Almatyda ORDA.KZ aqparattyq saitynyŋ teŋ qūryltaişysy ärı būrynǧy bas redaktory Gülnar Bäjkenovaǧa qatysty sot prosesı bastalady. Is Bostandyq audandyq №2 sotynda oflain formatta qaralady.
Gülnar Bäjkenovaǧa bırden üş bap boiynşa aiyp taǧylyp otyr. Olar – Qylmystyq kodekstıŋ 189-baby («Senıp tapsyrylǧan böten mülıktı ırı mölşerde iemdenu nemese ysyrap etu»), 214-baby («Zaŋsyz käsıpkerlık») jäne 274-baby («Körıneu jalǧan aqparat taratu»).
Bäjkenova 2025 jyldyŋ 1 jeltoqsanynan berı üiqamaqta. Sol künı polisiia onyŋ üiı men Orda.kz redaksiiasynda tıntu jürgızdı. Keiın redaksiianyŋ bırneşe qyzmetkerı jauap aluǧa şaqyryldy.
Sot oǧan memleket esebınen advokat taǧaiyndady.
Istıŋ män-jaiy
Is boiynşa jäbırlenuşı retınde «OrdaMedia.kz» JŞS-nıŋ qūryltaişysy ärı qazırgı direktory Maqsat Ǧaniev tanylǧan.
Ǧanievtıŋ aituynşa, ol 2020 jyly kompaniiany qūryp, jobanyŋ alǧaşqy investory bolǧan. 2020–2021 jyldary kompaniianyŋ jarǧylyq kapitalyn üş ret ūlǧaityp, jalpy 93 million teŋge salǧan. Onyŋ sözınşe, redaksiianyŋ jūmysyna aralaspai, komandaǧa tolyq senım artqan.
Käsıpkerdıŋ aituynşa, 2022 jyldyŋ 22 tamyzynda Gülnar Bäjkenova kompaniianyŋ 100 paiyz ülesın 93 million teŋgege satyp alǧan. Taraptar üş jylǧa bölıp töleuge kelısken.
Alaida bırneşe aidan keiın, Ǧanievtıŋ sözınşe, Bäjkenova qarjylyq qiyndyqtarǧa tap bolǧanyn aityp, kompaniianyŋ 70 paiyz ülesın qaita satyp aluyn sūraǧan. Käsıpker būl ūsynysqa kelısıp, 2023 jyldyŋ 7 aqpanynda 70 paiyz ülestı 65 million teŋgege satyp alyp, aqşany tolyq ärı bırden tölegenın aitady.
Sonymen bırge, onyŋ mälımdeuınşe, 2022 jyly satylǧan kompaniianyŋ 100 paiyz ülesı üşın üş jyl ışınde bırde-bır tölem tüspegen.
Ǧanievtıŋ aituynşa, tölem merzımı aiaqtalǧan soŋ ol mäselenı zaŋ aiasynda şeşuge kırısken. Ol audit ötkızudı ūsynyp, kompaniianyŋ qarjylyq qūjattaryn talap etken jäne sotqa jügıngen.
Sondai-aq käsıpker bır jylǧa juyq uaqyt boiy daudy sotqa jetkızbei şeşuge tyrysqanyn, alaida onyŋ ūsynystary qabyldanbaǧanyn aitty. Onyŋ sözınşe, qarjylyq qūjattardy tekseru kezınde zaŋbūzuşylyq belgılerı anyqtalǧan. Bıraq sot prosesı jalǧasyp jatqandyqtan, olardyŋ män-jaiyn jariialamady.
Būdan bölek, Ǧanievtıŋ aituynşa, būǧan deiın Bäjkenova özın reiderlık jasady dep Ekonomikalyq tergep-tekseru departamentıne aryz bergen. Alaida tekseru barysynda būl derek rastalmaǧan, ıs qūqyq būzuşylyq oqiǧasy bolmaǧandyqtan toqtatylǧan.
Sonymen qatar, käsıpkerdıŋ mälımdeuınşe, tekseru kezınde «OrdaMedia.kz» JŞS qarajatyn jymqyru jäne ysyrap etu belgılerı anyqtalǧan.
Ǧanievtıŋ pıkırınşe, būl jaittar audit barysynda da belgılı bolar edı jäne dau azamattyq tärtıpte qaralatyn edı. Bıraq onyŋ sözınşe, Bäjkenovanyŋ aryzynyŋ nätijesınde būl epizod qylmystyq ıstıŋ bır bölıgıne ainalǧan.
