وقۋشىلارعا كومەك كورسەتۋگە قاتىستى جەلىدەگى حابارلامالارعا وقۋ-اعارتۋ مينيسترلىگىنىڭ بالالاردىڭ قۇقىقتارىن قورعاۋ كوميتەتى تۇسىنىكتەمە بەردى. ۆەدومستۆودا اتا-انالار جالپى ءبىلىم بەرۋ قورى ارقىلى ءار بالاعا 37 389 تەڭگەدەن كومەك الا الاتىنىن اتاپ ءوتتى، دەپ حابارلايدى “ادىرنا” ۇلتتىق پورتالى.
"جاقىندا باق-تا جامبىل وبلىسىنداعى كەيبىر كوپبالالى اتا-انالاردىڭ حابارلاۋى بويىنشا، مەكتەپ فورماسى مەن وقۋعا قاجەتتى قۇرال-جابدىقتاردى ساتىپ الۋ ءۇشىن جەرگىلىكتى اتقارۋشى ورگاندار 32 500 تەڭگەدەن جانە تەك ءبىر بالاعا بولەتىنى تۋرالى اقپارات پايدا بولدى. بالالاردىڭ قۇقىقتارىن قورعاۋ كوميتەتى قولدانىستاعى زاڭناماعا سايكەس الەۋمەتتىك وسال وتباسىلار ءۇي ىشىندەگى ءاربىر وقۋشىعا جاپپاي وقىتۋ قورى ارقىلى كومەك الۋى ءتيىس ەكەنىن حابارلايدى. سونىمەن قاتار، ءاربىر مۇقتاج وقۋشى ءۇشىن بۇل سوما 37 389 تەڭگەدەن كەم بولماۋى ءتيىس", – دەلىنگەن حابارلامادا.
كوميتەتتە اكىمدىكتەر كومەك سوماسىن كوبەيتە الاتىنىن، بىراق ازايتۋعا قۇقىعى جوق ەكەنىن اتاپ ءوتتى. كەيبىر اكىمدىكتەر قازىردىڭ وزىندە ەڭ تومەنگى مولشەردەن ارتىق سومانى ءبولىپ جاتىر.
مەكتەپتەردى قارجىلاندىرۋدى، ونىڭ ىشىندە مەكتەپ وقۋشىلارىن قولداۋدى اكىمدىكتەر جۇزەگە اسىرادى. بيىل 37 389 تەڭگە كولەمىندەگى كومەكتى كەم دەگەندە 440 مىڭنان استام بالا الادى.
بۇرىن جاپپاي وقىتۋ ەسەبىنەن كومەك سوماسى 17-دەن 37 مىڭ تەڭگەگە دەيىن بولعان. سونداي-اق، مەكتەپ كەرەك-جاراقتارىن ساتىپ الۋمەن اكىمدىك قىزمەتكەرلەرى اينالىستى. الايدا، وقۋشىلاردىڭ اتا-انالارى مەكتەپ فورماسىنىڭ دۇرىس تاڭدالماعان مولشەرى مەن ساپاسىنا شاعىمداناتىن.
"كوپ بالالى انالاردىڭ شاعىمدارىن ەسكەرە وتىرىپ، الەۋمەتتىك جاعدايى تومەن بالالارعا كومەك كورسەتۋ ەرەجەلەرىنە وزگەرىستەر ەنگىزىلدى. تۇزەتۋلەر اتا–انالاردىڭ كارتوچكالىق شوتقا تىكەلەي اقشا الۋى جانە ءار بالاعا مەكتەپ فورماسىن، اياق كيىم مەن وقۋعا قاجەتتى قۇرال-جابدىقتارىن ءوز بەتىنشە تاڭداي الۋى ءۇشىن قابىلداندى", - دەپ ناقتىلادى بالالاردىڭ قۇقىقتارىن قورعاۋ كوميتەتى.
ايتا كەتەيىك، "جالپىعا مىندەتتى ءبىلىم بەرۋ" قورىنان كەلەسى ساناتتاعى وقۋشىلار كومەك الۋ قۇقىعىنا يە:
- اتاۋلى الەۋمەتتىك كومەك (ااك)الۋشىلار;
- ااك المايتىن، بىراق ءبىر مۇشەگە تابىسى ەڭ تومەنگى كۇنكورىس دەڭگەيىنەن تومەن وتباسىلار;
- جەتىم بالالار جانە اتا-اناسىنىڭ قامقورلىعىنسىز قالعان بالالار;
- توتەنشە جاعدايلاردان زارداپ شەككەندەر;
- مەكتەپتىڭ القالى ورگانى ايقىندايتىن وقۋشىلاردىڭ وزگە دە ساناتتارى.
ماتەريالدى كومەك الۋ ءۇشىن اتا-انالار تۇرعىلىقتى جەرى بويىنشا ءبىلىم بولىمىنە حابارلاسۋى قاجەت.
”ادىرنا” ۇلتتىق پورتالى
