الماتىدا ORDA.KZ اقپاراتتىق سايتىنىڭ تەڭ قۇرىلتايشىسى ءارى بۇرىنعى باس رەداكتورى گۇلنار باجكەنوۆاعا قاتىستى سوت پروتسەسى باستالادى. ءىس بوستاندىق اۋداندىق №2 سوتىندا وفلاين فورماتتا قارالادى.
گۇلنار باجكەنوۆاعا بىردەن ءۇش باپ بويىنشا ايىپ تاعىلىپ وتىر. ولار – قىلمىستىق كودەكستىڭ 189-بابى («سەنىپ تاپسىرىلعان بوتەن مۇلىكتى ءىرى مولشەردە يەمدەنۋ نەمەسە ىسىراپ ەتۋ»), 214-بابى («زاڭسىز كاسىپكەرلىك») جانە 274-بابى («كورىنەۋ جالعان اقپارات تاراتۋ»).
باجكەنوۆا 2025 جىلدىڭ 1 جەلتوقسانىنان بەرى ۇيقاماقتا. سول كۇنى پوليتسيا ونىڭ ءۇيى مەن Orda.kz رەداكتسياسىندا ءتىنتۋ جۇرگىزدى. كەيىن رەداكتسيانىڭ بىرنەشە قىزمەتكەرى جاۋاپ الۋعا شاقىرىلدى.
سوت وعان مەملەكەت ەسەبىنەن ادۆوكات تاعايىندادى.
ءىستىڭ ءمان-جايى
ءىس بويىنشا جابىرلەنۋشى رەتىندە «OrdaMedia.kz» جشس-ءنىڭ قۇرىلتايشىسى ءارى قازىرگى ديرەكتورى ماقسات عانيەۆ تانىلعان.
عانيەۆتىڭ ايتۋىنشا، ول 2020 جىلى كومپانيانى قۇرىپ، جوبانىڭ العاشقى ينۆەستورى بولعان. 2020–2021 جىلدارى كومپانيانىڭ جارعىلىق كاپيتالىن ءۇش رەت ۇلعايتىپ، جالپى 93 ميلليون تەڭگە سالعان. ونىڭ سوزىنشە، رەداكتسيانىڭ جۇمىسىنا ارالاسپاي، كومانداعا تولىق سەنىم ارتقان.
كاسىپكەردىڭ ايتۋىنشا، 2022 جىلدىڭ 22 تامىزىندا گۇلنار باجكەنوۆا كومپانيانىڭ 100 پايىز ۇلەسىن 93 ميلليون تەڭگەگە ساتىپ العان. تاراپتار ءۇش جىلعا ءبولىپ تولەۋگە كەلىسكەن.
الايدا بىرنەشە ايدان كەيىن، عانيەۆتىڭ سوزىنشە، باجكەنوۆا قارجىلىق قيىندىقتارعا تاپ بولعانىن ايتىپ، كومپانيانىڭ 70 پايىز ۇلەسىن قايتا ساتىپ الۋىن سۇراعان. كاسىپكەر بۇل ۇسىنىسقا كەلىسىپ، 2023 جىلدىڭ 7 اقپانىندا 70 پايىز ۇلەستى 65 ميلليون تەڭگەگە ساتىپ الىپ، اقشانى تولىق ءارى بىردەن تولەگەنىن ايتادى.
سونىمەن بىرگە، ونىڭ مالىمدەۋىنشە، 2022 جىلى ساتىلعان كومپانيانىڭ 100 پايىز ۇلەسى ءۇشىن ءۇش جىل ىشىندە بىردە-ءبىر تولەم تۇسپەگەن.
عانيەۆتىڭ ايتۋىنشا، تولەم مەرزىمى اياقتالعان سوڭ ول ماسەلەنى زاڭ اياسىندا شەشۋگە كىرىسكەن. ول اۋديت وتكىزۋدى ۇسىنىپ، كومپانيانىڭ قارجىلىق قۇجاتتارىن تالاپ ەتكەن جانە سوتقا جۇگىنگەن.
سونداي-اق كاسىپكەر ءبىر جىلعا جۋىق ۋاقىت بويى داۋدى سوتقا جەتكىزبەي شەشۋگە تىرىسقانىن، الايدا ونىڭ ۇسىنىستارى قابىلدانباعانىن ايتتى. ونىڭ سوزىنشە، قارجىلىق قۇجاتتاردى تەكسەرۋ كەزىندە زاڭبۇزۋشىلىق بەلگىلەرى انىقتالعان. بىراق سوت پروتسەسى جالعاسىپ جاتقاندىقتان، ولاردىڭ ءمان-جايىن جاريالامادى.
بۇدان بولەك، عانيەۆتىڭ ايتۋىنشا، بۇعان دەيىن باجكەنوۆا ءوزىن رەيدەرلىك جاسادى دەپ ەكونوميكالىق تەرگەپ-تەكسەرۋ دەپارتامەنتىنە ارىز بەرگەن. الايدا تەكسەرۋ بارىسىندا بۇل دەرەك راستالماعان، ءىس قۇقىق بۇزۋشىلىق وقيعاسى بولماعاندىقتان توقتاتىلعان.
سونىمەن قاتار، كاسىپكەردىڭ مالىمدەۋىنشە، تەكسەرۋ كەزىندە «OrdaMedia.kz» جشس قاراجاتىن جىمقىرۋ جانە ىسىراپ ەتۋ بەلگىلەرى انىقتالعان.
عانيەۆتىڭ پىكىرىنشە، بۇل جايتتار اۋديت بارىسىندا دا بەلگىلى بولار ەدى جانە داۋ ازاماتتىق تارتىپتە قارالاتىن ەدى. بىراق ونىڭ سوزىنشە، باجكەنوۆانىڭ ارىزىنىڭ ناتيجەسىندە بۇل ەپيزود قىلمىستىق ءىستىڭ ءبىر بولىگىنە اينالعان.
