فوتو: cnn.com
اقش-تا فەدەرالدىق سوت پرەزيدەنت دونالد ترامپتىڭ ارلينگتون ۇلتتىق زيراتى ماڭىندا الىپ تريۋمفالدى اركا تۇرعىزۋ جوسپارىنا قاتىستى ەكىنشى رەت تىيىم سالدى. سۋديا جوبانىڭ زاڭدىلىعىنا كۇمان كەلتىرىپ، قۇرىلىستى باستاۋ ءۇشىن كونگرەستىڭ ماقۇلداۋى الىنباعانىن مالىمدەدى. بۇل تۋرالى Euronews جازدى، دەپ حابارلايدى "ادىرنا".
جۇما كۇنى وكرۋگتىك سوت سۋدياسى لەوني برينكەما بيىكتىگى شامامەن 76 مەتر بولاتىن اركا قۇرىلىسىنا الدىن الا تىيىم سالۋ تۋرالى شەشىم شىعاردى. ونىڭ پىكىرىنشە، ترامپ اكىمشىلىگى جوبانى جۇزەگە اسىرۋ ءۇشىن قاجەتتى زاڭدىق تالاپتاردى ورىنداماعان. سونداي-اق قۇرىلىسقا قاتىستى ەكولوگيالىق جانە ەكونوميكالىق تاۋەكەلدەرگە بەرىلگەن باعا جەتكىلىكسىز بولعان.
بۇل – ترامپتىڭ باستاماسىنا قاتىستى سوت شىعارعان ەكىنشى تىيىم. بۇعان دەيىن سۋديا تانيا چاتكان دا جوبانىڭ جۇزەگە اسۋىنا توسقاۋىل قويعان ەدى. الايدا ونىڭ شەشىمى 3 جەلتوقسانعا دەيىن كۇشىندە بولادى جانە مەرزىمى ۇزارتىلۋى مۇمكىن. ال برينكەما شىعارعان تىيىمنىڭ اياقتالۋ مەرزىمى بەلگىلەنبەگەن.
جوباعا قارسى تاراپتار اركانىڭ ارلينگتون ۇلتتىق زيراتىنا جاقىن ورنالاسۋىنا الاڭداۋلى. اتالعان زيراتتا جۇزدەگەن مىڭ امەريكالىق ارداگەر جەرلەنگەن. قارسىلىق بىلدىرۋشىلەردىڭ پىكىرىنشە، الىپ قۇرىلىس زيراتتىڭ كورىنىسىن جاۋىپ، قوعامدىق قاۋىپسىزدىككە قاتەر ءتوندىرۋى مۇمكىن.
ارلينگتون وكرۋگتىك كەڭەسىنىڭ مۇددەسىن قورعايتىن Democracy Forward ۇيىمى سوت شەشىمىن قۇپتادى. ۇيىمنىڭ اعا زاڭگەرى كەيت تالمور بۇل شەشىمنىڭ جەرگىلىكتى تۇرعىندار ءۇشىن ماڭىزدى ەكەنىن اتاپ ءوتتى.
«سوت ارلينگتوندا تۇراتىن جانە جۇمىس ىستەيتىن ادامدارعا جوبا كەلتىرەتىن ورنى تولماس زياندى مويىنداپ، ءبىزدىڭ تالاپ-ارىزىمىز قارالعانعا دەيىن بۇل اۋقىمدى ء"وزىن-ءوزى دارىپتەۋ جوباسىنىڭ" قۇرىلىسىن توقتاتتى. اركا قۇرىلىسىنىڭ قوعامدىق قاۋىپسىزدىككە قاتەر توندىرۋىنە جول بەرمەۋ ءۇشىن ارلينگتون وكرۋگتىك كەڭەسىمەن بىرلەسىپ جۇمىس ىستەۋ ءبىز ءۇشىن ۇلكەن مارتەبە»، – دەدى ول.
ايتا كەتەيىك، وسى ايدىڭ باسىندا ۇلتتىق استانالىق جوسپارلاۋ كوميسسياسى قۇرىلىس جوباسىن ماقۇلداعان بولاتىن.
دونالد ترامپ 2025 جىلدىڭ قاڭتارىندا اق ۇيگە ورالعاننان كەيىن ۆاشينگتون قالاسىنىڭ ساۋلەتتىك كەلبەتىن وزگەرتۋگە باعىتتالعان اۋقىمدى باستاما كوتەردى. پرەزيدەنت ارلينگتون مەموريالدىق كوپىرىنىڭ جانىنداعى رەسەپشن-سەركل اۋماعىندا سالىناتىن اركانى اسكەري ماقساتتا پايدالانۋدى جوسپارلاپ وتىرعانىن مالىمدەگەن.
«ازامات سوعىسى كەزىنەن بەرى سالۋ جوسپارلانىپ كەلگەن ارلينگتون مەموريالدىق كوپىرىنىڭ جانىنداعى رەسەپشن-سەركل اۋماعىندا ورنالاساتىن كەرەمەت تريۋمف اركاسىن ءبىرىنشى دارەجەلى اسكەري كەشەنگە اينالدىرۋعا كەلىستىم»، – دەپ جازعان ول Truth Social الەۋمەتتىك جەلىسىندە.
ترامپتىڭ ايتۋىنشا، نىساندى كوپتەگەن ۇشقىشسىز ۇشۋ اپپاراتتارىن ورنالاستىرۋعا، ساقتاۋعا جانە ولاردى جەدەل ىسكە قوسۋعا پايدالانۋعا بولادى.
«ول جەردە درونداردى ورنالاستىرىپ، ساقتاۋعا جانە قاجەت بولعان جاعدايدا جەدەل قولدانۋعا مۇمكىندىك بولادى»، – دەگەن پرەزيدەنت. سونداي-اق ول اركانىڭ توبەسى مەن الدىنداعى الاڭدا مەرگەندەر ورنالاساتىنىن جانە وق-دارىلەردىڭ مول قورى ساقتالاتىنىن ايتقان.
وسىلايشا، جوبانى جوسپارلاۋ كوميسسياسى ماقۇلداعانىمەن، فەدەرالدىق سوتتاردىڭ شەشىمدەرى ترامپتىڭ الىپ اركا سالۋ باستاماسىن ازىرگە توقتاتىپ وتىر.
