قازاقستاندىق وقۋشىلار شۆەتسيا كورولدىگىنىڭ گيوتەبورگ قالاسىندا وتكەن 10-شى ەۋروپالىق فيزيكا وليمپياداسىندا جوعارى ناتيجە كورسەتىپ، 3 كۇمىس جانە 1 قولا مەدال يەلەندى. بۇل تۋرالى وقۋ-اعارتۋ مينيسترلىگى ايتتى، دەپ حابارلايدى «ادىرنا» ءتىلشىسى.
بەدەلدى حالىقارالىق ءبىلىم دوداسىنا الەمنىڭ 41 ەلىنەن 200-دەن استام وقۋشى قاتىسقان.
كۇمىس مەدال يەگەرلەرى:
• سەيتقاميت ارعىن – استانا قالاسى نۇرا اۋدانىنداعى جاراتىلىستانۋ-ماتەماتيكا باعىتتاعى NIS-ءتىڭ 11-سىنىپ وقۋشىسى;
• ابدىقادىر تاير – قوستاناي وبلىستىق دارىندى بالالارعا ارنالعان ء«بىلىم-يننوۆاتسيا» ليتسەي-ينتەرناتىنىڭ 11-سىنىپ وقۋشىسى;
• سابىروۆ مەرگەن – استانا قالاسىنداعى NURORDA مەكتەبىنىڭ 10-سىنىپ وقۋشىسى.
قولا مەدال يەگەرى:
• جولامان ابىلايحان – الماتى قالاسىنداعى NURORDA مەكتەبىنىڭ 10-سىنىپ وقۋشىسى.
ۇلتتىق قۇرامانىڭ حالىقارالىق وليمپياداعا قاتىسۋىن ءال-فارابي اتىنداعى قازاق ۇلتتىق ۋنيۆەرسيتەتىنىڭ اعا وقىتۋشىسى بەكمىرزا بەيسەنوۆ پەن حالىقارالىق وليمپيادالاردىڭ جۇلدەگەرى تەمىرلان يسماعۇلوۆ ۇيلەستىرگەن.
ەۋروپالىق فيزيكا وليمپياداسى – فيزيكا ءپانى بويىنشا دارىندى وقۋشىلاردىڭ تەوريالىق ءبىلىمى مەن ەكسپەريمەنتتىك داعدىلارىن باعالايتىن بەدەلدى حالىقارالىق جارىستاردىڭ ءبىرى.
