«تۋعان ەلگە تاعزىم» ەكسپەديتسياسى اياسىندا پاۆلودار، قىزىلوردا، ورال قالاسىنىڭ وقۋشىلارى ماڭعىز ماڭعىستاۋدىڭ اسەم تابيعاتىمەن تاريحىن زەرتتەدى. اقتاۋداعى نازارباەۆ زياتكەرلىك مەكتەبىندە وتكەن زەرتتەۋ باعىتىنداعى ولكەتانۋلىق ەكسپەديتسياسىنا 74 وقۋشى قاتىستى.
جوبا اياسىندا ەكسپەديتسيالىق توپ ماڭعىستاۋ ولكەسىنىڭ فلورا، فاۋنا، تاريحىن، مادەنيەتىن، يننوۆاتسيالىق وبەكتىلەرىن، ارحيتەكتۋرالىق قۇرىلىستارىن، زەرتتەدى.
جوبانىڭ العاشقى كۇندەرىندە ورال جانە قىزىلوردا، پاۆلودار قالاسىنداعى زياتكەرلىك مەكتەپ وقۋشىلارى قابيبوللا سىديىقوۆ اتىنداعى ماڭعىستاۋ وبلىستىق كىتاپحاناسىمەن تانىستى. ولار كىتاپحانا قۇرىلىسىمەن، ونداعى ولكەتانۋ بولىمىندەگى كىتاپتار جايىندا اقپارات الدى. ولكەنىڭ قالىپتاسۋى مەن دامۋىنداعى ولشەۋسىز ەڭبەك ەتكەن، زاڭعار جازۋشى ءابىش كەكىلباەۆ اتىنداعى ماڭعىستاۋ وبلىستىق تاريحي-ولكەتانۋ مۇراجايىن دا تاماشالادى.
زياتكەرلەر ءبىر اپتاعا سوزىلعان شارا بارىسىندا ماڭعىستاۋ ولكەسىمەن جاقىن تانىسىپ، اقپارات الۋ ءۇشىن اقتاۋداعى ونەركاسىپ ورىندارىنا باردى. ولار اقتاۋداعى «Kaz Fruit» ازىق-تۇلىك ساقتاۋ بازاسىنا، «اقتاۋ تۇيەقۇس» فابريكاسى، «Kazakh Osseter» كومپانياسىنا ساياحاتتادى. سونىمەن قاتار، جاس زەرتتەۋشىلەر قازاقستانداعى كەشەندى ونەركاسىپ ورىندارىنىڭ ءبىرى، اممياك جانە اممياك سەليتراسىن وندىرەتىن جالعىز كاسىپورىن «قازازوتقا»، جانە جول بيتۋمىن وندىرۋگە باعىتتالعان «Caspi bitum» مۇناي وڭدەۋ زاۋىتىنىڭ جۇمىسىمەن تانىستى. سونداي-اق، وڭىردەگى ەڭ ۇزدىك وقۋ ورداسى شاحماردان ەسەنوۆ اتىنداعى ۋنيۆەرسيتەتىنىڭ اسكەري-تەڭىز اكادەمياسىمەن تانىسىپ، سوڭعى تەحنولوگيامەن جابدىقتالعان وقۋ ورنىنا قىزىعۋشىلىق تانىتتى.
جوبا باعدارلاماسىنا سايكەس، وقۋشىلار ماڭعىستاۋداعى ءحىى-ءحVىى عاسىرلارعا جاتاتىن ءدىني ساۋلەت ەسكەرتكىشى سانالاتىن قارامان اتا جەر استى مەشىتىنە باردى. جاس زەرتتەۋشىلەر جەر استىنداعى مەشىتپەن، قورىممەن تانىسىپ، اتا-بابا رۋحىنا تاعزىم ەتتى.
ماڭعىستاۋدا قۇپياسى ءالى اشىلماعان جەرلەر وتە كوپ، سونىڭ ءبىرى «تورىش» شاتقالى. وقۋشىلار تاريحى ميلليون جىلدان اساتىن شاتقالدى ءوز كوزدەرىمەن كورىپ، تاڭداستى. ساپار سوڭىندا تابيعاتتىڭ ەرەكشە ۇلگىسى بولعان «اقەسپە» القابىن دا تاماشالادى.
نازارباەۆ زياتكەرلىك مەكتەپتەرىنىڭ ۇيىمداستىرۋىمەن 2012 جىلدان بەرى جۇزەگە اسىپ كەلە جاتقان ءداستۇرلى «تۋعان ەلگە تاعزىم» ەكسپەديتسياسى بيىل اقتاۋ، سەمەي، قاراعاندى، تۇركىستان، كوكشەتاۋ، وسكەمەن جانە پاۆلودار قالالارىندا جۇزەگە استى.
