سابىر، سابىر” كوكەمنىڭ بىلەتىنى.
بالشىق باسىپ كورمەگەن سۋداي جاڭا،
شىركىن، قانداي ادەمى سۋ ەتىگى؟!
بۇلبۇل ۇشىپ باسىمنان مۇڭسىز داۋرەن،
كوكتەم سايىن جۇرەگىم ءجۇر سىزداۋمەن.
كوپىر سۋدىڭ قۇلادى قۇشاعىنا،
ءتىل تابىسىپ العانداي ءتىلسىز جاۋمەن.
كوكتەم سايىن ۇيلەرگە سۋ كىرەدى،
استاڭ-كەستەڭ قىلادى، بۇلدىرەدى.
قىستان كەيىن كوكتەمدى بولدىرماۋدىڭ
جولى بار ما، اعايىن، كىم بىلەدى؟
ناۋرىز - ناۋرىز بولا ما قىرسىقپاسا؟
قاردىڭ باسىن قار الىپ بىلشىتپاسا.
ءساۋىر ايىم كەلەر-اۋ ءتاۋىر ايىم،
ۋشىقپاسا، مال-جانىم تۇنشىقپاسا.
قوزعالمايتىن شىعارسىڭ ورىنىڭنان،
كوكە، سەنىڭ استىڭنان سۋ شىقپاسا.
ەرشات قايبولدين
