جامبىل وبلىسىنىڭ قىلمىستىق ىستەر بويىنشا ارنايى اۋدانارالىق سوتى شاۆكات راحمونوۆتىڭ بۇرىنعى ايەلى گۇلايىم راحمونوۆانىڭ ءىسىن قارادى. ول ادام ولىمىنە اكەپ سوققان جول-كولىك وقيعاسىنا بايلانىستى ايىپتالعان، دەپ حابارلايدى "ادىرنا".
سوتتالۋشى قر قىلمىستىق كودەكسىنىڭ 345-بابى، 4-بولىگى بويىنشا (ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان جول قوزعالىسى ەرەجەلەرىن بۇزۋ) ايىپتالدى. ايتا كەتەيىك، اتالعان باپ بويىنشا 5 جىلدان 10 جىلعا دەيىن باس بوستاندىعىنان ايىرۋ جازاسى قاراستىرىلعان.
مەملەكەتتىك ايىپتاۋشى سوتتان گۇلايىم راحمونوۆانى 5 جىلعا باس بوستاندىعىنان ايىرۋدى جانە جازانىڭ ورىندالۋىن 5 جىلعا شەگەرۋدى سۇراعان بولاتىن.
گۇلايىم راحمونوۆا كىناسىن مويىنداعان جوق.
سوت ءىستىڭ بارلىق جاعدايىن، سونىڭ ىشىندە سوتتالۋشىنىڭ اسىراۋىندا 2 جاستان 9 جاسقا دەيىنگى ءتورت بالاسى بار ەكەنىن ەسكەرە وتىرىپ مىناداي ۇكىم كەستى:
1. نەگىزگى جازا: قر قك 345-بابى 4-بولىگى بويىنشا كىنالى دەپ تانىلىپ، 5 جىلعا باس بوستاندىعىنان ايىرۋ جازاسى تاعايىندالدى.
2. قوسىمشا جازا: 7 جىل مەرزىمگە كولىك قۇرالدارىن باسقارۋ قۇقىعىنان ايىرىلدى.
3. جازانى شەگەرۋ: قر قك 74-بابىنىڭ 1-بولىگىنە سايكەس (كىشكەنتاي بالالارىنىڭ بولۋىنا بايلانىستى), جازانىڭ ورىندالۋى 5 جىلعا شەگەرىلدى.
ەسكە سالا كەتەيىك، 2025 جىلدىڭ جازىندا الماتى – ەكاتەرينبۋرگ تاس جولىنىڭ 299-شاقىرىمىندا اۋىر جول-كولىك اپاتى بولعان ەدى. اپات سالدارىنان ەكى ادام قازا تاۋىپ، راحمونوۆتىڭ ايەلى مەن ۇلى جاراقات الىپ، اۋرۋحاناعا جەتكىزىلگەن.
