جۇرت ىشىندە ساراي اقىنى دەگەن اتپەن تانىمال اقىن بالتابەك نۇرعاليەۆ حالىقتان كەشىرىم سۇراپ، ءوز فەيسبۋك پاراقشاسىندا جازبا قالدىردى. بۇل تۋرالى "ادىرنا" ۇلتتىق پورتالى حابارلايدى.
ەستەرىڭىزگە سالا كەتەيىك، وسىدان بىرەر جىل بۇرىن بالتابەك نۇرعاليەۆ ەسىمدى اتىشۋلى اقىن ءوزىن قازاقتىڭ ۇلى اقىنى ءارى ويشىلى اباي قۇنانبايۇلىنان دا بيىك سانايتىنىن ايتىپ، «ماسەلە» باعدارلاماسىندا اعىنان جارىلعان ەدى.
- بۇكىل قازاق مەنى وقىپ ءجۇر. ءورىستىلدى بولسىن، قازاقتىلدى بولسىن جانە باسقا تىلدەگى اقىنداردىڭ ىشىندەگى، قازاقستاندىق پوەزياداعى ەڭ كوپ وقىلاتىن اقىن، ول – مەنمىن. ەشكىم باسقا اقىنداردى ۇيىندە تىعىلىپ، جاستانىپ، ءار ءارپىمدى، ءار بۋىنىمدى ساناپ، مەنى وقىعانداي وقىمايدى. قازاق پوەزياسىندا ءنومىرى ءبىرىنشى بولىپ مەن تۇرمىن دەپ ەسەپتەيمىن. مەن وعان سەنىمدىمىن، - دەدى بالتابەك اقىن.
ال، جۇرگىزۋشىنىڭ «ابايدىڭ الدىنا شىعىپ كەتكەن جوقسىز با؟» دەگەن كەلەسى سۇراعىنا:
- وقىلىم جاعىنان ابايدىڭ دا الدىنا شىعىپ كەتتىم دەپ ەسەپتەيمىن، - دەگەن ەدى ەش شىمىرىكپەستەن بالتابەك اقىن.
ارادا ەكى جىلعا جۋىق ۋاقىت وتكەن سوڭ بالتابەك اقىن «بيگىنەن» ءتۇسىپ، قاتەلىگى ءۇشىن حالىقتان كەشىرىم سۇرادى.
- قۇرمەتتى قازاقستاندىقتار، ىزگى باۋىرلار! مەن بۇگىن ابايدىڭ مەنەن دە كوپ وقىلاتىن اقىن ەكەنىنە كوزىم جەتتى. مويىندادىم. جالعىز اباي عانا ەمەس، جالپى قازاق ادەبيەتىندەگى بارلىق اقىندار مەنەن كوپ وقىلادى. مەن الەمدەگى ەڭ سوڭعى اقىنمىن. قازاقستاندىق پوەزياداعى، ورىس ءتىلدى بولسىن، قازاق ءتىلدى بولسىن، جالپى باسقا تىلدەردەگى اقىنداردىڭ ىشىندەگى ەڭ از وقىلاتىن اقىن، ول – مەنمىن. قازاق پوەزياسىندا از وقىلۋ جاعىنان ءنومىرى ءبىرىنشى بولىپ مەن تۇرمىن دەپ ەسەپتەيمىن. ابايدىڭ ولەڭى دە، دە ءوزى دە مەنەن الدا. مەن وقىلىم جاعىنان دا، باسقا ۇلىلىق جاعىنان دا، جاڭاشىلدىق جاعىنان دا ابايدىڭ الدىنا شىعىپ كەتكەن جوقپىن. قاتەلىگىم ءۇشىن قوعامنان كەشىرىم سۇرايمىن، - دەپ اعىنان جارىلدى.
ساراي اقىنى اتانىپ كەتكەن بالتابەك اقىننىڭ بۇل جازباسىنا جازىلىپ جاتقان پىكىرلەر دە كوپ ەكەن.
"ادىرنا" ۇلتتىق پورتالى
